“တခြား သူတွေ နဲ့ ယှဉ်ရင် အောင်မြင် ကြီးပွားဖို့ ငါအရမ်းနောက်ကျနေပြီလား…” အချိန် မရလဲ ဒီစာလေးဖတ်ကြည့်ပါ..

“တခြား သူတွေ နဲ့ ယှဉ်ရင် အောင်မြင် ကြီးပွားဖို့ ငါအရမ်းနောက်ကျနေပြီလား…” အချိန် မရလဲ ဒီစာလေးဖတ်ကြည့်ပါ..

၂၀၁၂ ခုနှစ် မှာ ကျွန်တော် ဘွဲ့ ရ တယ် ။ အရင်တုန်း ကတော့ ကျောင်းသား ။ အခု ဘွဲ့ရသွားပြီး အလုပ်မရခင်စပ်ကြားမှာတော့ အလုပ် လက်မဲ့ ။

အလုပ်ရှာ မရဘဲ အိမ်မှာ အလကားနေ အလကား ထိုင်စားရတဲ့အချိန်ကြာလာတာ နဲ့အမျှ ကိုယ့်ကို ကိုယ်ရှက်လာတ ယ်။ သူငယ်ချင်း အပေါင်းအသင်းတွေ အလုပ်ကိုယ်စီနဲ့ ဖြစ်လာတဲ့ အခါ အဲဒီရှက်ရွံ့သိမ်ငယ်မှုက ပိုဆိုး လာတယ်။

အရင်က လက်ဘက်ရည် အတူတူ ထိုင်နေကျလူတွေ အလုပ်တွေ ရကုန်တော့ တစ်ယောက်ပြီး တစ်ယောက် မအားတော့ဘူး ။အရင်က အတူတူ ဂိမ်းဆော့ဖော်ဆော့ဖက်တွေ က ရုံးတက်ရ မှာမို့ ညဥ့်နက်တဲ့ အထိ မနေနိုင်တော့ ဘူး။ အဲဒီအချိန်ထိ ကိုယ်က အလုပ်လက်မဲ့။

တဖြည်းဖြည်း နဲ့ သူတို့နဲ့ ဝေးတဲ့ နေရာမှာ နေချင် စိတ်ပေါ် လာတယ်။ ဆွေမျိုးတွေနဲ့ တွေ့လို့ ဘာလုပ်နေလဲ မေးတဲ့အခါ ကိုယ့်မှာဖြေစရာမရှိဘူး။ သူငယ်ချင်းအပေါင်း အသင်းတွေ တွေ့လို့ သူ့အလုပ်အကြောင်း ကိုယ့်အလုပ်အကြောင်းပြောတဲ့အခါ ကိုယ့်မှာ ပြောစရာမရှိဘူး။

ဒီလိုနဲ့ တွေ့ရာအလုပ်ခေါ်တဲ့နေရာတွေ မှန်သမျှ စီဗွီဖောင်တွေ လိုက်ပို့။ အင်တာဗျူးဖြေပြီးရင် ဖုန်းဆက်ပြီး အလုပ်မခန့်ဖြစ်ဘူးလားလို့အကြိမ်ကြိမ်လှမ်းမေး။ တစ်ယောက်တည်းကမ္ဘာပျက်နေတာပေါ့။

ပြဿနာက ရှက်ရွံ့သိမ်ငယ်မှုနဲ့ အလုပ်မရမှာကို စိုးရိမ် တကြီးဖြစ်နေ တဲ့ အသက် ၂၂ နှစ်အရွယ် လူငယ်တစ်ယောက် ရဲ့ ကိုယ့်ကိုယ် ယုံကြည်ချက်မရှိမှု အသွင်အပြင်က အတိုင်းသားဖြစ်နေတော့ အလုပ်က ရှာသာရှာ မရနိုင်ဘူး။

အလုပ်မရနိုင်ဖြစ်လေ အလုပ်ရှိနေတဲ့ကိုယ့် သူငယ်ချင်းအပေါင်း အသင်းတွေကြည့်ပြီး ငါဟာ အရှုံးသမား သတ်သတ်တစ်ယောက် ပဲ။ အသုံးမကျတဲ့သတ္တဝါတစ်ကောင်ပဲ။ အရမ်းကိုနောက်ကျနေပြီဆိုတဲ့ ခံစားချက်တွေ ဖိစီး လာတယ်။

၈ နှစ်အကြာဒီနေ့အချိန်မှာတော့ အဲဒီပြဿနာ တွေမရှိတော့ဘူး။

အကုန်လုံး အလုပ် အကိုင်ကိုယ်စီနဲ့ ကိုယ်စီကျွမ်းကျင်ရာနယ်ပယ်တွေမှာ နေရာရနေကြတယ်။ အဲဒီတုန်းက ကိုယ်ထင်ခဲ့သလို ငါတော့ လုံးလုံးအသုံးမကျတဲ့သူဖြစ်ပါပြီဆိုတာမျိုးလည်းမဖြစ်လာဘူး။ အရမ်းနောက်ကျနေပါလားဆိုတဲ့ခံစားချက်လည်း မရှိတော့ဘူး။ အချိန်၊ အားစိုက်ထုတ်မှုနဲ့ ကျွမ်းကျင်မှုတွေ ပေါင်းစုံမိသွားတဲ့အခါ ကိုယ်သွားနေတဲ့လမ်းနဲ့ပန်းတိုင်က ထင်ထင်ရှားရှားမြင်လာရပြီ။

ဒါဖြင့်ရင် အဲဒီအချိန်တုန်းက ဘာလို့ ဘဝပျက်မတတ် စိတ်ပျက်အားလျော့ခဲ့ရတာလဲ။ တရားခံကတော့ “နှိုင်းယှဉ်လို့”ပါ။

လူတွေက သူတို့ ကိုယ်သူတို့ တခြားလူတွေနဲ့ နှိုင်းယှဉ်လေ့ရှိတယ်။ အထူးသဖြင့် ကိုယ်နိမ့်ပါးနေတဲ့အချိန်လို့ သူတို့ခံစားရချိန်ဆိုရင် တခြားသူတွေနဲ့ ပိုပြီးနှိုင်းယှဉ်တယ်။ စိတ်ဓာတ်ကျတယ်။ စိတ်ဖိစီးတယ်။ ကိုယ်အလုပ်မရသေးတဲ့အချိန်မှာ အလုပ်ရသွားတဲ့သူတွေ နဲ့နှိုင်းယှဉ်ပြီး အသုံးမကျတဲ့ခံစားချက်ကြီးကို မွေးမြူတယ်။ စိတ်ဖိစီးမှုတွေကို အသက်သွင်းတယ်။

“မတူညီတဲ့ အကြောင်းရင်းခံနဲ့ အနေအထားတွေ ပေါ်မှာရှိနေတဲ့ ကိုယ်နဲ့ တခြားသူနဲ့ကို နှိုင်းယှဉ်ကြည့်တဲ့အခါ နာကျင်မှုတွေ စတင်ဖြစ်ပေါ်လာတယ်”

လူတွေကို မွေးကတည်းက မတူညီတဲ့ လမ်းတစ်လမ်းစီမှာ မွေးလာတယ်။ ကိုယ့်မိဘတွေဖောက်ပေးထားတဲ့လမ်းတွေပေါ့။ ကိုယ်နဲ့အတူ အနီးအနားက တခြားလမ်းတွေကိုလည်းမြင်နေရတယ်။ ဒါပေမယ့် လမ်းရွေးချယ်ပိုင်ခွင့်မရှိဘူး။ ချမ်းသာတဲ့မိဘတွေဆီမှာ ပေါက်ဖွားပါရစေလို့ တောင်းဆိုပိုင်ခွင့်မရှိဘူး။

တချို့မိဘတွေ ဖောက်ပေးထားတဲ့လမ်းတွေက ပြေပြစ်ချောမွေ့တယ်။ တချို့မိဘတွေဖောက်ပေးထားတဲ့လမ်းကတော့ အခက်အခဲတွေရှိတယ်။ အဖုအထစ်တွေရှိတယ်။

ကိုယ်ပိုင်တဲ့လမ်း ကြိုက်သလိုအသုံးချ လို့ရတယ်။ ပြေးလိုကပြေး။ လျှောက်လိုကလျှောက်။ ဘယ်မှမသွားဘဲ ရပ်နေချင်သပဆိုလည်း ရတာပဲ။ ပြေပြစ်ချောမွေ့အောင်ဖောက်ထားတဲ့လမ်းမှာ မွေးဖွားကြီးပြင်းလာခဲ့တဲ့သူတစ်ယောက်က တခြားသူ့ထက် ခက်ခဲကြမ်းတမ်းတဲ့နေရာမှာ မွေးဖွား လာခဲ့ရတဲ့သူထက်တော့ ရှေ့ရောက်နေမှာပဲ။

ဒီလိုပဲ ကိုယ့်ထက်ကြမ်းတမ်းတဲ့ အဖုအထစ်များတဲ့ လမ်းတွေပေါ်မှာ မွေးဖွားခဲ့ကြသူတွေလည်းရှိတယ်။ သူတို့ကတော့ ကိုယ့်နောက်ကနေ ဆက်လျှောက်နေကြရမှာ။ ခက်ခဲကြမ်းတမ်းတဲ့လမ်းပေါ်လျှောက် နေရသူအတွက် ပြေပြစ်တဲ့လမ်းပေါ် လျှောက်နေသူတွေဟာ အားကျစရာအတိပဲ။

ကျောင်းပြီးတာနဲ့ အဖေ့ကုမ္ပဏီမှာ မန်နေဂျာဖြစ်သွားတဲ့သူကို အားမကျမိဘဲနေပါ့မလား။ ကိုယ့်မှာအလုပ်ရဖို့ရုန်းကန်နေရချိန်မှာ ဘွဲ့ရပြီးတာနဲ့ ဆိုင်တစ်ဆိုင်ဖွင့်အေးဆေးနေနေတဲ့ သူတွေကိုမြင်ရတော့ ကိုယ့်ဘဝကိုယ် မကျိန်ဆဲမိဘဲနေပါ့မလား။

ဒါပေမယ့် ကိုယ့်လမ်းကိုယ်ဆက်မလျှောက်ဘဲနေလို့မရဘူး။ ရှေ့ကိုတော့ ဆက်သွားနေမှဖြစ်လိမ့်မယ်။ ခက်ခဲကြမ်းတမ်းလွန်းတယ်ကွာလို့ ညည်းညူနေလို့မရဘူး။ တခြားလမ်းတွေကတော့ သာယာလိုက်တာလို့ စိတ်ပျက်အားလျော့နေလို့မရဘူး။ ကိုယ်ပိုင်တဲ့လမ်း ကိုယ်တိုင်အဆုံးထိမဖောက်နိုင်ရင် သွားပြီ။

ဒီတော့ ကုန်းတက်ရောက်ရင် ပိုအားထည့်ရမယ်။ ဆူးညှောင့်ခလုတ်တွေရှိရင် ဂရုတ စိုက်ဖယ်သွားရမယ်။ သူများလမ်းကို အာရုံစိုက်လွန်းပြီး ကိုယ့်လမ်းကိုယ် စိတ်ပျက်အားလျော့မှုမှာပဲ စိတ်ရောက်နေရင် ဆူးညှောင့် တွေနင်းမိမယ်။ အတားအဆီးတွေမှာ ရပ်တန့်နေရလိမ့်မယ်။

ကိုယ့်ထက် လမ်းပြေပြစ်သူဟာ ကိုယ့်ထက် အရှေ့ရောက်နေမယ်။ ကိုယ့်ထက် ပိုလမ်းကြမ်းတဲ့သူက ကိုယ့်အ နောက်မှာရှိနေမယ်။ကိုယ်နောက်ရောက်နေရင်လည်း အားငယ်စရာမလိုသလို ကိုယ်ရှေ့ရောက်နေလို့လည်း ရပ်တန့်ဂုဏ်ယူ နေစရာမလိုဘူး။လမ်းဆိုကတည်းက ကုန်းတက်ကုန်းဆင်း ပြေပြစ် ကြမ်းတမ်းမှုတွေက အကန့်လိုက် နေရာယူထားတာပဲလေ။ အချိန်အပိုင်းအခြားတစ်ခုမှာ ဘယ်နေရာတွေ ရောက်နေမလဲဆိုတာကို ဘယ်သူမှမသိနိုင်ဘူး။

“အိုဘားမားက အသက် ၅၅နှစ်မှာ သမ္မတအဖြစ်ကနေ ပင်စင်ယူတယ်။ ဒေါ်နယ်ထရန့်က အသက် ရဝမှာမှ သမ္မတဖြစ်တယ်” နောက်ကျတယ် မနောက်ကျဘူးဆိုတာက တခြားသူတွေနဲ့နှိုင်းယှဉ်ကြည့်ရာကနေ ဖြစ်လာတာပဲ။ ဒီလိုသာဆိုရင် ကိုယ့်ထက်စောနေတဲ့သူ အမြဲတမ်းရှိတယ်။ အဲဒီလိုပဲ ကိုယ့်ထက် နောက်ကျနေတဲ့သူတွေလည်း အမြဲတမ်းရှိနေဦးမှာပဲ။

ဒါကြောင့် နှိုင်းယှဉ်တာတွေကို စိတ်ထဲမထားဘဲ ကိုယ့်လမ်းကိုယ်ပဲ အာရုံစိုက်ပြီးသွားပါ။အတားအဆီးတွေတွေ့ရင် ကျော်လွှားပါ။ ကုန်းတက်တွေဆိုအားစိုက်ထုတ်ပါ။ ပြေပြစ်တဲ့ နေရာလေးတွေမှာ လမ်းဘေးက အလှအပတွေကို ခံစားပါ။ ဘဝရဲ့ သာယာနာပျော်မှုတွေကို သတိပြုပါ။

ဒါကိုယ့်လမ်းပဲမလား။ ကိုယ့်စိတ်ကြိုက် ပြေးလိုက ပြေးပါ လျှောက် လိုက လျှောက်ပါ။ ဒါပေမယ့် ကိုယ့်လမ်းကိုယ် အာရုံအပြည့်စိုက်ဖို့တော့မမေ့ပါနဲ့။ စတိဗ်ဂျော့က ပြောဖူးတယ်။ လူ့ဘဝဟာ အမှတ်စက်တွေကို ဆက်နေရတာပဲတဲ့။ ကိုယ့်ဘဝရဲ့ အမှတ်စက်တွေကို အပြည့်အဝ အာရုံစိုက်ထားတဲ့သူတစ်ယောက်က သူ့အမှတ်စက်တွေကို ပေါင်းစပ်လိုက်တဲ့အခါ ပုံရိပ်တစ်ခု ပြည့်ပြည့်ဝဝပေါ်လာနိုင်ပါလိမ့်မယ်။

လူတစ်ယောက်က တခြားသူတွေကိုပဲ အာရုံစိုက်ပြီးကိုယ့်ဘဝကိုယ်အပြည့်အဝ အာရုံ မစိုက်နိုင်ခဲ့ရင် သူ့ရဲ့ အမှတ်စက်လေးတွေဟာ လှလှပပ ပုံပေါ်နိုင်မှာမဟုတ်ဘူး။

ကျွန်တော်တို့က နောက်မကျ ပါဘူး။

မတူညီတဲ့ လမ်းတွေပေါ်မှာ လျှောက်လှမ်းနေရတဲ့ အတွက်ကြောင့် ပြေပြစ်ချောမွေ့ပုံချင်း အဖုအထစ်ချင်း မတူညီကြတာပါ။ မတူညီတဲ့အနေအထားနဲ့ အကြောင်းရင်းခံတွေပေါ်မှာ လိုက်ပြီးနှိုင်းယှဉ်ကြည့်နေမယ့်အစား ကိုယ့်လမ်းပေါ်မှာသာ အပြည့်အဝအာရုံစိုက်ပြီး ကိုယ့်အမှတ်စက်တွေ ကိုသာ အပြည့်အဝပုံဖော်သွားပါ။ ဒါဆိုရင် ကျွန်တော်တို့ရဲ့ဘဝပုံရိပ်ကလည်း ပြည့်စုံသွားလိမ့်မယ်။

Dr. Thurein Hlaing Win

Add a Comment

Your email address will not be published. Required fields are marked *

five + 20 =