မြန်မာ မိဘတွေ ရဲ့ သားသမီး ပျိုးထောင် ပြုစု နည်း အလွဲများ

မြန်မာ မိဘတွေ ရဲ့ သားသမီး ပျိုးထောင် ပြုစု နည်း အလွဲများ

မြန်မာပြည်က မိဘတွေ ကို ကြည့်လိုက်ရင် အမြဲမောပန်းနေ စိုးရိမ်နေတာပဲ တွေ့ရတာများတယ်။ များဆို သူတို့ဟာ သူတို့တာဝန် သူတို့လုပ်ရမယ့် အလုပ်နဲ့ သားသမီးရဲ့ အလုပ် သားသမီးရဲ့တာဝန်ကို ခွဲခြားတတ်တဲ့ အသိဉာဏ်မဲ့နေတာကိုး။ မြန်မာပြည်က မိဘအများစုကို ကြည့်ရင် သားသမီးကို လူသား တစ်ယောက်လို့ မြင်တာထက် သူတို့ပိုင် ပစ္စည်းလို့မြင်တာ ဆက်ဆံတာပဲများတယ်။

တခါ parenting အလွဲတွေကလည်း မိဘတွေကို မလိုလား အပ်တဲ့ ဝန်ထုပ်ဝန်ပိုးတွေ ပိစေသလို ကလေးတွေကိုလည်း လူညွန့်တုံးစေတယ်။ မြန်မာပြည်က မိဘတွေဟာ သားသမီးယုံ စုံလုံးကမ်းဆိုတဲ့ ဂျင်းကို အပြည့်အဝစားပြီး ကိုယ်ပုံစံချ ကိုယ်ပျိုးထောင်ထားတဲ့ ကလေးကိုတောင် သံသယမျက်လုံးနဲ့ ထောင့်စေ့အောင် ထိုင်ကြည့်နေရတဲ့ သူတွေ။ ကျမယုံကြည်တာ ကျမသာ ကျမကလေးကို ကျမမယုံနိုင်ရင် အဲ့ဒါကလေးမကောင်းလို့မဟုတ်ဘူး။ ကျမ အသုံးမကျလို့ ကျမပြုစုပျိုးထောင်ပုံ မှားယွင်းနေလို့။ ဒါကြောင့် ကလေးကို မပြင်ခင် ကျမကိုယ်ကျမသာ အရင်ပြင် ရမှာ။

တခါ မြန်မာပြည်က မိဘတွေဟာ သားသမီးအလုပ် နဲ့ မိဘအလုပ်ကြား စည်းမရှိဘူး။ ဥပမာ သားသမီးစာကျက်ချင်အောင် စာလေ့လာချင်အောင် ကူညီရမှာ ပြောဆိုဆုံးမပေးရမှာ မိဘအလုပ်။ ဒါပေမယ့် စာကျက်မယ် မကျက်ဖူးက ကလေးအလုပ်။ ဒါကိုလိုက်ပြီး သေအောင်လိုက်ကျက်ခိုင်း ထုရိုက်ဆူဆဲနဲ့ သားသမီး အလုပ်ကို အတင်းဖိအားပေးလုပ်ခိုင်းတာ ကျမတော့ လုံးဝသဘောမကျဘူး။ ကလေးတစ်ယောက် စာမလေ့လာချင်တာ လေ့လာချင်အောင် မသင်တတ်တဲ့ဆရာတွေကြောင့်နဲ့ လေ့လာလိုစိတ်ဖြစ်အောင် မစည်းရုံးနိုင်တဲ့ မိဘတွေကြောင့်လို့ပဲ မြင်တယ်။ ရိုက်ပြီးစာကျက်ခိုင်း လို့ ပညာရှင်ဖြစ်လာစရာ အကြောင်းကို မရှိဘူး။ လူဆိုတာ သူလေ့လာဖို့လိုမှန်း သူ့ဟာသူယုံကြည်ပြီးလက်ခံလာတဲ့ တနေ့ ဘယ်သူတားတား လေ့လာမှာပဲ။

ဒီလိုပဲ ဟိုဟာမလုပ်နဲ့ ဟိုလူနဲ့မပေါင်းနဲ့ ဒီမသွားနဲ့ စသဖြင့် များပြား လိုက်တဲ့ ပညတ်ချက်တွေအောက်မှာ ကလေးတွေကို မျက်စိပိတ် နားပိတ် လူဝင်မဆန့်အောင်လုပ်တာလဲ သူတို့ပဲ။ ပြီးတော့ လူဝင်မဆန့်လို့ မပေါင်းတတ်မသင်းတတ်လို့ ဘာမှမဖြစ်မြောက်တော့လဲ အဖြစ်မရှိတဲ့ကောင် သုံးစားမရတဲ့ကောင်ဆိုပြီး စိတ်ဓါတ် အညွန့်ချိုးတာလဲ မိဘတွေပဲ။ အကြောင်းပြချက်က ကလေးတွေ အမှားလုပ်မစိုးလို့တဲ့။ ဘဝမှာ အမှားဆိုတာ မရှိဘူး။

သင်ခန်းစာဆိုတာပဲရှိတယ်။ ကိုယ့်အတွက်မှန်တာလုပ်မိရင် ကောင်းမွန် တယ့် သင်ခန်းစာရတယ်။ ကိုယ့်အတွက် မကောင်းတာလုပ်မိရင် ခါးသီးတယ့် သင်ခန်းစာရတယ်။ ဘာမှလုပ်ခွင့်မရရင် ဘာသင်ခန်းစာမှ မရရုံပဲ။ ဒီတော့ မိဘတွေအနေနဲ့ ကလေးတစ်ယောက် သူ့ဘဝသင်ခန်းစာတွေ သူလေ့လာစေချင်လား။ ဘာသင်ခန်းစာမှ မလေ့လာပဲ ဒုံရင်းက ဒုံရင်းပဲ ကလေးအသိဉာဏ်နဲ့ လူကြီးဖြစ်စေချင်လား။

တချို့မိဘတွေပြောတယ်။ သူတို့ကလေးကို သူတို့နားမလည်တော့ဘူး ဆိုပြီး။ ကျမပြောတယ်။ စာအုပ်ကို မျက်စိနားတအားကပ်ပြီးဖတ်ရင် အဲ့စာကို ဖတ်လို့မရတော့ဘူး မဟုတ်လား။ အဲ့လိုပဲ တအားအဝေးကြီးက ဖတ်ရင်လဲ ဖတ်မရဘူးလို့။ ဒါကြောင့် မြင်နိုင်တဲ့ အကွာအဝေးက ဖတ်ဖို့လိုတယ်။ ဒီသဘောအတိုင်းပဲ မိဘနဲ့သားသမီး ဖြစ်ဖြစ် လင်မယားဖြစဖြစ် လူလူချင်း တစ်ယောက်ရဲ့ခံစားချက်ကို တစ်ယောက်နားလည်ဖို့ အကွာအဝေးတစ်ခု လိုတယ်လို့။ သားသမီးရဲ့ ကိစ္စတိုင်းဝင်ပါ ဝင်ပြော ဝင်ဆုံးဖြတ် မတောင်းပဲ ဝင်ကူညီ အတင်းလုပ်ခိုင်း အတင်းအကြံပေး စသဖြင့် ကလေးနဲ့ကိုယ်ကြား healthy ဖြစ်တဲ့ စည်းတစ်ခု မခြားပဲ အတင်းကပ်ချင်းဟာ ကလေးနဲ့ကိုယ့်ကိုယ် ပိုဝေးကွာစေတယ်လို့။

မြန်မာမိဘအများစုဟာ သားသမီးကို သူတို့ကိုယ်ပွားအဖြစ်မွေးချင်ကြတာ။ သူ့ဘဝ သူပိုင်ပြီး သူ့ဘဝ သူ့အကြိုက်ပုံဖော်နိုင်တဲ့ လူသားတစ်ယောက်အဖြစ် မွေးမြူပေးချင်တဲ့ စေတနာမရှိကြဘူး။ ဒီတော့ အဲ့လိုမိဘတွေဟာ သူတို့ကလေးကို သူတို့နဲ့ အကုန်တူအောင် ပုံစံသွင်းတယ်။ သူတို့ကြောက်တာတွေနဲ့ အတင်းခြောက်တယ်။ သူတို့ချစ်တဲ့ အရာတွေ အတင်းချစ်ခိုင်းတယ်။ သူတို့အယူတွေ အကုန်လိုက်ယုံခိုင်းတယ်။ နောက်ကျ အဲ့ကလေးတွေ တီထွင်နိုင်စွမ်းတွေ အတွေးသစ် အမြင်သစ်တွေ မရှိတော့ကြ သုံးစားမရဘူးဆိုပြီး သူများကလေးတွေနဲ့ ယှဉ်ပြီး နှိမ့်ချကြတယ်။

မြန်မာပြည်က မိဘတွေ ရုတ်တရက်ကြည့်လိုက်ရင် ကလေးတွေကို သိပ်ဂရုစိုက် သယောင် ချစ်သယောင်နဲ့ တကယ်က တစက်ကလေးမှ စိတ်မရှည်တဲ့ဟာတွေ။ စဉ်းစားကြည့် ကလေးဟာ ကလေးထမင်းစားငရင်ကြာလို့ ပေလို့ ပွလို့ ထမင်းမဝင်လို့ဆိုတဲ့ အကြောင်းပြချက်တွေနဲ့ တော်တော်ကြီးတဲ့ထိ ခွံကျွေးတယ်။ တကယ်က ကလေး ဟာ ကလေးလုပ်ရင် ကြာမယ့်အချိန်ကို သူတို့စိတ်မရှည်တာ။ ကလေးဟာ ကလေးကြယ်သီးတပ်ရင် ဖိနပ်ဝတ်ရင် ကြာတာကို မစောင့်နိုင်တော့ သူတို့အကုန်လုပ်ပေးတယ်။ အဲ့ကလေးတတ်ပါစေတော့ဆိုတဲ့ စေတနာမျိုးနဲ့ သည်းခံစောင့်ပေးတဲ့ မိဘအတော်ရှားပဲ။ ကလေးသူ့အရွယ်နဲ့သူ လုပ်သင့်တာတွေ အကုန်သူတို့ဝင်လုပ်တယ်။ ပြီးကျ သူများကလေးတတ်သလောက် မတတ်သေးရင် ကိုယ့်ကလေးကပဲ ဖွံဖြိုးမှုနောက်ကျနေသလို အချိုးနဲ့ ကလေးအပေါ် blame လုပ်တယ်။

တခါ ကိုယ့်ရှေ့မှာ ကိုယ့်တူလေး သူသောက် ထားတဲ့ ovatine ခွက်လေး ကလေးက နောက်ဖေးသွားထားတယ်။ ကျကွဲတာကို သူ့အဖွားရော အမေရော အစ်မရော အိမ်အကူရော ပြာပြာသလဲ အော်ကြီးဟစ်ကျယ်နဲ့ နင့်ဘယ်သူက ထားခိုင်းလဲ။ ဘယ်တုန်းက ကိုယ့်ဟာကိုယ်ထားရလို့လဲ။ အိမ်ဖော်လာသိမ်း မှာပေါ့ ဆိုပြီး ကမ္ဘာပျက်မတတ်အော်တာ။ ကျမတူလေးက မျက်ရည်လေးဝဲပြီး ကြောက်လို့ ကျမရှေ့လာရပ်တယ်။ ကျမတအားစိတ်မကောင်းဖြစ်သွားတယ်။

တကယ်ဆို ဒီခွက်ကွဲလို့ ကလေးရလိုက်သင့်တဲ့ သင်ခန်းစာက ဖန်ခွက်ဆိုတာ ကျရင်ကွဲတတ်တယ်။ သေချာကိုင်ရတယ်။ ကိုယ်သောက်ထားတာ ကိုယ်သိမ်းတာ သားတော်တယ်။ နောက်မကွဲအောင် သားဂရုစိုက်သယ်ရင်ရတယ်။ နောက်တခါ မကွဲဘူးလို့ မေမေယုံတယ် ဆိုတဲ့ သင်ခန်းစာမျိုးဖြစ်ခဲ့သင့်တာ။ ဒါပေမယ့် ကျမတူလေး ရလိုက် တဲ့ သင်ခန်းစာက သူ့ခွက်သူပြန်ထားတာ မှားတယ်။ ခွက်ကွဲတာဟာ အန္တရာယ်ရှိတယ်။ သူဟာ ခွက်တစ်ခွက်တောင် မကွဲအောင် မသယ်နိုင်တဲ့ ကလေးဖြစ်တယ်။ သူ့အလုပ်ကို အိမ်ဖော်လုပ်လို့ရတယ်ဆိုတဲ့ လူညွန့်တုံးစေမယ့် သင်ခန်းစာ မျိုးပဲ။ ကျမလဲ ကိုယ်ခဏရောက်နေတုန်း ဘာမှ မပြောချင်တာနဲ့ တူလေးကိုပဲ သားရေ ဘာမှမဖြစ်ပါဘူး။ သားမှာ အပြစ်မရှိဘူး။ သားမှန်တယ်လို့ တိုးတိုးလေးပြောပြီး ဖက်ထားပေးလိုက်တယ်။ သူ့မိဘတွေကိုတော့ တနေ့ငါ့တူလေးကို ကိုယ့်လမ်း ကိုယ်မဖောက်တတ်တဲ့သူ ကိုယ့်တာဝန်ကိုယ်မယူတတ်တဲ့သူလို့ ပြောလာရဲ ပြောကြည့်။ ဒီနေ့ကိစ္စကို ပြန်ပြောပြီး တွယ်ပြစ်မယ်လို့ကို တေးထားခဲ့တာ။

ပြီးတော့ ရှိသေးတယ်။ အထူးသဖြင့် လူနည်းစုဝင် မိသားစုတွေ မှာ အထူးသဖြင့် လူမျိုးစု ဘာသာရေးအရ လူနည်းစုတွေမှာ သားသမီးကို သူတို့ဘာသာထဲက လူ၊ လူမျိုးစုထဲက လူနဲ့ အတင်းအကျပ်ပေးစားတာ။ လူဆိုတာ ဘာသာတူ လူမျိုးတူချင်း လက်ထပ်တာ ပိုအဆင်ပြေမှန်း ကျမလက်ခံပါတယ်။

ဒါပေမယ့် ဘာသာတိုင်းမှာ လူမျိုးတိုင်းမှာ လူကောင်း နဲ့ လူယုတ်မာဆိုတာ ရှိတယ်လေ။ ဒါပေမယ့် လူတော်တော်များများက ကိုယ့်ဘာသာဝင်ထဲက ဖြစ်ရင်ပြီးရော ပေးစားကြတယ်။ အဲ့လို မိဘတွေဟာ သူတို့ဘာသာတရားက ပြထန်းထားတဲ့ ဥပဒေတွေကို သူတို့လိုက်နာဖို့သက်သက် သားသမီးဘဝကို နွံထဲစွဲနှစ်တယ့် မိဘတွေ လို့ ကျမတော့မြင်တယ်။ အိမ်ထောင်ရေးလို တစ်ဘဝလုံးသွားရမဲ့လမ်းမျိုးကိုတောင် သူတို့သဘောတူမှ သူတို့အလိုကျ လျောက်ခိုင်းတဲ့ မိဘမျိုးလောက် အတ္တကြီးတာ ရှိပါ့မလား။

ကောင်းစားစေချင်လို့ဆိုတဲ့ စကားလေးတခွန်းနဲ့ လူသားတစ်ယောက် ဘဝကို သူတို့စိတ်ကြိုက်ချယ်လှယ်တယ်။ အဲ့လူသားရဲ့ ဆုံးဖြတ်ပိုင်ခွင့်တွေ စဉ်းစားတွေးခေါ်နိုင်စွမ်းတွေ ဆင်ခြင်တုံတရားတွေကို အထင်သေးစွာနဲ့ လုယူတယ်။ ပြီးကျ မိဘဝတ်ကျေပြီဆိုပြီး ကြံဖန်ဂုဏ်ယူကြသေးတယ်။ တချို့မိဘဆို အဲ့နေရာမှာတောင် မရပ်သေးဘူး။ အိမ်ထောင်ရေးထဲ လင်မယားကြားဆက်ပါသေးတယ်။

အဲ့လိုမိဘတွေဟာ တကယ်တော့ သူတို့ဘဝ သူတို့ပျောက်နေတဲ့ မိဘတွေ။ သူတို့မွေးထားတဲ့ ကလေးတွေကို ကိုယ်ပိုင်ပစ္စည်းသဖွယ် သဘောထားရင်း ပြုမူရင်းကနေ သားသမီးရဲ့ဘဝထဲမှာ သူတို့ဘဝအဓိပ္ပါယ်ကို လာရှာနေကြတာ။ သားသမီးကို သူတို့အိမ်မက်တွေ အကောင်အထည်ဖော်ဖို့ အသုံးချနေတာ။ ဒါကြောင့်လဲ အဲ့လိုမိဘတွေဟာ ဆယ့်နှစ်ရာသီ မောပန်း ပင်ပန်းနေပြီး အသက်ငါးဆယ်လောက်ဆို သွေးတိုးတွေ ဆီးချိုတွေနဲ့သေတာပဲ။ သူတို့က ကိုယ့်အလုပ်တင်မကပဲ သူများဘဝ သူများအလုပ်တွေပါ နှစ်ဆဝင်လုပ်နေတော့ ပိုဝန်ပိပြီး စောစောသေတာပေါ့။

Mar Oo

Add a Comment

Your email address will not be published. Required fields are marked *

18 − 13 =