မြန်မာပြည်က အထွတ်အထိပ် ခေါင်းဆောင်ကြီး ဗိုလ်ချုပ်မှူးကြီး သန်းရွှေ ရဲ့ နာမည် သုံးပြီး လိမ်တဲ့ အွန်လိုင်းပေါ်က လိမ်လည်မှုကြီး

မြန်မာပြည်က အထွတ်အထိပ် ခေါင်းဆောင်ကြီး ဗိုလ်ချုပ်မှူးကြီး သန်းရွှေ ရဲ့ နာမည် သုံးပြီး လိမ်တဲ့ အွန်လိုင်းပေါ်က လိမ်လည်မှုကြီး

ယနေ့ ထိတိုင် အလိမ်ခံနေကြရ တဲ့ လွန်ခဲ့သော နှစ်ပေါင်း ( ၂၂၀ ) ကျော် ကတည်း က လိမ်စား လာ တဲ့ လိမ်နည်း…

လွန်ခဲ့တဲ့ နှစ်အတော်ကြာက မနက်အိပ်ရာ နိုးတာ နဲ့ ထုံးစံအတိုင်း ကွန်ပျူတာ ရှေ့မှာ ကော်ဖီပူပူလေးတစ်ခွက် နဲ့ အီးမေးလ်တွေ စစ်နေပါတယ် ၊ အံ့အားသင့်စရာ အီးမေးလ်တစ်စောင် တွေ့လိုက် လို့ လက်ထဲက ကော်ဖီခွက် လွတ်ကျမတတ် တုန်လှုပ်သွား မိတယ်။ ဘယ်သူ့ဆီက အီးမေးလ်ထင်သလဲ။ ဗိုလ်ချုပ်မှူးကြီး သန်းရွှေ ရဲ့ ချစ်သမီးလေးဆီ ကပါခင်ဗျာ ။

အင်္ဂလိပ်ဘာသာ အီးမေးလ်မှာ နိဒါန်းပျိုး သူ့ကိုယ်သူ မိတ်ဆက်ထား တာကတော့ သူဟာ အရှေ့တောင် အာရှ မြန်မာပြည်က အထွတ်အထိပ် ခေါင်းဆောင်ကြီး ဖြစ်တဲ့ ဗိုလ်ချုပ်မှူးကြီး သန်းေ ရွှရဲ့ အငယ်ဆုံးသမီး တီနာရွှေ ဖြစ်ပါသတဲ့။ ဟင်… စိန်စီသောညဆိုပြီး ပွက်လောထအောင် မင်္ဂလာပွဲကြီး ဆင်နွှဲခဲ့တာ သန္တာရွှေ မဟုတ်လား။ အခု ဘယ်က တီနာရွှေလဲ။ သူက ဒီလို ဆက်ရှင်း ထားတယ်။

Senior General ကြီးဟာ မြန်မာပြည် မှာ အလှဆုံး ဖက်ရှင်မော်ဒယ်လ် ရုပ်ရှင်မင်းသမီးဖြစ်တဲ့ သူ့မိခင် နဲ့ တိတ်တိတ်ပုန်း ညားပြီး သူ့ကို မွေးဖွားခဲ့တာ ဆိုပဲ ။ ကျနော်လည်း ခွေးဘီလူးကြီး ရဲ့ ဘယ်သူမှ မသိသေး တဲ့ အရှုပ်တော်ပုံတော့ ပေါ်လာပြီဆိုပြီး မျက်လုံးပြူးမျက်ဆန်ပြူး ဆက်ဖတ်ကြည့်မိတယ်။ သူ့နာမည်ကတော့ Tina Shwe ဖြစ်ပြီး အပြင်လူတွေ မသိပေမဲ့ ဖခင် ဗိုလ်ချုပ်မှူးကြီးက တုန်နေအောင် ချစ်တယ် ။ အခု အသက် ၁၉ နှစ်ရှိပြီး ဖက်ရှင် ဒီဇိုင်းပညာသင်တန်း တက်နေဆဲ ချစ်သူရည်းစားလည်း မရှိသေးပါဘူးတဲ့။

အင်း… ခွေးဘီလူးကြီးရဲ့ သမီးတွေ တစ်ယောက် မှ ပုံမလာဘဲ စိတ်ပျက်ရွံရှာစရာ ရုပ်ကြီးတွေချည်းပဲ။ ဟောဒီ တီနာရွှေတစ်ယောက်တော့ အမေက ရုပ်ရှင်မင်းသမီးဆိုရင် ငယ်ငယ်ချောချောလေးများလား၊ ရင်တွေတောင် ခုန်လာတယ်။

ဆက်ဖတ်ကြည့်တဲ့ အခါ၊ သူ့ဖခင်ဟာ အာဏာလက်လွတ် ဖြစ်သွား ပြီးတဲ့နောက် အပြင်ကို လုံးဝမထွက်တော့ဘဲ နေပြည်တော်က မြေအောက်လိုဏ်ခေါင်း စံအိမ်တော်ကြီးထဲမှာ အစောင့် အထပ်ထပ် နဲ့ ခိုအောင်းနေထိုင်နေတဲ့အကြောင်း၊ သူ့မှာ ဖခင်နဲ့လည်း တွေ့ခွင့်မရတော့ဘဲ ဖခင်အမွေပေးထားတဲ့ ဒေါ်လာ ၇၂၈ သန်းနဲ့ ဘယ်ဆီပြေးလို့ ပုန်းရှောင်ရမလဲ ရတက်ပွေကာ အခက်တွေ ကြုံနေရပါကြောင်း ဖွဲ့ဖွဲ့နွဲ့နွဲ့ ရေးထား တယ်။

စိတ်ပူပန်သောက ဖိစီးနေ တဲ့ သူ့မိခင်ဟာလည်း အိပ်မပျော်နိုင်လို့ အိပ်ဆေးတွေ သောက်ရင်း လွန်ခဲ့တဲ့ ၆ လတုန်းက အိပ်ဆေးလွန်ကာ ကွယ်လွန်သွားရှာရောတဲ့။

တစ်ကောင်ကြွက် သမီးလေးခမျာ ကြံရာမရလို့ အွန်လိုင်းဆွေးနွေးပွဲတစ်ခုမှာ ကျနော့အီးမေးလ်လိပ်စာကို အမှတ်မထင်ရပြီး အားကိုးတကြီး အကူအညီတောင်းလိုက်ရတာ ဖြစ်ပါတယ်တဲ့။ သူဟာ မြန်မာပြည်တွင်း မှာ အသက် အန္တရာယ်ဖြစ်နိုင်တာကြောင့် နယ်စပ်ကတဆင့် တခြားနိုင်ငံကို ထွက်ပြေးဖို့ ကြံစည်နေတဲ့အတွက် သူ့ရဲ့ ဒေါ်လာ ၇၂၈ သန်းကို ပြည်ပဘဏ်စာရင်းထဲ တိတ်တဆိတ် ကြိုတင်လွှဲပေးဖို့ စိတ်ချရသူ တစ်ယောက် ကို လိုက်ရှာနေတာလို့ ပြောတယ် ။ ကျနော့ ရဲ့ ဓာတ်ပုံထဲမှာ ချောမောခန့်ညား တည်ကြည်တဲ့ ဥပဓိရုပ်ကို မြင်လိုက်တာ နဲ့ ယောက်ျားကောင်း တစ်ယောက်မှန်း အကဲခတ်မိတယ် လို့ ဆိုပါတယ်။ (သူပြောတာ ဟုတ်မှာပါ။)

ဒါကြောင့် ကျနော့ ရဲ့ ဘဏ်စာရင်းထဲ ကို ဒေါ်လာ ၇၂၈ သန်း လွှဲပြောင်းပေးတာ လက်ခံပြီး ပြည်ပကို သူရောက်လာတဲ့ အထိ ခေတ္တထိန်းသိမ်းစောင့်ရှောက်ပေးနိုင်မလား လို့ မေးရတာပါတဲ့ ။ ခုလို ဆောင်ရွက်ပေးရတဲ့အတွက် ၁၀ ရာခိုင်နှုန်း အကျိုးခံစားခွင့် အပြင် အထွေထွေစရိတ် အဖြစ် နောက်ထပ် ၃ သန်း စုစုပေါင်း ၇၅.၈ သန်း ပေးပါမယ် လို့ သူကတိပြုကြောင်း ရေးထားတယ်။

နယ်စပ်ကတဆင့် နိုင်ငံခြားတိုင်းပြည်တစ်ခုခုကို သူရောက်လာတဲ့ အခါ ကျန်တဲ့ ၆၅၂.၂ သန်းကို ပြန်ပေးဖို့ ကတိသစ္စာ ပြုရမယ်လို့ သေသေချာချာ ရေးထားတယ်။

အလွန်အရေးကြီးတဲ့အချက်က ငွေလွှဲပေးရမယ့် ကျနော့ ဘဏ်စာရင်းနံပါတ် အလွဲအမှား မရှိအောင်နဲ့ ယုံကြည် စိတ်ချမှု ရှိမရှိ သေချာစေဖို့ ကျနော်အသုံးပြုမယ့် ဘဏ်စာရင်းကနေ အင်္ဂလန်က ဘဏ်စာရင်းတစ်ခုထဲကို ဒေါ်လာ ၂၅၀၀ အစမ်းပို့ပေးပါလို့ တောင်း ဆိုထားတယ် ။

ကျနော်ရရှိမယ့် ၇၅.၈ သန်းနဲ့ နှိုင်းစာ ရင် ဒေါ်လာ ၂၅၀၀ ဟာ မပြောပလောက်တဲ့ အသေးအဖွဲလေး ဖြစ်လို့ အမြန်ဆုံး လုပ်ငန်း စဖို့ တိုက်တွန်းတယ်။ သူ့မှာ အချိန်မရွေး ဘေးအန္တရာယ်ကျရောက်နိုင်တဲ့အတွက် ကျနော် နဲ့ အဆင်မပြေရင် တခြားလူတစ်ယောက် ကို ဆက်သွယ်ရမှာ မို့ ၄၈ နာရီ အတွင်း အကြောင်းပြန် ပါတဲ့ဗျာ။

အောင်မငီး… ရင်တွေခုန်လိုက်တာနော်။ နေရင်းထိုင်ရင်း ဒေါ်လာ ၇၅ သန်းကျော် ထီပေါက်တာ ပါလား။ တကယ်လို့ ချစ်သူရည်းစား မရှိသေးတဲ့ တီနာရွှေသာ အမေတူ ချောခချာလှလှလေးဆိုရင် ဖူးစာဆုံရွှေလက်တွဲလို့ ဒေါ်လာ ၇၂၈ သန်းနဲ့ တူနှစ်ကိုယ် ဘဝတစ်ခု ထူထောင်ကြမယ်လေ။ စိတ်ယုတ်မာမွေးပြီး တစ်ကိုယ်ကောင်းကြံမယ်ဆိုရင် တီနာရွှေကို ခေါက်ထားပြီး ကိုယ့်ဘဏ်ထဲ ရောက်လာတဲ့ ပိုက်ဆံအားလုံး ဝိုက်လိုက်လို့လည်း ရသေးတယ်။

အိုးဟိုးဟိုး… ကျနော် ဒီလောက် ဘယ် အ ပါမလဲဗျာ။ ဒီလိုမျိုးဇာတ်လမ်းတွေ နဲ့ လိမ်စားလာတာ ပြင်သစ်တော်လှန်ရေးခေတ် လွန်ခဲ့တဲ့ နှစ် ၂၂၀ ကျော်ကတည်းကပါ။ တကယ်လို့သာ ယုံကြည်မိပြီး ဒေါ်လာ ၂၅၀၀ အရင်လွှဲပေးလိုက်ရင် ပလုံကနဲတောင် အသံမမြည်ဘဲ ဆုံးပြီပေါ့ ။

၁၇၈၉ ကနေ ၁၇၉၉ ခုနှစ် အထိ ဖြစ်ပွားခဲ့တဲ့ ပြင်သစ်တော်လှန်ရေးကြီးကတည်းက လိမ်နည်းပဲ။ မြန်မာပြည်မှာ ဘိုးတော်ဘုရားခေတ်ပေါ့။ နောက်တာမဟုတ်ဘူး၊ တကယ်ဘိုးတော် ဘုရား လက်ထက်ပါ။

ပြင်သစ်ဘုရင်၊ မိဖုရားနဲ့ မင်းဆွေမင်းမျိုး၊ မှူးမတ်တွေကို ခေါင်းဖြတ်စက်နဲ့ ကွပ်မျက်ပစ်တဲ့ တော်လှန်ရေးကြီးမှာ ထွက်ပြေးခဲ့ရတဲ့ ပြင်သစ် မင်းညီမင်းသား တစ်ယောက်က သူ့ရဲ့ ရွှေငွေရတနာသေတ္တာတွေ ကို အခုလောလောဆယ် သယ်မပြေးနိုင် လို့ ခဏအပ်ထားပါရစေ ၊ ပြေးရင်းလွှားရင်း သယ်စရာ လှည်းခမရှိသေးလို့ ယခုစာယူလာသူ လှည်းသမားကို အသပြာ ဒင်္ဂါး ၁၀၀ လောက် ခဏစိုက်ပေးပါ လို့ တောင်းတဲ့ ဇာတ်လမ်းပါ ပဲ။ အပ်ထားတဲ့ ရတနာသေတ္တာတွေ ရောက်လာတဲ့ အချိန်ကျမှ ဘယ်ရွေ့ဘယ်မျှ ဝေစုယူပါပေါ့လေ ။

အောင်မယ်လေး၊ အလိမ်ခံရသူတွေ ဒုနဲ့ဒေး အများကြီးပဲပေါ့။ အဲဒီခေတ် ကစပြီး ဒီနည်းကို ပုံစံအမျိုးမျိုး ဆန်းသစ်ပြီး လိမ်စားလာကြတာ ပါ။ လွန်ခဲ့တဲ့ နှစ်တစ်ရာကျော်လောက် မှာတော့ နိုင်ဂျီးရီးယားမင်းသား သဝဏ်လွှာလို့ ခေါ်ကြပါတယ်။

အာဖရိကတိုက် နိုင်ဂျီးရီးယားနိုင်ငံက မင်းညီမင်းသားတစ်ပါး ဒီလိုအခက်အခဲကြုံလို့ အကူအညီတောင်းတဲ့ စာကို လက်နှိပ်စက်နဲ့ သေသေသပ်သပ်ရိုက်ပြီး အာဖရိကတံဆိပ်ခေါင်းနဲ့ စာတိုက်က ပို့လာတော့လည်း ယုံကြည်ပြီး အလိမ်ခံရသူ အများကြီးတဲ့။

အခုအင်တာနက်ခေတ် မှာလည်း နိုင်ဂျီရီးယားကစာ (Nigerian Letter) လို့ ခေါ်ကြတဲ့ အီးမေးလ်တွေ ပို့ပြီး ဒီနည်းအတိုင်း လိမ်ကြတာပဲ ။ ဒီလိမ်လည်နည်းက အလွန်ကျော်ကြားတာကြောင့် နိုင်ဂျီးရီးယား ရဲတပ်ဖွဲ့က အထူးစုံစမ်းရေးဌာနတစ်ခုတောင် ဖွင့်ပေးထား ရတယ်။ အင်္ဂလိပ်ကိုလိုနီ ဖြစ်ဖူးတဲ့ နိုင်ဂျီးရီးယားရဲ့ လိမ်လည်မှု ဥပဒေပုဒ်မ ၄၁၉ ကို အစွဲပြုပြီး 419 (ဖိုးနိုင်တင်း) အမှုလို့လည်း ခေါ်ကြတယ်။ မြန်မာဥပဒေအတိုင်းဆို ဖိုးတွမ်တီးပေါ့လေ။

နိုင်ဂျီးရီးယားကစာ လိမ်လည်နည်းဆိုပေမဲ့ ခုနောက်ပိုင်းမှာ လူလိမ် အများစုဟာ ဗြိတိန်နဲ့ အမေရိကားက ဖြစ်ပါသတဲ့ ။ လိမ်လည်မှုတွေ ရဲ့ ၆ ရာခိုင်နှုန်းသာ နိုင်ဂျီးရီးယားက ဖြစ်ပြီး ကျန်တာက တခြားနိုင်ငံတွေကတဆင့် လိမ်လည်တာပါ။ နိုင်ဂျီးရီးယားအီးမေးလ်ဆိုရင် လိမ်တာမှန်း လူအတော်များများ သိလာတဲ့အခါ ပုံစံပြောင်းလဲဆန်းသစ် လာတယ်။

လူတိုင်းသိ နာမည်ကျော်အာဏာရှင်ကြီး တစ်ယောက်ယောက် ရဲ့ နာမည်သုံးပြီး သူ့သားသမီးအယောင်ဆောင်တာမျိုးပေါ့ ။ ကဒါဖီ၊ ဆက်ဒမ်ဟူစိန်၊ မူဂါဘီတို့အပြင် ကျနော်ရခဲ့တဲ့ အီးမေးလ် လို ဗိုလ်ချုပ်မှူးကြီး သန်းရွှေရဲ့ တိတ်တိတ်ပုန်းသမီး တီနာရွှေတို့လည်း ပါတာပေါ့။ (ပို့သူက ကျနော် မြန်မာမှန်းမသိဘဲ ရမ်းသမ်းအားလုံးကို လျှောက်ပို့တာ ထင်တယ် ။ အဲဒီအီးမေးလ်ရတုန်းက မိတ်ဆွေ သူငယ်ချင်း တွေပြပြီး ရယ်ကြတယ် ။ ပြီးတော့ ဘယ်မှာ သိမ်းမိမှန်းမသိဘူး ၊ ခုရှာကြည့်တာ မတွေ့သေးဘူး။ တွေ့ရင်ပြမယ်။)

ဒီလိမ်နည်းမှာ အရင် တုန်းကတော့ ငွေကြေးပမာဏ အများကြီးနဲ့ ဆွဲဆောင်ကြတယ်။ ဒါမှ ခွဲပေးတဲ့ ဝေစု ရာခိုင်နှုန်းနည်းပေမဲ့ မက်မောလောက်အောင် ရနိုင်တာပေါ့။ ဒေါ်လာ ၁၀ သန်းကို ရက်ရက်ရောရောကြီး တစ်ဝက်ခွဲပေးမ ယ်ဆိုရင် အလိမ်ခံရတဲ့သူက ယုံမှာ မဟုတ်ဘူး ။ ဒါပေမဲ့၊ သန်း ၁၀၀ ရဲ့ ၁၀ ရာခိုင်နှုန်းဆိုရင် ယုတ္တိလည်းရှိ ဝေစုပမာဏလည်း များတယ်လေ ။

နောက်ပိုင်းတော့ ငွေကြေးအပြင် ငယ်ရွယ်ချောမောပြီး အားကိုးရာမဲ့နေ တဲ့ မင်းသမီး၊ မင်းသားလေးပါ ဇာတ်လမ်းထဲ ထည့်လာတယ်။ ငွေနဲ့ သာမက ဖွန်နဲ့ပါ မျှားတာမို့ ထောင်ချောက် မိသူတွေ အများကြီး တိုးလာတာပေါ့။ ကမ္ဘာပေါ်မှာ ဒီနည်းနဲ့ အလိမ်ခံရတဲ့ ငွေပမာဏ တစ်နှစ်ကို ဒေါ်လာ သန်းရာချီတယ်လို့ သိရပါတယ်။

ပိုပြီး အံ့ဩစရာကောင်းတာက အလိမ်ခံရသူ အများစုဟာ ဗြိတိန် နဲ့ အမေရိကားလို ချမ်းသာဖွံ့ဖြိုးတဲ့ နိုင်ငံကလူတွေ ဖြစ်ပါ သတဲ့။ ခေတ်မီနိုင်ငံတွေမှာ ယုံတဲ့လူတွေ ရှိမှရှိပါ့မလားလို့ မထင် လိုက်ပါနဲ့။ တစ်ထောင်မှာ တစ်ယောက် ထူတဲ့ပိန်းတဲ့ သားကောင်တွေ ပေါမှပေါ ။ လိမ်တဲ့သူက ဘာမှအရင်းစိုက်ရတာ မဟုတ်ဘဲ အီးမေးလ်တွေ လျှောက်ဖြန့်နေရုံပဲလေ။ ငါးမျှားသလို တစ်ကောင်မှ မရလည်း ရေချိုးပြီး ပြန်ရုံပဲ ။ မိတော့လည်း ဆူဆူဖြိုးဖြိုးစားရတာပေါ့။

မှုခင်း ပညာရှင်တွေကတော့ ဒီနည်းကို ကြိုတင်အခကြေးငွေယူတဲ့ advance-fee scam လိမ်နည်း အမျိုးအစားထဲမှာ စာရင်းသွင်းထားပါတယ်။ အများဆုံးတွေ့ရလေ့ ရှိတဲ့ လိမ်နည်းအမျိုးအစား ဖြစ်ပါတယ်။ ရရှိမယ့် ငွေကြေးပမာဏအများကြီး ကို မက်မောလောက်အောင် ပြပြီး၊ ဒီငွေရဖို့ ကြိုတင်ငွေနည်းနည်း အရင်သွင်းပါဆိုတဲ့ လိမ်လည်နည်းပါ။

တခြားနိုင်ငံမှာနေပြီး အပြင်မှာ လူချင်းမမြင်ဖူးတဲ့ အွန်လိုင်းမိတ်ဆွေ၊ ချစ်သူရည်းစားက အဖိုးတန် လက်ဆောင်ပစ္စည်းတွေ ပို့လိုက်မယ် လို့ မစားရဝခမန်း ပစ္စည်း ဓာတ်ပုံတွေ အင်တာနက်မှာ ပြပြီး၊ ရက်နည်းနည်းကြာတော့ အခုလေဆိပ်သိုလှောင်ခန်း မှာ ပါဆယ်သေတ္တာ ရောက်နေပါပြီ၊ ထုတ်ယူနိုင်အောင် လိုင်းကြေးနဲ့ အကောက်ခွန်ကျပ် တစ်သိန်းခွဲ အရင်ပေးဖို့ လာတောင်း တာမျိုး ကြားဖူးတယ်မဟုတ်လား။

နောက်ထပ် ဥပမာအနေနဲ့၊ အခု မြန်မာပြည် မှာ နိုင်ငံတော်သမ္မတကြီး ဦးဝင်းမြင့်နဲ့ နိုင်ငံတော် အတိုင်ပင်ခံ ဒေါ်အောင်ဆန်းစုကြည်ရဲ့ နာမည်ကို သုံးပြီး လိမ်ဖို့ ကြိုးစားနေတဲ့အမှုတစ်ခု ရှိပါတယ်။ ဦးဝင်းမြင့်နဲ့ ဒေါ်အောင်ဆန်းစုကြည်တို့ရဲ့ ညွှန်ကြားချက်အရ အစိုးရက နိုင်ငံသားတွေကို ထောက်ပံ့ကြေးပေးဖို့ အစီအစဉ်အနေနဲ့ ကျပ် ၁၇၅ သိန်းကို မြန်မာ့စီးပွားရေးဘဏ်မှာ ထုတ်ယူနိုင်အောင် စီစဉ်ထားပြီး ဖြစ်ကြောင်း ဘဏ်တာဝန်ခံ အရာရှိကြီး အယောင်ဆောင်ပြီး ဖုန်းဆက်အကြောင်းကြားလာလိမ့်မယ်။ ပြီးတော့မှ ဒီ ၁၇၅ သိန်းကို ရရှိဖို့အတွက် ပထမဦးဆုံး ငွေပေါင်အဖြစ် ကျပ် ၃ သိန်းခွဲကို Wave Money နဲ့ လွှဲပေးပါလို့ “ကြိုတင်ငွေ” တောင်းယူတာပါ ။

ဒါကြောင့် ငွေကြေး၊ အကျိုးအမြတ် ၊ အခွင့်အရေးတစ်ခုရဖို့အတွက် ဘယ်သောအခါမှ ကြိုတင်ငွေ မပေးမိပါစေနဲ့လို့ မှုခင်းပညာရှင်တွေက သတိ ပေးပါတယ်။

မြန်မာနိုင်ငံမှာ လောလောဆယ် အားနည်းချက်ကတော့ လက်ကိုင်ဖုန်းအတော်များများဟာ စနစ်တကျ မှတ်ပုံတင်မထားလို့ ပိုင်ရှင်အမှန်မသိနိုင်တာ ဖြစ်ပါတယ်။ ဒါကြောင့် လက်ကိုင်ဖုန်းနံပါတ်တစ်ခုကို ငွေလွှဲပေး လိုက်မိရင် တရားခံရှာလို့ မရတော့ဘူး။ ဒီအားနည်းချက် ကို အခွင့်ကောင်းယူ လို့ရနေတာကြောင့် လူလိမ်တွေ ပိုပြီးအတင့်ရဲ သောင်းကျန်းနေတာပါ ။

အကောင်းဆုံးကာကွယ်နည်းကတော့ ကိုယ့် ရဲ့ အီးမေးလ်လိပ်စာ၊ ဖုန်းနံပါတ်တွေကို မသမာသူတွေ မသိအောင် လျှို့ဝှက်ထားဖို့ ဖြစ်ပါတယ်။ အိုး… ဒီလောက်မအပါဘူး။ ဘယ်ပေးမလဲလို့ မထင်လိုက်နဲ့။ မသိအောင် ယူနိုင်တဲ့ နည်းလမ်းတွေ အများကြီး ရှိတယ်။

အင်တာနက်ပေါ်မှာ၊ ဖေ့စ်ဘွတ်ခ်၊ အင်စတာဂရမ်မှာ ကစားနည်းလေးတွေ app တွေ ရှိတယ်လေ ။ အရိုးဆုံးက တစ်ပတ်စာ ဗေဒင်ဟောကိန်း၊ သင့်ဖူးစာရှင် ဘယ်သူလဲဆိုပြီး မင်းသား၊ မင်းသမီး၊ အဆိုတော်၊ ဆယ်လီတွေနဲ့ အပျော်တွဲပေးတာမျိုး၊ သင့်ကို ကြိတ်ပြီးကြွေနေ သူကတော့…ဆိုတာမျိုး ကစားနည်းလေးတွေမှာ ကိုယ့်ရဲ့ အီးမေးလ်၊ ဖေ့စ်ဘွတ်ခ် ပရိုဖိုင်းလ်စတာတွေ ပေးလိုက်ရင် အပျော်ဝင်ဆော့လို့ရတယ်။ ဒါပေမဲ့၊ စပြီး ဝင်တော့မယ် ဆိုတာ နဲ့ “သင့်ပရိုဖိုင်းလ်ထဲက သင့် အီးမေးလ်နဲ့ friend list ကို ယူပါမည်၊ သဘော တူပါသလား ” ဆိုတဲ့ စာတမ်းလေး ဖျတ်က နဲ ပေါ်လာပြီး Yes or No ဆိုရင် လူအများစုက မစဉ်းမစား ယက်လိုက်တာပဲ။ အဲဒီမှာ ပါသွားပါလေရော။

ကိုယ့်အီးမေးလ် ၊ ဖုန်းနံပါတ်၊ မိတ်ဆွေစာရင်းကို ယူသွားသူက လူလိမ် ဟုတ်ချင်မှ ဟုတ်ပါလိမ့်မယ်။ သူက တခြားလူတွေကို ဒီအချက်အလက်တွေ တဆင့်ပြန် ရောင်းစားတဲ့အခါ မသမာသူတွေ လက်ထဲ ရောက်သွားနိုင် တာပေါ့။ ပြီးခဲ့တဲ့ အမေရိကန်သမ္မတရွေးကောက်ပွဲမှာတောင် ရုရှားထောက်လှမ်းရေးက ဒီနည်းသုံးပြီး ဝင်ရောက်စွက်ဖက်ခဲ့တယ်လို့ အမေရိကန်က စွပ်စွဲအရေးယူခဲ့ ရပါတယ် ။ ဖေ့စ်ဘွတ်ခ် စီအီးအို မတ်ခ် ဇတ်ကာဘတ် အမေရိကန် လွှတ်တော် မှာ အစစ်ဆေးခံရပြီး၊ ရုရှားထောက်လှမ်းရေးအရာရှိတွေကို အမေရိကန်က အပြစ်ဒဏ်ပေး ခဲ့တဲ့ ကမ္ဘာကျော်အမှုပါ ။

နိုင်ငံအစိုးရတွေကအစ၊ အွန်လိုင်း လူလိမ်တွေအထိ အလွဲသုံးစားလုပ်နိုင်တဲ့ အီးမေးလ်၊ ဖုန်းနံပါတ်တွေ မပေါက်ကြားအောင် သတိ ရှိရှိ လျှို့ဝှက်ကြဖို့ အလွန်အရေးကြီး ပါတယ်။ ဒါကြောင့် စောစောက ပြောခဲ့တဲ့ အပျော်ဂိမ်းတွေ ကို ကျနော် ဘယ်သော အခါမှ ဝင်မဆော့ပါဘူး ။ ကိုယ်သာမက ကိုယ့်မိတ်ဆွေစာရင်းထဲကသူတွေပါ မတော်တဆ ထိခိုက်နစ်နာသွား မှာ စိုးရိမ်လို့ပါ။

ဒီလောက် သတိထား တဲ့ကြားက ကျနော့အီးမေးလ်လိပ်စာကို ဗိုလ်ချုပ်မှူးကြီးရဲ့ သမီးချောလေး တီနာရွှေ ဘယ်လိုရသွားသလဲ မပြောတတ်ပါဘူးဗျာ။

မင်းမြတ်မောင်

Add a Comment

Your email address will not be published. Required fields are marked *

19 + fifteen =