ကိုယ်ရံတော် ရဲ့ “သေတမ်းစာ”

အမိန့်တော်မပြန်လိုက် ပါနဲ့အမေ..စိုးရိမ်ကြောင့်ကျစိတ်မချသမို့၊အမေ့အပါးကဖဝါးထက်ချပ်၊အရိပ်လိုလိုက်ကပ်ပြီးစောင့်ရှောက်၊ကျီးကန်းတောင်းမှောက်သဏ္ဌန်၊ရန်အန္တရာယ်ကိုဖယ်ခွာချင်လွန်းလို့ပါ။

အမေ့ထံပါးမှာတာဝန်ကျေတဲ့၊ ကျွန်တော်ပင်ပန်းခဲ့သမျှကိုသိသမို့၊နားပါစေတော့ရယ်လို့အကြင်နာပို၊အဝေးကိုမနှင်လိုက်ပါနဲ့အမေ…အမေ့ဘေးကအတူယှဉ်၊ ခရီးမနှင်ဝံ့ပေမဲ့၊ နေပူချိန်မှာအမေ့ကိုအရိပ်ကာစေချင်၊မိုးရွာရင်ထီးတော်မိုး၊ရိုကျိုးစွာဖိနပ်ကိုင်၊တတ်နိုင်ရင်တော့အမေ့ခြေဖဝါး အရာလေးတွေကိုတခုစီကောက်၊ပန်းလို သီကာလည်မှာဆွဲ၊လေးစားသမှုနဲ့သိမ်းဆည်းမှာဘဲအမေ။

ကံကြမ္မာရဟတ်ခြား၊တိမ်းပါးသွားလို့ခွဲခွာ၊ အသည်းနာပေမဲ့၊ ဝိဉာဉ်ဘဝ၊ဘယ်မှမသွားချင်၊နတ်ပြည်ကိုလဲမနှင်လိုက်ပါနဲ့အမေ….နတ်တို့ရဲ့ကမ္မစိတ္တိ၊တန်ခိုးသတ္တိရှိရ်တော့၊ဝမ်းသာအားရနဲ့အမေ့ဘေးနားမှာ ပိုမိုစောင့်ရှောက်၊ရန်မျိုးစုံရှင်းပျောက်အောင်၊ထွင်းဖောက်နိုင်စွမ်း ရှိချင်လှတယ်အမေ။

အမေ့ကိုယုံကြည်လေးစားဗုဒ္ဓတရားတွေ ဦးထိပ် ထားသမို့….အနိစ္စ၊ ဒုက္ခ၊အနတ္တ၊ရှောင်လွှဲမရတာသိသလို၊ပါရမီဖြည့်ဖက်ဆိုတာ၊ ရှင်အညနန္ဒာနဲ့ဆန္ဒအမတ်၊သူ့အတတ်နဲ့သူပညာ၊ အဆင့်တွေကွာပေမဲ့၊ ဗုဒ္ဓကိုချစ်တဲ့အရာမှာတော့ ပမာဏတူပါတယ်အမေ။

တသံသရာလုံး၊အမေ့ကိုပါရမီဖြည့်ပြီး ၊ပြုစုလုပ်ကျွေးနိုင်သူ ရဲ့ဘဝ၊အမြဲရပါရစေလို့ ဆုတောင်းရင်း..နှုတ်မဆက်လက်မပြ၊ ကျွန်တော်ထွက်ခွာမသွားပါရစေနဲ့…အရိပ်ပမာ ဝိဉာဉ်ဘဝနဲ့ခစားပါရစေအမေ။ ။

@Nilar Mya Thwe

Add a Comment

Your email address will not be published. Required fields are marked *

18 − three =