မိဘနှစ်​ပါး မျက်ရည်ကျ အံ့အားသင့် သွားရလောက်တဲ့ ထိ တန်ဖိုးကြီး လက်ဆောင်တွေ နဲ့ suprise လုပ်လိုက်တဲ့ ပိုင်တံခွန်

မင်းသားချော ပိုင်တံခွန်ကတော့ ဆယ်ကျော်သက်အရွယ် ပျိုပျိုမေလေးတွေ ကြားမှာ သည်းသည်းလှုပ် ရေပန်းစားအောင်မြင်နေတဲ့ အနုပညာရှင်တစ်ဦး ဖြစ်ပါတယ်။ ခဏလေးအတွင်းမှာ လူသိများအောင်မြင်လာတဲ့ ပိုင်တံခွန်က အခုဆိုရင် ရုပ်ရှင်ဇာတ်ကားကြီးတွေနဲ့ သီချင်းဗီဒီယိုတွေ ဆက်တိုက်ရိုက်ကူးနေရတာ ဖြစ်ပါတယ်။ တစ်ချက်ပြုံး လိုက်တိုင်း ပျိုပျိုမေလေးတွေရဲ့ ရင်ခုန်သံတွေကို မြန်ဆန်စေနိုင်ခဲ့သူလေးလည်းဖြစ်ပါတယ်။

ပိုင်တံခွန်ကတော့ အနုပညာလှုပ်ရှားမှု ပုံရိပ်များကို သူရဲ့ဖေ့ဘွတ်စာမျက်နှာပေါ်တွင် ဖော်ပြလေ့ရှိတာလည်းတွေ့ရပါတယ်။အလုပ်တွေကြိုးစားသလို မိဘပေါ်သိတတ်တဲ့ ပိုင်တံခွန်ကတော့ အခုလည်း သူရဲ့ အနုပညာကြေးလေးနဲ့ မိဘနှစ်ပါးအတွက် အိမ်အသစ်တစ်လုံးနဲ့ ကားတစ်စီးကို suprise လုပ်ကာ လက်ဆောင်လေးပေးခဲ့ကြောင်း ဖော်ပြ ထားတာတွေ့ရပါတယ်။ပုံလေးတွေနဲ့အတူ “ကျနော့်ရဲ့ ကံကောင်းခြင်းတွေက မိဘ ကို ကျွေးမွေးပြုစုခြင်းက လာတာပါ ဒီနေ့ အိမ်သစ်‌လေးတစ်လုံး နဲ့ ကား တစ်စင်း ကို အဖေ အမေ အတွက် ကျနော် လက်ဆောင်ဝယ်ပေးဖြစ်တာပါ Surprise လုပ်ဖို့ အမျိုးမျိုးလိမ်ပြီးခေါ်ခဲ့ရတယ် နောက်ဆုံးတော့ အဖေလည်း ငို အမေလည်း ငို ကျနော်လည်း ပီတိ ဖြစ်ရ ဒါက ကျနော့်ဘဝအကြောင်းလေး

တချို့သိချင်ကြတဲ့ သူတွေအတွက်ပါ ။ ဘယ်အရာ မှ ဖုံးကွယ်လို့ မရပါဘူးကျနော် ကြိုးစားခဲ့တဲ့ ဘဝ အကျဉ်းလေး ပြောပြမယ်နော်ကျနော်မှာ မောင်နှမ 6 ယောက်ရှိတယ်။ကျနော်က ၄ယောက် မြောက်သားငယ်စဉ်က ကျနော့ မိဘတွေ ငွေကြေး ပြည့်စုံတော့ဘယ်နေရာရောက်ရောက် ကျနော်တို့ မောင်နှမတွေ မျက်နှာတချက် မငယ်ခဲ့ရဖူးဘူး ဘဝ တကွေ့မှာ ကျနော် ဆယ်တန်းဖြေပြီးခါစအချိန်ပေါ့ ကျနော့်မိဘတွေ ဘာဆိုဘာမှ မရှိအောင်ကို ဆင်းရဲ အတိ ဖြစ်ခဲ့ရတယ်။

ဒါပေမယ့် အဖေအမေရဲ့ သားသမီးအပေါ်ထားတဲ့ မေတ္တာက ကျနော် တို့အတွက် ဆင်းရဲဒုက္ခဆိုတာ ဘာမှန်းမသိအောင် ကာကွယ်ပေးခဲ့တယ်။အဲဒီအချိန်က ကျနော်တို့ ရန်ကုန် စပြီးပြောင်းလာတဲ့အချိန် ။
ကျ‌နော်ကိုမွေးတဲ့အချိန်ကတည်းက အလုပ်သမားများစွာ နဲ့ ပြည့်ပြည့် စုံစုံ နေ ‌ခဲ့ရတဲ့ ကျနော့် ရဲ့အဖေ နဲ့ အမေ ကျောက်မြောင်းမှာ တိုက်ခန်းလေးငှားပြီး သုခလမ်းက တိုက်အောက်‌လေး မှာ ဒီ သားသမီး ၆ယောက် စားဝတ်နေရေးအတွက် မုန့်တီသုပ်လေး ရောင်းနေတဲ့ မြင်ကွင်း ကျနော် မခံစားနိုင်ခဲ့ဘူး ညအိပ်ခါနီးတိုင်း မနက်အစောကြီးအဖေအမေထပြီး မုန့်ရောင်းရအုန်းမှာ ပါလားဆိုတဲ့ စိတ်နဲ့ ငိုမိတယ် အဲဒီအချိန်ကတည်း ကျနော်ရင်ထဲအမြဲ တောင်းခဲ့ရတဲ့ ဆု တခုပဲ ရှိခဲ့တယ် ။ တနေ့ သား လုပ်ကျွေးခွင့်ရပါရစေလို့ ။

ဒီလိုနဲ့ပဲ. ကျ‌နော်နဲ့ အမေ ကြား ပြဿနာ အသေးလေးတခုကြောင့် ကျနော် 18 နှစ်လောက်မှာ အိမ်ကနေ ထွက်ခွာခဲ့တယ် ဒီနေ့ထိပေါ့ အိမ်ကထွက်ခွာခဲ့ပေမယ့် တရက်မှ မိသားစုအပေါ် တာဝန်မပျက်ဖူးဘူး အပြင်လောကမှာ တစ်ယောက်တည်းရပ်တည်ရတာ တကယ်ခက်ခဲပါတယ်။ အဖေ အမေ ငယ်စဉ်ကတည်းကအမြဲ ဆုံးမဖူးတဲ့ စကားရှိတယ်။

“သူများဆီက ငွေတကျပ်တောင် မမက်မောမိစေနဲ့တဲ့ သူများငွေတကျပ်ယူမိရင် တကျပ် ပြန်ဆပ်နိုင်အောင်ကြိုးစားပြီး ဘဝကိုအရိုးသားဆုံး နေထိုင်ပါ တဲ့ “ကျနော်မိဘတွေနဲ့ အတူတူမနေပေမယ့် အပြင်လောကမှာ အဖေ အမေ သွန်သင်ဆုံးမ ပေးခဲ့တဲ့အတိုင်း အရိုးသားဆုံး ကြိုးစားအလုပ်လုပ်တယ်။ ရှာဖွေတယ် စုဆောင်းခဲ့တယ်။

ငွေ တစ်ထောင် စပြီး ရတဲ့နေ့ ကတည်းက ကိုယ်ကျိုးအတွက် ကျနော် မသုံးခဲ့ဖူးဘူး။ လှူတယ် ခက်ခဲတဲ့ သူတွေ ကို ကူညီပေးတယ်။

သူများတွေ ကားကောင်းတွေ စီးပြီး ပျော်ပါး နေချိန်မှာ ကျနော် မနက်စာ နေ့လည်စာ ညစာကို 1600 ထက် ပိုမစားခဲ့ဖူးဘူး ။ ကျနော် ရှာဖွေသမျှ အရာရာတိုင်းလည်း ငါ့မိသားစု အတွက် နဲ့ လှူဒါန်းဖို့ အတွက် ဆိုတဲ့ စိတ်ပဲရှိခဲ့တယ် ။ အခုချိန်မှာတော့ ကျနော့်ရဲ့ ပီတိက ကျ‌နော် သိပ်ကို မြင်ချင်တဲ့ အရင်တချိန်က မိသားစု ပုံရိပ်တခုကို တဖြေးဖြေး မြင်နေရပြီဆိုတာပါပဲ နောက်ဆုံးအနေနဲ့ ကျနော်ရဲ့ ပရိတ်သတ် ညီကိုမောင်နှမ အားလုံးကို ပြောပြချင်တာက မိဘကို လုပ်ကျွေးပြုစုခွင့်ဆိုတာ မိဘကိုပေးတဲ့အရာဝတ္ထုတွေရဲ့ တန်ကြေးမဟုတ်ပါဘူး မိဘအပေါ် ရင်ထဲကလာတဲ့ အရိုးသားဆုံး တန်ပြန်တာဝန်သိတတ်မှုပါ ။ ဒါက မိဘအပေါ်မှာ ကိုယ့်ရဲ့ အသန့်ရှင်းဆုံး လုပ်ကျွေးပြုစုခွင့်ပါလို့ ပြောရင်း နိဂုန်းချုပ်ပါတယ်ခင်မျာ” ဆိုတဲ့ စာလေးနဲ့အတူဖော်ပြထားတာတွေ့ရပါတယ်။

ပုံလေးတွေကြည့်ပြီး ကိုယ်တွေပါ အပျော်တွေ ကူးစက်ကာ ကြည်နူးပီတိဖြစ်မိတာ အမှန်ပဲဖြစ်ပါတယ်။ ပိုင်တံခွန်ကတော့ကြော်ငြာတွေများစွာ ရိုက်ကူးရပြီး ရုပ်ရှင်ကားတွေမှာလည်း ပါဝင်သရုပ်ဆောင်နေတာ တွေ့ရပါတယ်။ ချစ်ပရိသတ်ကြီးတွက် ပိုင်တံခွန်ရဲ့ ပုံလေးတွေကို ကြည့်ရှုနိုင်စေရန်မျှဝေပေး လိုက်ပါတယ်။

Source : Paing Takhon Facebook Account

Add a Comment

Your email address will not be published. Required fields are marked *

eleven + ten =