မိထ္တီလာမြို့က ဖြစ်စဉ် နောက်ကွယ် က လူတွေ မသိသေးတဲ့ အကြောင်းအရာ

မိထ္တီလာမြို့က ဖြစ်စဉ် နောက်ကွယ် က လူတွေ မသိသေးတဲ့ အကြောင်းအရာ

သံဃာတော်တွေ ကို လူမှုကွန်ယက် ကနေ စော်ကားမိတဲ့ Dr.ကျော်ဝင်းသန့် ရဲ့ မိသားစုဝင်တွေ မိထ္တီလာ မှ အဝေးကို ပြောင်းရတော့မယ်… သူ့ရဲ့ ဇနီးနဲ့ ကလေးလည်း ရန်ကုန်အိမ်မှာ မနေရဲတော့ပါဘူး…

သူတစ်ဦးရဲ့ အမှားကြောင့် ကျန်မိသားစုဝင်တွေ အားလုံး အကျိုးသက်ရောက် သွားရပါတယ်။ စိတ်မကောင်း ပါဘူး။ မှားတာမှန်တာ အသာထား။ လောလောဆယ် လက်ငင်းဒုက္ခ တွေ့ရပြီး။ အကြောင်းတရားကြောင့် အကျိုးဖြစ်လာလေပြီ…

Dr. ကျော်ဝင်းသန့်ရဲ့ညီ ရေးထားတဲ့ Post ပါ…

ကျွန်တော့် အကိုဟာ တရားဥပဒေရဲ့ ဆုံးမမှုကိုခံယူမှာဖြစ်ပါတယ်။ အခုအချိန်မှာ လိုင်းပေါ်မှာ တစ်ချို့မဟုတ်မမှန်သတင်းတွေနဲ့ အရမ်းကိုဖွနေတာတွေ့ရတဲ့အတွက် ကျွန်တော်ဖြေရှင်းချင်တာ လေးတွေရှိပါတယ်။

ကျွန်တော်တို့ မိသားစုဟာ ရိုးရိုးသားသားပဲနေကြသူတွေပါ။ ဘယ်ပါတီ ဘယ်အဖွဲ့အစည်းဝင်မှလည်းမဟုတ်ပါဘူး။ ကျွန်တော့်အကိုဟာလည်း ဘယ်ပါတီဝင်မှ မဟုတ်သလို ဘယ်အဖွဲ့အစည်းနဲ့မှလည်း ပါတ်သတ်မှုမရှိပါဘူး။ ကျွန်တော့်အကိုဟာ သူတင်တဲ့နေ့တုန်းက ရန်ကုန်မှာပါ။ မိတ္ထီလာမြို့မှာမရှိပါဘူး။ မိတ္ထီလာမြို့မှာ ကျွန်တော်ရယ် အဖေရယ် အမေရယ်ပဲရှိပါတယ်။

ပထမဆုံးသတင်းတွေ တက်လာ တဲ့နေ့က ကျွန်တော်တို့ မိတ္ထီလာအိမ်လိပ်စာအတိအကျနဲ့ တင်ကြပါတယ်။ ကျွန်တော့်အဖေနဲ့ အမေဟာ ကျန်းမာရေးမကောင်းပါဘူး။ လူငယ်ဆိုလို့ အိမ်မှာ ကျွန်တော်တစ်ယောက်တည်း ရှိတာပါ။ မတော်တဆ လူတွေဝိုင်းလာရင် ကျွန်တော်တို့အတွက် အန္တရာယ် အရမ်းများပါတယ်။ ကျွန်တော်တို့ သိသိချင်း ရပ်မိရပ်ဖ တစ်ချို့နဲ့ တွေ့ဆုံပြီး အကြံအဉာဏ်တောင်းပါတယ်။ အကြံပေးတဲ့အတိုင်းပဲ အဖေရယ် ကျွန်တော်ရယ်နှစ်ယောက် လိုက်ပြီး တောင်းပန်ပါတယ်။ အဲဒီမှာ မြို့ရဲ့အဖွဲ့အစည်းတစ်ချို့က ပုဂ္ဂိုလ်တွေက လူကိုယ်တိုင် လာတောင်း ပန်မှကျေနပ်မယ်ဆိုပြီးပြောပါတယ်။ ကျွန်တော့်အကိုဆီကိုဖုန်းဆက်ပြီး သူလာနိုင်မဲ့နေ့ကို မေးတဲ့အခါ သူက ချက်ချင်း ရန်ကုန်ကနေ မိတ္ထီလာကိုဆင်းလာခဲ့မယ်ဆိုပြီး ပြောပါတယ်။

အဲဒီအချိန်မှာ တစ်ချို့ ဖေ့စဘွတ်အကောင့်တွေကနေ လူကိုယ်တိုင် လာမတောင်းပန်ပဲ ညီနဲ့အဖေကို ကိုယ်စားပဲလွှတ်တယ် ဆိုပြီးတင်ပါတယ်။ ကိုယ်စားလွှတ်တာမဟုတ်ပါဘူး သူကိုယ်တိုင်က မြို့ပေါ်မှာမရှိတာပါ။ ကျွန်တော်တို့တွေ အားလုံးတောင်းပန်ပြီး ညနေအချိန်မှာ ကျွန်တော်တို့ အိမ်ကို ရပ်ကွက် မှ တာဝန်ရှိ လူကြီးများရောက်ရှိလာပါတယ်။ ကျွန်တော်သတင်းတင်တဲ့သူတွေကို အိမ်လိပ်စာဖျက်ခိုင်းလိုက်ပေမယ့် သူတို့ပြင်ပေးတဲ့အခါ သတင်းက အရမ်းပျံ့နှံ့သွားပါပြီ။ ကျွန်တော်တို့ အိမ်‌ကိုလည်း စောင့်ကြည့်နေကြတဲ့သူတွေ ရှိနေကြောင်းလည်း အဖွဲ့အစည်းများ မှပြောပါတယ်။

ကျွန်တော် တို့လည်း အပြင်မထွက် ရဲပါဘူး။ ညကျွန်တော့်အကိုရောက်လာတဲ့အခါ ရပ်ကွက်ထဲက လူကြီးတွေကိုယ်တိုင်သွားရောက်ခေါ်ဆောင်လာပါတယ်။

ကျွန်တော်တို့ကို အဖွဲ့အစည်းအချို့က လူတွေက ကိုကျော်ဝင်းသန့်ကိုယ်တိုင် မိတ္ထီလာမြို့မှာ ပါချုပ်ဆရာတော်ကို ပင့်ပြီး ဖေ့စဘွတ် မှ live အပါအဝင် အခန်းအနားနဲ့ နိုင်ငံတော်အဆင့်တောင်းပန်ပေးရပါမယ်ဆိုပြီးပြောပါတယ်။ ဒီမှာ ထပ်ပြီးပြောကြားလိုတာက ကျွန်တော့်အကိုဟာ ဖြစ်လာမယ့် အကြောင်းအရာကို သူနားလည်ပါတယ်။ သူ့ကိုတစ်ခါတည်းဖမ်းသွားနိုင်တယ်ဆိုတာလည်း သူသိကြောင်း ကျွန်တော့်ကိုပြောပါတယ်။ ဒါပေမယ့် သူ့လုပ်ရပ်ကိုတောင်းပန်မယ် ရင်ဆိုင်စရာရှိတာရင်ဆိုင်ရမှာပဲဆိုပြီး အရောက်လာပါတယ်။

ကျွန်တော်တို့နောက်နေ့ ကိုးနဝင်းကျောင်းကို ရောက်တဲ့အခါ လူတွေ အများကြီးစုဝေးနေတာကိုတွေ့ရပါတယ်။ ကျွန်တော်တို့တောင်းပန်တဲ့အခါ ဆရာတော်ကြီးတွေဟာ ခွင့်မလွှတ်ကြပါဘူး။ အဲဒီအချိန်မှာ အပြင်က လူစုကြီးဟာ အော်ဟစ်နေကြပါပြီ။ ကျွန်တော်တို့အရမ်းကြောက်ပါတယ်။ ကျွန်တော်သေရမှာထက် ကျွန်တော့်အဖေအမေ တစ်ခုခုဖြစ်မှာကို ပိုစိုးရိမ်ပါတယ်။ “အကိုကိုမရိုက်ရရင် ညီကိုရိုက်ကွာ” ဆိုတဲ့အသံတွေလည်း နားနဲ့ကြားခဲ့ရပါတယ်။ နောက်ပိုင်းအဖြစ်ပျက်ကတော့ live မှာမြင်တွေ့ကြတဲ့အတိုင်းပါပဲ။ ကျွန်တော့်အကိုကိုခေါ်သွားတဲ့ ရဲကားကိုခဲတွေနဲ့ဝိုင်းထုကြပါတယ်။ ရဲအချို့ ဒဏ်ရာရသွားတယ်ပြောပါတယ်။ ရဲတပ်ဖွဲ့ဝင်တွေ သံဃာတော်‌တွေ ရပ်မိရပ်ဖတွေ ကျန်းမာချမ်းသာကြပါစေခင်ဗျာ။ သူတို့သာမရှိရင် ကျွန်တော်တို့ မိသားစုဟာ အသတ်ခံရပါပြီ။

ကျွန်တော်တို့ ကျန်တဲ့ မိသားစုဟာ မိတ္ထီလာမြို့မှာ မနေရဲတော့ပါဘူး။ ကျွန်တော်တို့ အဝေးတစ်နေရာကို ထွက်သွားပါတော့မယ်။ ရပ်ကွက်က တာဝန်ရှိလူကြီးတွေလည်း အဝေးတစ်နေရာကို သွားဖို့အကြံပြုပါတယ်။ အခုအချိန်မှာ ကျွန်တော့်အကို ဘယ်မှာလည်းဆိုတာ မသိရပါဘူး။ သတင်းဌာန တစ်ချို့က မန္တလေးမှာလို့လည်းတင်ကြပါတယ်။ ကျွန်တော့်အကိုမှာ ဇနီးနဲ့ လူမမည်အရွယ်သမီးလေး တစ်ဦးရှိပါတယ်။ တစ်ချို့ အကောင့်တွေမှာ မဆိုင်တဲ့ ကျွန်တော့်အကိုရဲ့ ဇနီးနဲ့ကလေး မိသားစုဝင်တွေကိုပါ ဓာတ်ပုံနှင့်တကွတင်ပြီး အသက်အန္တရာယ်ကို ခြိမ်းခြောက်နေကြပါတယ်။ ကျွန်တော့်အကိုရဲ့ ရန်ကုန်လိပ်စာ တွေလည်းတင်ကြတဲ့အတွက် သူတို့လည်း အဲဒီမှာ မနေရဲတော့ပါဘူး။

ပြီးတော့ သူသေနတ်ကိုကိုင်ပြီး တင်ထားတဲ့ပုံကို ဝိုင်းဖွနေတာလည်းတွေ့ရပါတယ်။ အဲဒီပုံဟာ လွန်ခဲ့တဲ့ လေးနှစ်လောက်တုန်းက ပုံပါ။ ကျွန်တော့်အကိုဟာ NGO အဖွဲ့တစ်ခုမှာ အလုပ်လုပ်ခဲ့ ပါတယ်။ ကရင်ပြည်နယ် ကယားပြည်နယ် နယ်စပ်တွေကိုသွားရပါတယ်။ အဲ့ဒီ သေနတ်ဟာ လေသေနတ်ပါ။ နယ်စပ်တွေ မှာပေါပါတယ်ခင်ဗျာ။ အဲဒီပုံကိုပြပြီး အဖွဲ့အစည်း တစ်ခုခုကျောထောက်နောက်ခံရှိရမယ်ဆိုပြီးပြောနေကြပါတယ်။ ဘယ်အဖွဲ့အစည်းမှ လေသေနတ်လိုလိုတူမီးလိုလို သေနတ်တွေ မကိုင်ကြပါဘူး။

အခုခေတ်ဟာ ဖေ့စဘွတ် အကောင့်တစ်ခုကို လွယ်လွယ်လေး ဖွင့်လိုရတဲ့ခေတ်ပါ။ အဓိကရုဏ်းတွေအတွက်ဖွနေကြတဲ့အကောင့်တွေဆိုတာ အကောင့်တုတွေများပါတယ်။ လူတစ်ယောက်ဟာ သူ ဖေ့စဘွတ်မှာ အမှတ်မထင် တင်လိုက်တဲ့ post တစ်ခုကြောင့် သူ့မိသားစုကို ထိခိုက်မယ်ဆိုတာ သိရင် သိသိကြီးနဲ့ အကောင့်အစစ်ကနေ တင်စရာအကြောင်းမရှိပါဘူး။

ကျွန်တော့်အကိုဟာ အရက်သောက်ပါတယ်။ သူ့မှာ အဝလွန်နေတော့ ဒေါသအလွယ်ထွက်တက်ပါတယ်။ သူ post တွေတင်တဲ့နေ့တုန်းက အရက်သောက်ထားပါတယ်လို့ ပြောပါတယ်။ အရက်မူးတဲ့ကောင်ဟာ ချီးကျွေးရင် မစားဘူး ဆိုကြပေမယ့် အရက်နဲ့ဒေါသ နှစ်ခုပေါင်းလိုက်တဲ့အခါမှာ သိစိတ်ရော မသိစိတ်ရော လွတ်သွားတတ်ပါတယ်။ သူ့ရဲ့ Post မှာ လက်မခံတဲ့သူတွေနဲ့ပြောရင်းပြောရင်း ဒေါသရယ် အရက်ရယ် ပါလာတဲ့အခါ တစ်ဖက်သား နာအောင် အဆုံးထိပြောမိသွားပါတယ်။ ကျွန်တော်တို့ညီအကိုနှစ်ယောက်လည်း အဲဒီကိစ္စနဲ့ရန်ဖြစ်နေကျပါပဲ။ သူကိုယ်တိုင်လည်း ဒီလောက်ထိဖြစ်သွားမယ်လို့ မထင်ခဲ့မိပါဘူး။

နောက်ဆုံးပြောရရင် ကျွန်တော့် အကိုဟာ ထောင်ကျမှာဖြစ် ပါတယ်။ ကျွန်တော် တို့လည်း အဲဒီကိစ္စကို လက်ခံပါတယ်။ အခုပိုစ့် တင်ရခြင်းရဲ့ရည်ရွယ်ချက်က ကျွန်တော်ဟာ အဖေအမေ နဲ့ ကိုကျော်ဝင်းသန့်ရဲ့ ဇနီးနဲ့သမီး မိသားစုရဲ့လုံခြုံမှုကို ဂရုစိုက်စေလိုတဲ့ အတွက်ပဲဖြစ်ပါတယ်။

ကျွန်တော်တို့ဟာ ရိုးရိုး သားသားနေတဲ့ မိသားစုဝင်တွေပါ။ မိတ္ထီလာ မှာဆွေမျိုးလည်းမရှိပါဘူး အားကိုး စရာလည်းမရှိပါဘူး။ ကျွန်တော့်အကိုဟာလည်း သူ့လုပ်ရပ်အတွက်သူ တရားဥပဒေရဲ့ ပြစ်ဒဏ်ကို သူခံပါလိမ့်မယ်။ သူ့ဟာ မိတ္ထီလာမြို့မှာ အဓိကရုဏ်းဖြစ်ပါစေဆိုတဲ့ ဆန္ဒမရှိသလို။ သူ့ရဲ့နောက်ကွယ် မှာ အနီတွေ အစိမ်းတွေမပါပါဘူးဆိုတာ အလေးအနက်ပြောချင် ပါတယ်။

မိတ္ထီလာမြို့နေ သံဃာတော်များ မြို့မိ မြို့ဖများ တာဝန်ရှိ အဖွဲ့အစည်းများ လူပုဂ္ဂိုလ်များကို ကျွန်တော် အနူးအညွတ်တောင်းပန်ပါတယ်။

အောင်ဝင်းသန့်

Add a Comment

Your email address will not be published. Required fields are marked *

ten − 1 =