Quarantine ဝင်ရသူ နှစ်သိန်းကျော် ရှိသဖြင့် ကိုဗစ်ရော ဂါ ရှိမရှိ အကုန်လုံး ကို စစ်ဆေး ရန် မဖြစ်နိုင် ဟုဆို

Quarantine ဝင်ရသူ နှစ်သိန်းကျော် ရှိသဖြင့် ကိုဗစ်ရောဂါ ရှိမရှိ အကုန်လုံး ကို စစ်ဆေး ရန် မဖြစ်နိုင်ဟုဆို

မြန်မာနိုင်ငံတွင် အသွားအလာ ကန့်သတ်စောင့်ကြည့်ခံရသူ (Quarantine) နှစ်သိန်းတစ်သောင်းကျော် ရှိပြီး ၎င်းတို့ အားလုံးကို ကိုဗစ်ရောဂါ ရှိမရှိ စစ်ဆေးရန် မဖြစ်နိုင်ကြောင်း ကျန်းမာရေးနှင့် အားကစား ဝန်ကြီးဌာန မှ ပြည်ထောင်စုဝန်ကြီး ဒေါက်တာမြင့်ထွေးက ပြောကြားသည်။ ကျန်းမာရေးဆိုင်ရာ တုံ့ပြန်မှု အရေးပေါ်စီမံချက် အကောင်အထည်ဖော်ရန် ကမ္ဘာ့ဘဏ်၊ အပြည်ပြည်ဆိုင်ရာ ဖွံ့ဖြိုးရေးအဖွဲ့ (IDA) တို့ထံမှ အမေရိကန်ဒေါ်လာသန်း ၅၀ ချေးငွေရယူမှုနှင့် ပြည်ထောင်စု လွှတ်တော်တွင် လွှတ်တော် ကိုယ်စားလှယ်များ မေးမြန်းထားမှုကို ယနေ့ ကျင်းပသည့် လွှတ်တော် အစည်းအဝေးတွင် လာ ရောက် ဖြေကြားစဉ် ယင်းသို့ ထည့်သွင်းပြော ဆိုခြင်းဖြစ်သည်။

“ဒီနှစ်သိန်းတစ်သောင်းကို စစ်ဖို့ ဆိုတာ ဘယ်လိုမှ မဖြစ်နိုင် ပါဘူး” ဟု ပြည်ထောင်စုဝန်ကြီးက ပြောဆို သည်။လက်ရှိတွင် အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) ၌ ၂၄ နာရီစလုံး လည်ပတ်လျှင် လူ ၇၅၀ ၏ ဓာတ်ခွဲနမူနာများကို စစ်ဆေးနိုင်ပြီး ဆေးသုတေသနဦးစီးဌာနတွင် ၃၇၀ စစ်ဆေးနိုင်ကြောင်း ၎င်းက ဆိုသည်။ ထို့ကြောင့် လက်ရှိ အခြေအနေတွင် တစ်ရက်လျှင် အမြင့်ဆုံး တစ်ထောင်ကျော်သာ စစ်ဆေးနိုင်သေးသည်။

“(စစ်ဆေးဖို့အတွက်) စက်တွေက ရှိတယ်။ ဝန်ထမ်းတွေက တော်တော်လေး လက်ပန်း ကျသလောက်ကို ဖြစ်နေပြီ။ ဒါကို ချိန်ဆပြီး လုပ်နေရပါတယ်” ဟု ဒေါက်တာမြင့်ထွေးက ပြောကြားသည်။အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) မှ ဆရာဝန်များသည် ည ၃နာရီ ၄နာရီအထိ လုပ်ကိုင်နေရကြောင်း၊ Quarantine ဝင်ရသူ အားလုံးကို ရောဂါ စစ်ဆေးပေးရန် မဖြစ်နိုင်သော်လည်း ယခုထက် ပိုမိုတိုးမြှင့် စစ်ဆေးသွားမည်ဖြစ်ကြောင်း ၎င်းက ပြောဆိုသည်။

အစောပိုင်းတွင် ရောဂါ လက္ခဏာရှိသူများကိုသာ စစ်ဆေးခဲ့သော်လည်း မလုံလောက်သဖြင့် ဧပြီလ ၁၅ ရက်နေ့မှ မေလ ၁၆ ရက်နေ့ အထိ အသွားအလာကန့်သတ်စောင့်ကြည့်ခံရသူ ငါးရာခိုင်နှုန်းမှ ၁၀ ရာခိုင်နှုန်း အထိ တိုးမြှင့်စစ်ဆေးခဲ့ကြောင်း ၎င်းက ဆိုသည်။ယင်းအပြင် ပြည်ပမှ လေယာဉ်၊ နယ်စပ်ဂိတ်တို့မှ ပြန်လာသူ အားလုံးကို မေလ ၁၇ ရက်နေ့ မှ စတင်ကာ ရောဂါရှိမရှိ စစ်ဆေးနေပြီဖြစ်ကြောင်း၊ ရောဂါကူးစက်ခံရနိုင်ခြေရှိသည့် ကျန်းမာရေးဝန်ထမ်းများ၊ နယ်စပ်ဂိတ်များ၌ ပြည်တော်ပြန်များလက်ခံရာတွင် ကူညီနေကြသည့် စေတနာ့ ဝန်ထမ်းများ၊ ကျန်းမာရေး ဝန်ထမ်းများ စသည်တို့ကိုလည်း ရောဂါရှိမရှိ စစ်ဆေးနေကြောင်း ဒေါက်တာမြင့်ထွေးက ပြောဆိုသည်။

Quarantine ဝင်ရသူ ရှစ်ထောင်ကျော် (၈၈၃၃ဦး) ကို ရောဂါ ရှိမရှိ စစ်ဆေးထားပြီးချိန်တွင် ရောဂါတွေ့ ရှိသူမှာ သုည ဒသမ ၂ ရာခိုင်နှုန်းသာ ရှိသည်ကို တွေ့ရကြောင်း၊ သို့သော်လည်း မကြာခင်ကာလတွင် ပိုမို စစ်ဆေးပေးနိုင်မည်ဖြစ်ကြောင်း ၎င်းက ဆက်လက်ပြောဆိုသည်။မန္တလေး၊ တောင်ကြီး၊ မော်လမြိုင်တို့တွင် ကိုဗစ်စစ်ဆေးနိုင်သည့် စက်များတပ်ဆင်ကာ ဇွန်လဆန်းတွင် စတင် စစ်ဆေးနိုင် မည်ဖြစ်ပြီး နေရာ ၂၆ခုနှင့် မြို့နယ် ၁၅ ခုတို့တွင်လည်း ရောဂါ ရှိမရှိ စစ်ဆေးနိုင်အောင် လုပ်ဆောင်နေကြောင်း ပြည်ထောင်စုဝန်ကြီးက ပြောကြားသည်။ တပ်မတော်က လူခြောက်ရာကျော်ကို ဓာတ်ခွဲစစ်ဆေးပေးထားကြောင်း ၎င်းက ဆိုသည်။ ယနေ့အထိ မြန်မာနိုင်ငံတွင် ကိုဗစ်ပိုးတွေ့ရှိသူ စုစုပေါင်း ၁၉၉ ဦး၊ ပိုးကင်းစင်သူ ၁၀၈ဦးနှင့် သေဆုံးသူ ခြောက်ဦး ရှိနေပြီဖြစ်သည်။

Credit The Voice

Add a Comment

Your email address will not be published. Required fields are marked *

19 − nineteen =