စင်ကာပူ မှာ လစဉ် လျှပ်စစ် မီတာ မဖတ်သလို တစ်လခြား တစ်ခါ ခန့်မှန်း တွက်ချက်ပုံ စနစ်

စင်ကာပူ မှာ လစဉ် လျှပ်စစ် မီတာ မဖတ်သလို တစ်လခြား တစ်ခါ ခန့်မှန်း တွက်ချက်ပုံ စနစ်

စင်ကာပူမှာ လျှပ်စစ်မီတာ ဖတ်တာ ကို လစဉ် မဖတ်ပါဘူး။ သူတို့က တစ်လခြား ဖတ်ပါတယ်။ မဖတ်တဲ့ လကို ခန့်မှန်းခြေနဲ့ တွက်ချက် ယူပါတယ်။ ဥပမာ ဇန်နဝါရီလမှာ မီတာ လာဖတ်ရင် ဖေဖော်ဝါရီလမှာ မီတာ မဖတ်ပါဘူး။ မတ်လမှာ မီတာ ပြန်လာဖတ်ပါတယ်။ ဧပြီမှာ မီတာ မဖတ်ပါဘူး။

အဲဒီလိုမျိုးမှာ မီတာ လာမဖတ်တဲ့ ဧပြီ အတွက် ဘယ်လို ခန့်မှန်း တွက်ချက်သလဲ ဆိုရင် မီတာလာဖတ်ခဲ့တဲ့ နှစ်လ ဖြစ်တဲ့ ဇန်နဝါရီလနဲ့ မတ်လက ကီလိုဝပ်တွေကို ပေါင်းပြီး တစ်ရက်စာ ကီလိုဝပ်ကို ထုတ်ပါတယ်။ အဲဒီ တစ်ရက်စာနဲ့ ဧပြီလက ရက်တွေကို မြှောက်ပြီး ခန့်မှန်းခြေနဲ့ မီတာဖိုး တွက်ချက်ပေး ပါတယ်။ ခန့်မှန်းခြေ ဖြစ်တဲ့အတွက် လိုတာလည်း ဖြစ်နိုင်သလို ပိုတာလည်း ရှိပါတယ်။ တကယ် မီတာ လာဖတ်တဲ့ လမှာ လိုတာပိုတာတွေကို တစ်ခါတည်း တွက်ချက်ပြီး မီတာစာရွက်မှာ ထည့်ပေးထားတယ်။ လိုနေရင် ထည့်ပေါင်းမယ်။ ပိုနေရင် ပြန်လျှော့ပေး တယ်။

အိမ်ပေါက်စေ့က မီတာကို လတိုင်း လာမဖတ် ရတဲ့အတွက် ဝန်ထမ်းအင်အား သက်သာစေပါတယ်။ တချို့မီတာတွေက လူကိုယ်တိုင် လာဖတ်စရာ မလိုဘဲ အဝေးတစ်နေရာကနေ လှမ်းဖတ်လို့ ရပါတယ်။ အဲဒီမီတာကို AMI Meter (Advanced Electricity Meter) လို့ ခေါ်ပါတယ်။ အဲဒီမီတာမျိုး တပ်ဆင် ထားတဲ့ အိမ်တွေကိုတော့ မီတာဖတ်တဲ့ သူ မလာပါဘူး။ စင်ကာပူမှာ မီတာပုံးတွေက အိမ်အပြင်မှာပဲ ထားပါတယ်။ အိမ်အထဲမှာ မရှိပါဘူး။ အဲဒါကြောင့် မီတာ လာဖတ်သွားရင်လည်း သိတာလည်း ရှိသလို မသိလိုက် တာလည်း ရှိနိုင်ပါတယ်။

အခုလို ကိုဗစ်-၁၉ ကပ်ရောဂါ ကာလမှာ အသွားအလာ ကန့်သတ်ထားတော့ မီတာ လာမဖတ်နိုင်ကြပါဘူး။ မီတာပြန်ဖတ်မယ့် အနီးဆုံးလက ဇူလိုင်လပါ။ အဲဒီတော့ သူတို့က ဘာလုပ်ပေးသလဲ ဆိုတော့ ကိုယ်တိုင် မီတာဖတ်ပြီး သူတို့ဆီကို ပြန်ပို့ပေးနိုင်အောင် လုပ်ပေးထားပါတယ်။ မီတာ ဖတ် ရမယ့် ရက်ကိုလည်း မီတာစာရွက်မှာ ရေးထားတဲ့ ရက်စွဲကနေ ကြည့်လို့ရပါတယ်။ မီတာ ဖတ်ရမယ့် နေ့မှာ မီတာနံပါတ်ကို ဓါတ်ပုံရိုက်ပြီး သူတို့ဆီ ပြန်ပို့ပေးနိုင်ပါတယ်။ အကယ်လို့ ကိုယ်တိုင်မီတာ မဖတ်ချင်ဘူး ဆိုရင်လည်း ရှေ့မှာ ရှင်းပြခဲ့တဲ့အတိုင်း ခန့်မှန်းခြေ နဲ့ တွက်ချက်ပြီး မီတာခ ပေးရပါမယ်။ လိုတာ ပိုတာကို တကယ် မီတာ လာဖတ်ပြီးတဲ့အခါမှ ရှင်းကြတာပေါ့။

စင်ကာပူမှာတော့ အိမ်သုံးမီတာခကတော့ လက်ရှိ ကာလမှာ တစ်ကီလိုဝပ်ကို ၂၅ ပြားနီးပါးပါ။ မြန်မာငွေနဲ့ဆို ၂၅၀ ကျပ် ပတ်ဝန်းကျင်ပေါ့။ နှုန်းထား တစ်မျိုးတည်းထားပြီး ကောက်တာပါ။ ဘယ်လောက် ကီလိုဝပ်ထိ သုံးရင် ဘယ်လောက်ဆိုတဲ့ ပုံစံမျိုး မဟုတ်ပါဘူး။ ဒါပေမယ့် စင်ကာပူမှာက သုံးလမှာ တစ်ခါ မီတာခ ဈေးနှုန်းပြောင်း ပါတယ်။ စင်ကာပူရဲ့ ၉၅% သော လျှပ်စစ်ထုတ်လုပ်မှုက ဂတ်စ်ကို အသုံးပြုထားတာဖြစ်လို့ ဂတ်စ်ဖိုး အတက်အကျ ရှိရင် ရှိသလို ဈေးနှုန်း အတက်အကျ ရှိပါတယ်။ တခြား ကုန်ကျစရိတ်တွေ အတက်အကျရှိရင်လည်း အဲဒါတွေကိုလည်း ထည့်တွက် ပါတယ်။ သူတို့က တိုင်းပြည်အတွက် ပြည်သူ့အတွက် အရှုံးခံလုပ်နေတဲ့ အဖွဲ့အစည်းမျိုး မဟုတ်ပါဘူး။ အမြတ်ရဖို့ စီးပွါးရေး လုပ်နေတာမျိုးပါ။

စင်ကာပူရဲ့ မီတာစာရွက်မှာ သဘောကျတာလေး တခုက ကိုယ့်အိမ် ရဲ့ လက်ရှိ မီးသုံးစွဲအားကို လအလိုက် ပြထားတယ်။ အဲဒါနဲ့အတူ ကိုယ့်မြို့နယ်ရဲ့ ပျမ်းမျှ မီးသုံးစွဲအားနဲ့ စင်ကာပူနိုင်ငံအဆင့် ပျမ်းမျှ မီးသုံးစွဲအားကို ဂရပ်လေး ဆွဲပြီး ပြထားတော့ ကိုယ့်ဘာသာကိုယ် စဉ်းစားချင့်ချိန်နိုင်ပါတယ်။ ကိုယ်သုံး တာ အရမ်းများနေလား။ ပုံမှန်ပဲလား ဆိုတာကို အဲဒီဂရပ်ကို ကြည့်တာနဲ့ သိနိုင်ပါတယ်။ ဘယ်လမှာ ပိုသုံးပြီး ဘယ်လမှာ အသုံး နည်းသလဲ ဆိုတာလည်း သိနိုင်ပါတယ်။

ကိုယ်တွေကတော့ ၃၉၁ ကီလိုဝပ် အထိ အများဆုံး သုံးထားခဲ့ဖူးတယ်။ မြို့နယ်အဆင့် ပျမ်းမျှအသုံးက ၃၉၆ ကီလိုဝပ်ပါ။ စင်ကာပူနိုင်ငံအဆင့် ပျမ်းမျှအသုံးက ကီလို ၃၃၃ ပါ။ စင်ကာပူနိုင်ငံအဆင့် တွက်ချက်မှုမှာက တချို့အိမ်တွေက အဲကွန်း မသုံးကြပါဘူး။ ရေပူစက် မသုံးကြပါဘူး။ ရေခဲသေတ္တာ၊ အဝတ်လျှော်စက်၊ မိုက်ခရိုဝေ့၊ တီဗွီစတဲ့ လျှပ်စစ်ပစ္စည်းတွေ မသုံးကြတဲ့ အိမ်အချို့လည်း ရှိနေပါသေးတယ်။ အဲဒီအိမ်တွေရဲ့ သုံးစွဲအားတွေကိုပါ ထည့်ပြီး တွက်ချက်ထားလို့ ပျမ်းမျှက နည်းနေတာမျိုးပါ။

စင်ကာပူမှာက ဧပြီလကနေ သြဂုတ်လဟာ အပူဆုံးကာလတွေပါပဲ။ အဲဒီကာလမှာ ရေများများ ချိုးဖြစ်သလိုလို အဲကွန်းလည်း အချိန်ကြာကြာ ဖွင့်ကြပါတယ်။ ဖြစ်ချင်တော့ ကပ်ရောဂါကြောင့် လူတွေ အပြင်မထွက်ရ… ရုံးမသွားရ… ကလေးတွေ ကျောင်းမပို့ရတဲ့ ကာလက ဧပြီနဲ့ မေလ ၂ လ ဖြစ်နေတော့လည်း အိမ်တိုင်း လိုလို မီတာခနဲ့ ရေဖိုးတွေ ပိုကုန်ကျမှာ အသေအချာပါပဲလေ။

Khun July (May 2020)