မိုးအေး ရင် အဆစ်အမြစ် ကိုက် ခဲတာ နဲ့ ကိုက်ခဲ တတ်သူတွေဟာ မိုးရွာတာ ကို ခန့်မှန်းနိုင်ခြင်း

မိုးအေး ရင် အဆစ်အမြစ် ကိုက် ခဲတာ နဲ့ ကိုက်ခဲ တတ်သူတွေဟာ မိုးရွာတာ ကို ခန့်မှန်းနိုင်ခြင်း

မိုးေ အးရင် အဆစ်အမြစ်တွေ ကိုက်တယ်ဆိုတာ အမှန်ပဲ လား။ အဆစ်အမြစ် ကိုက်ခဲတာကိုကြည့်ပြီး မိုးရွာတာကို ခန့်မှန်းနိုင်တယ် ဆိုတာရော တကယ်လား။ အဆစ်အမြစ်ကိုက်ခဲတတ်တဲ့သူတွေက မိုးရွာရင် မိုးအေးရင် သူတို့အဆစ်အမြစ်တွေပိုပြီး ကိုက်ခဲတယ်လို့ပြောတဲ့ အခါ လူကောင်းတွေအဖို့ ယုံရခက်တယ်။ ဘယ်လို ဆက်စပ်မှုရှိနေတာလဲပေါ့။

နောက်တစ်ခါ အဲဒီ လူတွေက သူတို့ အဆစ်အမြစ်တွေကိုက်ခဲလာတာကို ကြည့်ပြီး မိုးရွာတာကိုတောင် ခန့်မှန်းနိုင်တယ်လို့ ပြောတာကျတော့ အလွန်အကျွံဖြစ်သွားပြီလို့ မထင်ဘူးလား။ သဘာဝလွန်ကိစ္စရပ်လို့တောင် ထင်စရာကောင်းပေမယ့် လေ့လာချက်တွေအရတော့ ရာသီဥတုနဲ့ အဆစ်အမြစ်ရောင်ရမ်း မှုတွေ ဆက်စပ်မှုရှိတာ မှန်ကန်ပါတယ်တဲ့။

အဆစ်အမြစ်ကိုက်ခဲတတ်တဲ့သူတွေကို ပြုလုပ် တဲ့ လေ့လာ ဆန်းစစ်ချက်တစ်ခုမှာ အဆစ်အမြစ်ရောင်ဝေဒနာခံစားရသူတွေရဲ့ ၆၀ ရာခိုင်နှုန်းကျော်က မိုးရွာမှာကို ကြိုတင်ခန့်မှန်းတာ မှန်ကန်ပါတယ်တဲ့။ အဆစ်အမြစ်ရောင်ရောဂါရှိသွားရင် မိုးလေဝသ ကျွမ်းကျင် ပညာရှင်များဖြစ်သွားတာလား ဒါမှမဟုတ် မိုးရွာတာကို ခန့်မှန်းနိုင်တဲ့ မှော်ပညာရှင်များ ဖြစ်သွားတာလား။

သိပ္ပံနည်းကျ ရှင်းလင်းမှု အရတော့ ဒီလိုပါ။ လူတွေရဲ့ ခန္ဓာကိုယ်ဝန်းကျင်မှာ လေထုဖိအားဆိုတာရှိပါတယ်။ အဲဒီဖိအားက အဆစ်အမြစ်တွေအပါအဝင် ခန္ဓာကိုယ်တစ်ခုလုံးမှာ သက်ရောက်မှုရှိတယ်။ မိုးရွာခါနီးအချိန်အခါတွေမှာတော့ လေထုအပူချိန်လျော့ပြီး အေးသွားတယ်။ လေထု ဖိအားလည်း ပုံမှန်ရှိနေကျထက် နည်းသွားတယ်။ ခန္ဓာကိုယ်ပေါ်မှာ သက်ရောက်နေတာလည်း နည်းသွားတယ်ပေါ့။

ဒီလိုလေထု ဖိအားနည်းသွားတာက လူကောင်းတွေ အဖို့မှာတော့ ထူးခြားပြီး မသိသာပါဘူး။ ဒါပေမယ့် အဆစ်အမြစ်ရောင်ရောဂါအခံရှိတဲ့သူတွေမှာတော့ ကာလကြာရှည်နာကျင်ရောင်ရမ်းမှုတွေဖြစ်ထားတဲ့ အဆစ်တွေရဲ့ အာရုံကြောတွေဟာ အရမ်းထိလွယ်ရှလွယ်နေပြီး အပြောင်းအလဲကို သိသိသာသာ ခံစား သိရှိနိုင်ပါတယ်။

အစတုန်းက အပြင်ကနေ လေထုဖိအားနဲ့ ဖိပေး ထားသလိုဖြစ်နေတဲ့ အဆစ်အမြစ်တွေက အခုလို ဖိအားလျော့သွားတဲ့အချိန်မှာ ပိုပြီးဖောင်းကြွရောင်ရမ်းလာသလို နာကျင်ကိုက်ခဲမှုတွေကိုလည်း ခံစားရပါတယ်။ ဒါကြောင့် မိုးအေးရင် အဆစ်အမြစ်တွေကိုက်ခဲတယ် ဆိုတာနဲ့ မိုးရွာတာကို ခန့်မှန်းနိုင်တယ် ဆိုတာ တကယ်ပါတဲ့။

နာကျင်မှုတွေသက်သာဖို့အတွက် ကျပ်ထုပ် ထိုးတာ၊ ပတ်တီး ဒူးစွပ် အစရှိတဲ့ ဖိထားပေးနိုင်တဲ့အရာတွေကို အသုံးပြုနိုင် ပါတယ်။ သဘောကတော့ လျော့သွားတဲ့လေထု ဖိအားကို တခြားအရာတွေနဲ့ ပြန်ဖိပေးထားတယ် ဆိုတဲ့သဘောပါ။

ဒေါက်တာသူရိန်လှိုင်ဝင်း

Add a Comment

Your email address will not be published. Required fields are marked *

five × one =