မေတ္တာတရားတွေ နဲ့ မေတ္တာ ကုန်ကားကြီး လာပါ တော့မည် ….

မေတ္တာတရားတွေ နဲ့ မေတ္တာ ကုန်ကားကြီး လာပါ တော့မည်

ပင်းတယက ဓနုတိုင်းရင်းသားတွေ ရဲ့ ကျွန်တော့် အပေါ်ထားတဲ့ သံယောဇဉ်။

ဓနုမြေမှ ခွဲခွါခဲ့ရပေမယ့် သတိတရ လွမ်းဆွတ်စွာ မေတ္တာ လက်ဆောင် ကုန်ကားကြီး တစ်စီး ပုသိမ်မြို့ကို ရောက်ရှိလာပါတော့မည်။

ဒီနှစ် c 0 v i d နှိပ်စက်လို့ ဓနုတောင်သူတွေ မှာ စီးပွားပျက်ခဲ့ရပါသည်။

ဂေါ်ဖီတစ်ထုပ် (၇၀)ကျပ်၊ ခရမ်းချဉ်သီး တစ်ပိဿာ (၁၅၀)ကျပ် တရုတ်ကိုလည်း တင်မရ၊ ကုန်စည်စီးဆင်းမှုတွေက ရပ်ဆိုင်း။နောက်ဆုံးတော့ အခင်းတွေ အခင်းတွေမှာ ဂေါ်ဖီထုပ်၊ ခရမ်းချဉ်သီးတွေ ပုံလို့။

ခူးရင် ခူးခ ထပ်ကုန်မည်။ သွားပို့ရင် ကားခ ထပ် ကုန်မည်။ ရောင်းရငွေက အလုပ်သမားခပင် မရတော့။

ဒီအဖြစ်မျိုးကို ကျွန်တော် ပင်းတယမှာ နေစဉ် ကတည်းက သူတို့ မကြာခဏ ကြုံခဲ့ကြဖူးသည်။

နောက်ဆုံးမှာ တောင်သူတွေခမျာ တစ်နှစ်တာ အပင်ပန်းခံ စိုက်ထားသော ကုန်စည်တွေ ကို နောက်တစ်ရာသီ ပြန်စိုက်ရအောင် ရင်နာနာနှင့် ထယ်ထိုးပစ်လိုက်ရရှာပါတော့သည်။

ဒီလိုနှစ်မျိုးဆို အကြွေးတွေဝိုင်းလို့၊ သူတို့ ဒုက္ခ ပင်လယ်ဝေကြတော့သည်။

သည်နှစ်တော့ ပင်းတယ ပရဟိတအဖွဲ့များက အကြံ တစ်ခု ရသည်။

အခင်းထဲက သီးနှံတွေကို ပေါက်ဈေး အတိုင်း ၀ယ်သည်။ ကားခကို သူတို့ အလှူခံသည်။ ထိုအသီးအနှံတွေကို လိုအပ်နေသော နေရာတွေကို လိုက်လှူပေးသည်။ အစီအစဉ်လေးနာမည်က “ တောင်သူကိုကူ ပြည်သူကိုလှူ”တဲ့။

တောင်သူတွေလည်း သူတို့ သီးနှံတွေ မပစ်ရတော့။ တကယ်လိုသူတွေ လက်ထဲကိုလည်း အရောက်လာလှူနိုင်ကြသည်။ ကားခကိုတော့ အလှူရှင်တွေက ဝိုင်းထည့်။ မြန်မာ့စိတ်ရင်း မြန်မာ့ရှုခင်း ဘယ်လောက်လှလိုက်တဲ့ စိတ်သဘောထားတွေပါလဲ။

သည်လိုနှင့် ကုန်ကားတွေ ရန်ကုန် ကိုရောက်လာသည်။ နတ်မောက်ကို ရောက်လာသည်။ အခြေခံ လူတန်းစားတွေကို အခမဲ့ ပေးသည်။

ဟော အခု သည်ကုန်ကားကြီး တစ်စီး ပုသိမ်ကို သဘက်ခါ မနက် (၂၇.၅.၂၀၂၀) မနက် ရောက်လာပါတော့မည်။

ဘာတွေ ပါလာမှာလဲ။

ဂေါ်ဖီထုပ် ခြောက်ထောင်၊ ခရမ်းချဉ်သီး ၆၅၀ ပိဿာ၊ မုန်လာဥနီ ပိဿာ ၁၀၀၊ ဂျူးမြစ် ပိဿာ ၁၅၀၊ ပိန္နဲသီးနု ၂၀၀၊ လက်ဖက်နှပ်ပြီးသား အထုတ်(၁၆၀)၊

ကြက်သွန်ဖြူ ၁၅ ပိဿာ၊ ကြက်သွန်နီ ၃၅၀ ပိဿာ၊ အာလူး ၂၀၀ ပိဿာ၊ လက်ဖက်ခြောက် တစ်ပုံး၊ ငရုတ်သီးစိမ်း ပိဿာ (၂၀)။

ဒါတွေကို ကျွန်တော့်ထံ သူတို့ အရောက်ပို့ပါတော့မည်။ စီစဉ်ပေးပါသော တောင်ပေါ်ကြီး ရေကြည်စမ်းပညာဒါနက အရှင်ဒေါက်တာသုမနနှင့်တပည့် တပန်းများ၊

ပင်းတယ လက်ဖက်စက်ဝန်းက မမွှေး(နန်းသရဖူတင့်)နှင့် အဖွဲ့သားများ၊ သီးနှံအလှူရှင်တောင်သူများကို ကျေးဇူးအထူးတင်လှပါသည်။

မနေ့က အဘယသီဝံဆရာတော်နှင့် တွေ့ဆုံသည်။ ဒီနေ့ ကုန်စည်ဒိုင်တွေ ပရဟိတအဖွဲ့တွေနှင့် တွေ့ဆုံသည်။

ဆရာတော်၏ လမ်းညွှန်မှုနှင့်အညီကျွန်တော်ထံ လှူလိုက်သော ကုန်စည်များကို ဆေးရုံဝန်ထမ်းများကို ဝေမည်။ မိဘမဲ့ ကျောင်း (၄)ကျောင်းနှင့် ဘိုးဘွားရိပ်သာကို ဝေမည်။

သီလရှင်စာသင်တိုက်ကို ဝေမည်။ စာသင်တိုက်ကြီး ဆယ်တိုက်ကို လိုက်လှူလိုက်ဦးမည်။ ပြီးတော့ ပုသိမ်မြို့၏ အခြေခံ လူတန်းစားများ နေထိုင်ရာ ရပ်ကွက်တစ်ချို့ကို လိုက်လံ ဝေငှ လိုက်ဦးမည်။

ဓနုတိုင်းရင်းသားများ မေတ္တာနှင့် ပေးသော အသီးအနှံများကို ကုသိုလ်လည်းရအောင်၊ တကယ်လိုသည့်နေရာတွေလည်း ရောက်အောင် အဘယသီဝံဆရာတော်နှင့် ပရဟိတအဖွဲ့များ၊ ကျန်းမာရေး ၀န်ထမ်းများက ဆောင်ရွက်ပေးကြပါမည်။

ဒီသတင်းကြားတော့ ပုသိမ်မြို့ပေါ်က ဦးတင်လှ+ဒေါ်ခင်မေသီ (ရွှေတိုက်ဆန်ကြာဇံ)က မြို့ပေါ်ကျောင်းတိုက်ကြီးများမှ သံဃာတော်များ၊ သီလရှင်များ အတွက် ဆန်ကြာဇံတွေ ထပ် လှူလိုက်ပြန်သည်။

ဦးဖိုးထောင်+ဒေါ်ကျင်အေး (ရွှေပျားတံဆိပ် ပဲငံပြာရည် ငရုပ်ဆီ)ကလည်း စာသင်တိုက်ကြီးတွေကို ပဲငံပြာရည်နှင့် ငရုတ်ဆီများ ထပ်မံ လှူဒါန်းလိုက်ကြပြန်သည်။ ကောင်းလေစွ။

ကျွန်တော့် ကို ချစ်သော၊ ကျွန်တော်က ချစ်သော ဓနု တိုင်းရင်းသားတို့၏ မေတ္တာသည် ရှမ်းတောင်တန်းကြီးဆီမှသည် ဧရာဝတီထိ စီးဆင်းလာခဲ့ပါပြီ။

မေတ္တာ ဆိုသည်မှာ နယ်မြေအကန့်အသတ်မရှိ၊ ဘယ်လောက်ဝေးဝေး နီးနီးလေး ပါလေ။

တောင်သူကိုကူ ပြည်သူ ကိုလှူရင်း ညီတူစိတ်ထားများဖြင့် ပြည်ထောင်စုကြီး ကို အလှဆုံး ဖန်တီးကြစေချင်ပါသည်။

မေတ္တာတရားနှင့် ပြည်ထောင်စု ကို ညီနောင် တစ်စုတို့က တည်ထောင်ပြုကြရ ပါဦးမည်။

Dr Than Min Htut