“လမ်းမပေါက် ၊ စာသင်ကျောင်း မရှိတဲ့ ရွာလေး မှာ တာဝန် ကျတဲ့ ကျောင်းဆရာလေး ရဲ့ အံ့မခန်း စွမ်းဆောင် မှုများ”

“လမ်းမပေါက် ၊ စာသင်ကျောင်း မရှိတဲ့ ရွာလေး မှာ တာဝန် ကျတဲ့ ကျောင်းဆရာလေး ရဲ့ အံ့မခန်း စွမ်းဆောင် မှုများ”

မိုင်း အနိုင်၊ ရွှေဖီမြေ

လွယ်ပတ်ကျေးရွာ ကို ကျောင်းဆရာပြန်ရောက်လာလို့ ကျောင်းသူ၊ ကျောင်းသားတွေနဲ့အတူ ရွာသားတွေက ပျော်ရွှင်ကြပေမယ့် ဒါဟာ ကျောင်းဆရာရဲ့ နောက်ဆုံးအကြိမ်အဖြစ် ပြန်ရောက်လာတာကိုတော့ သူတို့တွေ မသိကြပါဘူး။ ကျောင်းဆရာဖြစ်သူ မိုင်းထွန်းရွှေ ကိုယ်တိုင် ကလည်း သူတို့ကို မပြောပြပါဘူး။ သူတို့တွေ စိတ်မကောင်းဖြစ်တာကို မမြင်ချင်လို့ မပြောပြတာလို့ မိုင်းထွန်းရွှေက ပြောပါတယ်။

လွယ်ပတ်ကျေးရွာဟာ တန့်ယန်းမြို့နယ်ထဲ က ကျေးရွာတစ်ရွာဖြစ်ပြီး တောင်တန်းပတ်ပတ်လည်ရဲ့ကြားမှာ အိမ်တန်းရှည်တွေနဲ့ အင်မတန်လှပတဲ့ ကျေးရွာလေးဖြစ်ပါတယ်။

ဒီကျေးရွာလေးကို လွန်ခဲ့တဲ့ ၂၀၁၈ ခုနှစ် ၁၀ လပိုင်းက မိုင်းထွန်းရွှေ နဲ့ မိုင်းနေဗီရှင်း ဆိုတဲ့ လူနှစ်ယောက်က ကျောင်းဆရာလုပ်ဖို့ ရောက်လာကြပါတယ်။ သူတို့နှစ်ယောက်ဟာ TEI လို့ခေါ်တဲ့ တအာင်းပညာရေး အင်စတီကျူ့က ဦးစီးဦးဆောင်ဖွင့်လှစ်ထားတဲ့ ကိုယ်ထူကိုယ်ထစာသင်ကျောင်းမှာ စာသင်ကြားပေး ဖို့ လာရောက်ကြ တာဖြစ်ပါတယ်။ ဒါဟာ လွယ်ပတ်ကျေးရွာရဲ့ တစ်သက်တာမှာ ပထမဆုံး ကျောင်းစဖွင့်ခြင်း၊ ကျောင်းဆရာရှိဖူးခြင်း ဖြစ်ပါတယ်။

လမ်းပန်းဆက်သွယ်ရေးခက်ခဲပြီး မြို့ပြနဲ့ အင်မတန်ဝေးလံတဲ့ ဒီကျေးရွာလေး ဟာ စာသင်ကျောင်းရှိဖို့ နေနေသာသာ ကျေးရွာလမ်းတောင် ခြုံနွယ်ပိတ်ပေါင်းများစွာကို ကျော်ဖြတ်ပြီးမှသာ ရောက်နိုင်မှာ ဖြစ်ပါတယ်။

ဒီကျေးရွာကို ရောက်ရှိဖို့ ကျောင်းဆရာဖြစ်သူ မိုင်းထွန်းရွှေနဲ့ မိုင်းနေဗီးရှင်း တို့ဟာ နာရီပေါင်းများစွာ လမ်းလျှောက်ပြီးမှသာ ရောက်လာကြပါတယ်။ အဲဒီအချိန်က မိုးရာသီဖြစ်တဲ့အတွက် လမ်းတွေဟာလည်း ရွံ့တွေ ပွက်တွေနဲ့ အင်မတန် ခက်ခဲကြမ်းတမ်းတဲ့ လမ်းခရီးပါ။

မိုင်းထွန်းရွှေက “စစရောက်တုန်းက ကိုယ်မမြင်ဖူး တဲ့အရာတွေ သက်ကယ်အိမ်တွေဆိုတော့ တစ်မျိုးကြီးပဲ။ ရွာသားတွေနဲ့လည်း ယုံကြည်မှုတွေ သိပ်မရှိတော့ စိတ်ထဲနေလို့မကောင်းဘူး။ ဒီတိုင်းနေလည်း မထူးဘူးဆိုပြီး ရွာသားတွေနဲ့ ဘယ်လိုအဆင်ပြေအောင်နေမလဲ အမြဲစဉ်းစားဖြစ်တယ်။ စာသင်ကျောင်းတွေ ဆောက်မယ်ဆိုတော့ လည်း သူတို့က စာသင်ကျောင်းဆိုတာ မရှိဖူးဘူးလေ။ လုပ်ပေးမယ်ပဲ ပြောတယ်။ အဲတုန်းက သူတို့ လုပ်ချင်စိတ်မရှိဘူး” လို့ ပြောပါတယ်။

ကျောင်းဖွင့်ချိန် ၄ လကျော်ပြီးမှသာ ဖွင့်ရတဲ့အတွက် စာသင်ကျောင်း ကို ယာယီအားဖြင့် ဘုန်းကြီးကျောင်းရဲ့ ဇရပ်မှာပဲ သင်စေခဲ့ပါတယ်။ အဲတုန်းက ကျောင်းတက်တဲ့ ကျောင်းသားဦရေဟာ ၄၀ ဝန်းကျင်သာရှိတာမို့ အိမ်ထောင်စုပေါင်း ၈၇ အိမ်ရှိနေတဲ့ ဒီကျေးရွာမှာ ကျောင်းတက်တဲ့ ကလေးဦးရေဟာ အင်မတန် နည်း ပါတယ်။

နောက်ပိုင်းမှာတော့ ကျောင်းနေရွယ်ကလေးတွေ ကျောင်းတက် လာဖို့ ကျောင်းဆရာ ၂ ယောက်ဟာ ကျေးရွာထဲကို တစ်အိမ်တက်တစ်အိမ်ဆင်းသွားရောက်ခဲ့ပြီး ပညာရေးရဲ့ ကောင်းကျိုးကို ရှင်းပြရပါတော့တယ်။

“ကျောင်းလုပ်ဖို့ အစည်းအဝေးခေါ်လည်း အဆင်မပြေတော့ တစ် အိမ်တက် တစ်အိမ်ဆင်း ကျောင်းဖွင့်ရခြင်းရဲ့ အကျိုးရလဒ်တွေ ပြောပြပြီး စည်းရုံးတယ်။ ကျောင်းဖွင့်ရင် ဘယ်လိုဖွံ့ဖြိုးတိုးတက်လာမယ်။ ပြီးတော့ ကလေးတွေ ပညာတတ်ရင် ဘယ်လို အကျိုးရှိမလဲ အာပေါက်အောင် ရှင်းပြခဲ့ရတယ်” လို့ မိုင်းထွန်းရွှေက ပြောပါတယ်။

နောက်ပိုင်းမှာတော့ ကျေးရွာသားတွေဟာ ကျောင်းဆရာ နှစ်ယောက် ရဲ့ စည်းရုံးမှုတွေကြောင့် စာသင်ကျောင်း စတင်ဆောက်လုပ်ပါတော့တယ်။ စာသင်ကျောင်းဆောင် တစ်ဆောင်နဲ့ ကျောင်းကပ်ရပ်မှာ ကျောင်းဆရာတွေ နေထိုင်ဖို့ အိမ်သေးတစ်လုံးပါ ထပ်ဆောက်ပေးပါတယ်။

နောက်ပိုင်းမှာတော့ ကျောင်းဆရာ ၂ ယောက်ဟာ တစ်ဆင့် တိုးပြီး မြို့ပြနဲ့ ဝေးလွန်းတာမို့ ခရီးသွားခရီးလာလို့ ပိုမိုအဆင်ပြေအောင် ဆိုင်ကယ်လမ်းဖောက်လုပ်ဖို့ စတင်စည်းရုံးပါတော့တယ်။ ဒါ့အပြင် တစ်ရွာနဲ့တစ်ရွာ သွားလာနေတဲ့ လမ်းတွေကိုလည်း ခြုံတွေမရှိအောင် ရှင်းဖို့လည်း စည်းရုံးရပါတယ်။

“အရင်တုန်းက ခြေလျင်နဲ့လာတာ အဆင်မပြေဘူး။ ကျွန်တော် လည်း အဲလောက်ခရီးဝေး မသွားဖူးဘူးလေ။ ဆိုင်ကယ်လမ်းကို ရွာသားတွေသာ စည်းလုံးညီညွတ်မှုရှိရင် ရနိုင်တယ်ဆိုပြီးတော့ ဖောက်တယ်။ တစ်ရွာနဲ့တစ်ရွာ သွားဖို့ဆိုလည်း ခြုံတွေနဲ့ ပြည့်နေတယ်။ ရွာသားတွေကို ခေါ်တယ်။ အချို့က မသွားချင်ဘူး။ အဲဒါကို သူတို့ဆီသွားပြီး ဓားတွေ ပေါက်တူးတွေယူပြီး ကိုယ်တိုင်လုပ်မှ သူတို့လိုက်လုပ်လာတာ။ အဲကနေ တစ်ဖြည်းဖြည်း သူတို့နဲ့ ယုံကြည်မှုရှိလာတာ” ဆိုပြီး မိုင်းထွန်းရွှေက ကြုံတွေ့ခဲ့ရတဲ့ အခြေအနေကို ပြောပြပါတယ်။

၂၀၁၈-၂၀၁၉ ပညာသင်နှစ်အပြီးမှာ လွယ်ပတ်ကျေးရွာဟာ ဆိုင်ကယ်လမ်း ပေါက်သွား သလို ကျောင်းနေရွယ် ကလေးငယ်တွေ တိုးလာပါတယ်။ ဒါ့အပြင် ကျောင်းဆရာ ၂ ယောက်ဟာ ကျေးရွာသားတွေရဲ့ ယုံကြည်မှုကိုလည်း ရသွားတယ်လို့ ဆိုရမှာဖြစ်ပါတယ်။

၂၀၁၉-၂၀၂၀ ပညာသင်နှစ်ရောက်တော့ မိုင်းနေဗီးရှင်းဟာ ရှမ်းပြည်တောင်ပိုင်းဘက် တာဝန်ကျ သွားပြီး မိုင်းထွန်းရွှေကတော့ လွယ်ပတ်ကျေးရွာကျောင်းဆရာအဖြစ် ထပ်လုပ်ရပြန်ပါတယ်။ နောက်ကျောင်းဆရာအသစ်တစ်ဦးနဲ့အတူပေါ့။

ဒီနှစ်မှာတော့ လွယ်ပတ်ကျေးရွာမှာ ရေရရှိဖို့ ပထမဆုံးလုပ်ငန်းစဉ် အဖြစ် ကျောင်းဆရာ ၂ ယောက်က စတင်ကြိုးစားကြပါတယ်။ လွယ်ပတ်ကျေးရွာခံတွေ ရေသွားရောက် ခပ်ယူတဲ့နေရာဟာ ဝေးလွန်းတာမို့ ရေတစ်ပုံးရရှိဖို့ အင်မတန် ခက်ခဲပါတယ်။

“ရေလည်း ရေစီးချောင်းမှာ အဝေးကြီးသွားခပ်ရတာ။ သူတို့အလုပ် ကလည်း ညနောက်ကျမှ ပြန်လာကြတာ။ အဲဒါနဲ့ ရေကို ရေစီးချောင်းကနေ ရွာရောက်လာတဲ့အထိ ဝါးနဲ့လုပ်ဖို့ စည်းရုံးတယ်။ အဲဒါလုပ်တော့ ဝါးတွေ အများကြီး ကုန်တယ်။ ရေရောက်တော့ ရေပိုက်အလှူရှင်တွေ လိုက်ရှာပေးတော့ အလှူရှင်ရလာတယ်။ အခုဆို ရေလည်း အဆင်ပြေလာတယ်” လို့ မိုင်းထွန်းရွှေက ပြောပါတယ်။

တစ်စတစ်စ ဖွံ့ဖြိုးတိုးတက်လာတဲ့ လွယ်ပတ်ကျေးရွာမှာ ကျောင်းဆရာ မိုင်းထွန်းရွှေနဲ့ ကျေးရွာသားတွေ ဆက်ဆံရေးဟာလည်း မိသားစုသဖွယ် ဖြစ်လာပါတော့တယ်။ ဆိုင်ကယ်လမ်းပေါက်လို့ ကျေးရွာသားတွေကလည်း ဆိုင်ကယ်ကို စတင်ဝယ်စီးလာပါတော့တယ်။

စာသင်ကျောင်းဆောင်ဟာလည်း တဖြည်းဖြည်းတိုးတက်လာပြီး ခြံဝင်းဟာလည်း ကျယ်လာပါတယ်။ ကျောင်းသားတွေထိုင်ဖို့ ထိုင်ခုံတွေကလည်း ဝါးကနေ သစ်တွေအဖြစ် ပြောင်းလဲလာပါတယ်။ ကျောင်းဆရာရဲ့ ခြံဝင်းဟာလည်း အမြဲတမ်း သန့်ရှင်းသပ်ရပ်နေတာကို တွေ့မြင်ရမှာဖြစ်ပါတယ်။

ကျေးရွာသားတွေဟာ စာသင်ကျောင်းဝင်းနဲ့ ကျောင်းဆရာတို့ရဲ့အဆောင်ကို နေ့စဉ် သန့်ရှင်းရေး လာလုပ် ပေးကြပါတယ်။ ဟင်းကောင်းရှိရင်လည်း ကျောင်းဆရာကို ပထမဦးဆုံး လာရောက်ပေးကြသလို ကျောင်းဆရာ စားဝတ်နေရေး အဆင်ပြေအောင်လည်း ကျေးရွာသားတွေက စဉ်ဆက်မပျက် ထောက်ပံ့ပေးခဲ့ကြပါတယ်။

မိုင်းထွန်းရွှေဟာ လွယ်ပတ်ကျေးရွာကို ကားလမ်းပေါက်ဖို့ စိတ်ဆန္ဒရှိတဲ့အတွက် ကျေးရွာသားတွေနဲ့ လမ်းဖောက်လုပ်ဖို့ စည်းရုံးခဲ့ပါတယ်။ တကယ်တမ်း ကားလမ်းပေါက်ဖို့ဟာ အင်မတန် ခက်ခဲပါတယ်။

အကြောင်းအရင်းကတော့ ဖောက်လုပ်ရမယ့်လမ်းဟာ အင်မတန်ဝေးလွန်းသလို ဖောက်ရမယ့်လမ်းဟာလည်း ကျောက်တွေ အင်မတန်များတာမို့ ဖြစ်နိုင်ခြေက နည်းပါတယ်။ ဒါကြောင့် ကျေးရွာသားတွေက အလုပ်များနေတယ်ဆိုတဲ့ အကြောင်းပြချက်ပေးပြီး ကျောင်းဆရာဖြစ်သူ မိုင်းထွန်းရွှေရဲ့ စည်းရုံးမှုကို ခေါင်းရှောင်ကြပါတယ်။

“ကျွန်တော် သူတို့ကိုပြောတာ။ ခင်ဗျားတို့အလုပ်က တစ်သက်လုံး လုပ်လို့လည်း ပြီးမှာမဟုတ်ဘူး။ ဒီလမ်းဆိုတာက လုပ်မှပြီးမှာ။ အကုန်လုံး တစ်ခါတည်းပြီးဖို့ လုပ်ရမယ်ပြောတာ မဟုတ်ဘူး။ နည်းနည်းချင်း လုပ်ရမယ်လို့ ပြောတာလို့ သူတို့ကို ပြောလိုက်တယ်” ဆိုပြီး သူက ဆိုပါတယ်။

သီတင်းကျွတ်ကျောင်းပိတ်ရက်ရောက်တော့ မိုင်းထွန်းရွှေဟာ သူ့ရဲ့ ဇာတိရွာဖြစ်တဲ့ ကွတ်ခိုင်မြို့နယ် လော့ခွမ်အုပ်စု ဝင်္ဂကာဘာကျေးရွာကို ပြန်သွားပါတယ်။

အဲဒီနောက်မှာတော့ ရွာသားတွေဟာ ကိုယ့်အဝတ်အစား၊ ကိုယ်အစားအသောက် ကိုယ်စီနဲ့ ပေါက်တူး၊ ပေါက်ပြားတွေ ထမ်းပြီး လမ်းမှာတင် ညအိပ်ပြီးတော့ ကားလမ်း သွားဖောက်ပါတော့တယ်။ ပိတ်ရက်ပြီးတော့ မိုင်းထွန်းရွှေက ပြန်လာပါတယ်။

“ကျွန်တော်ထင်တာက သူတို့ကျွန်တော့်ကို စိတ်ဆိုးလို့ လုပ်တယ်မှတ်ပြီး စိတ်မကောင်းဖြစ်နေ တာ။ သူတို့ကို ပြန်မေးကြည့်တော့ သူတို့က ငါတို့ဆရာကောင်းဖို့အတွက် ခိုင်းတာကို ငါတို့က ငြင်းနေတာ မဖြစ်သင့်ဘူးဆိုပြီးတော့ လာလုပ်တာတဲ့” လို့ ပြောပါတယ်။

ကျောင်းဆရာ၂ ဦးစလုံးအပါအဝင် ရွာသားတွေဟာ လမ်းမှာညအိပ်ပြီး လမ်းတွေဖောက် လုပ်ပါတော့တယ်။ အစားအသောက် အခက်အခဲဖြစ်လာတာကြောင့် ကိုယ်ထူကိုယ်ထ လမ်းဖောက်လုပ်တာကိုမြင်ပြီး အနယ်နယ်ရပ်ရပ်က အလှူရှင်တွေက လာရောက်လှူဒါန်းတာကြောင့် လမ်းဖောက်တာ အဆင်ပြေလာပါတယ်။

ကားလမ်းကို မနားတမ်းဖောက်လုပ်လာပြီး ၄၅ ရက်အကြာမှတော့ လမ်းဖောက်တာ အောင်မြင်စွာ ပြီးဆုံးသွား ပါတော့တယ်။ လမ်းဖွင့်ပွဲမှာတော့ ကားတစ်စီးဟာ လွယ်ပတ်ရွာကို ပထမဆုံးအဖြစ် ရောက်ရှိလာကြပါတော့တယ်။

ဒီလိုနဲ့ ၂၀၁၉-၂၀၂၀ ပညာသင်နှစ်ဟာ ပြီးဆုံးသွားလို့ ကျောင်းဆရာ နှစ်ယောက်ဟာ နေရပ်ကိုယ်စီပြန်ကြပါ တော့တယ်။ ကျောင်းဆရာ မိုင်းထွန်းရွှေက မဖွံ့ဖြိုးမတိုးတက်သေးတဲ့ ကျေးရွာတစ်ရွာကို ထပ်မံ တာဝန်ထမ်းဆောင်ချင်တာကြောင့် ဖွံ့ဖြိုးသင့်သလောက် ဖွံ့ဖြိုးလာနေတဲ့ လွယ်ပတ်ကျေးရွာမှာ တာဝန် မထမ်းဆောင်တော့ဘူးလို့ ပြောပါတယ်။

ဆောင်းပါးရေးသူတို့ လွယ်ပတ်ကျေးရွာရောက်တိုင်း ရွာသားတွေက ကျောင်းဆရာ မိုင်းထွန်းရွှေ ဘယ်တော့ ပြန်လာမလဲလို့ အမြဲလိုလို မေးပါတယ်။

“ဒီနှစ်လည်း အဲဒီကျောင်းဆရာပဲ ပြန်လာမှာမလား” လို့ ရွာသားတွေက မကြာခဏ မေးလေ့ ရှိပါတယ်။

သံယောဇဉ် မပျက်နိုင်တဲ့ မိုင်းထွန်းရွှေဟာ လွယ်ပတ်ကျေးရွာကို ပြီးခဲ့တဲ့ မေလ ၁၉ ရက်မှာ သွားရောက် ခဲ့ပါတယ်။ ဒါဟာ ရွာသားတွေကို နောက်ဆုံးနှုတ်ဆက်ဖို့ လာတယ်ဆိုတာကို မသိတဲ့အတွက် အကုန်လုံးက ဝမ်းသာကြပါတယ်။

“ကျွန်တော် ဒီရွာမှာ ကျောင်းဆရာလာမလုပ်တော့ဘူးလို့ သူတို့ကို မပြောပြဘူး။ သူတို့ ဝမ်းနည်း မှာ ကြောက်တယ်။ သူတို့က ပြန်လာမှာလားမေးတော့ ကျွန်တော်က မသိသေးဘူးလို့ပဲ ပြောထားတယ်။

ကျွန်တော်ကတော့ ကျွန်တော့်ကျောင်းဆရာ သက်တမ်းမှာ အခြားဒီလိုရွာတွေ သွားချင်သေး တယ်လေ။ အားရင်တော့ လွယ်ပတ်ကို လာအုံးမှာပါ” လို့ ပြောပါတယ်။

ရွာသားတွေကတော့ ကျောင်းဖွင့်ချိန်ရောက်ရင် ရွာအကျိုး သယ်ပိုးဆောင်ရွက် ခဲ့တဲ့ မိုင်းထွန်းရွှေကို ဧကန်မလွဲ စောင့်မျှော်နေကြမှာပါ။

#ဓာတ်ပုံ – မိုင်းထွန်းရွှေ

#ကျောင်းဆရာ #လွယ်ပတ် #နှုတ်ဆက်ချိန်

Add a Comment

Your email address will not be published. Required fields are marked *

14 + twenty =