တောင်ကိုရီးယား မှာ ကိုဗစ် ကူးစက်မှု အသစ်များ တွေ့ရှိခြင်းကြောင့် စာသင်ကျောင်း များ ပြန်ပိတ်

တောင်ကိုရီးယားမှာ ကိုဗစ် ကူးစက်မှု အသစ်များ တွေ့ရှိခြင်း ကြောင့် စာသင်ကျောင်းများ ပြန်ပိတ်ပြီး ပိတ်ဆို့မှုများ ထပ်မံပြုလုပ်…

တောင်ကိုရီးယားနိုင်ငံ တွင် ကျောင်းများ ပြန်ဖွင့်ပြီး ရက်ပိုင်းအတွင်း ကိုရိုနာဗိုင်းရပ်စ် ကူးစက်ခံရမှု အသစ်ဖြစ်ပွားခဲ့တာကြောင့် စာသင်ကျောင်းပေါင်း ၂၀၀ ကျော်ကို ချက်ခြင်းပြန်ပိတ်ခဲ့ပြီး ကျောင်းသားများ အွန်လိုင်းစာသင်ခန်းများဆီ ပြန်သွားနေကြရပါတယ်။

လွန်ခဲ့သည့် ၂၄ နာရီအတွင်း ဗိုင်းရပ်စ် အသစ်ဖြစ်ပွားမှု ၅၆ မှု ရှိခဲ့ပြီး မနေ့က ၇၉ ဦးထိ တွေ့ရှိခဲ့တာကြောင့် နှစ်လအတွင်း အမြင့်ဆုံးအခြေအနေကို ရောက်ခဲ့ခြင်းဖြစ်ပါတယ်။ အခုလို ဗိုင်းရပ်စ် ကူးစက်ခံရမှု အသစ်ဖြစ်ပေါ်လာရခြင်းဟာ လူထူထပ်လွန်းသည့် နေရာများနှင့် ဆက်နွယ် နေခြင်းကြောင့် ဖြစ်ကြောင်း သိရသည်။

ကူးစက်ခံရမှုအသစ်တွေ့ရှိသူ အများစု မှာ ဆိုလ်းမြို့ အနောက်ပိုင်း ဘူချွန်းရှိ ကုန်ပစ္စည်းများဖြန့်ဝေရာ ကူပန်းဂိုဒေါင်နေရာနှင့် ဆက်စပ်လျှက်ရှိကြောင်း သိရသည်။ အဆိုပါဂိုဒေါင်ကြီးမှာ နိုင်ငံအတွင်း အွန်လိုင်းရောင်းဝယ်ရေး ပစ္စည်းများကို ဖြန့်ဖြူးပေးသည့် အကြီးဆုံးနေရာကြီးဖြစ်ကာ ကိုရိုနာ ဗိုင်းရပ်စ် ကာကွယ် တားဆီးရေး လမ်းညွှန်ချက်များကို တိတိကျကျလိုက်နာမှု အားနည်းကြောင်း တာဝန်ရှိသူများက ပြောကြားခဲ့ပါတယ်။

Covid-19 ရောဂါပိုးကို အလုပ်သမားများ၏ ရူးဖိနပ်နဲ့ အဝတ်အစားတွေ ပေါ်မှာ ခြေရာခံတွေ့ရှိရကြောင်း ကျန်းမာရေးဆိုင်ရာတာဝန်ရှိသူများက ဆိုပါတယ်။ အဆိုပါဂိုဒေါင်မှာ အလုပ်လုပ်နေကြတဲ့ ထောင်နဲ့ချီတဲ့ အလုပ်သမားတွေကို စစ်ဆေးမှုတွေ ပြုလုပ်ခဲ့ကြပြီး လာမယ့် နှစ်ပတ်အတွင်းမှာ အခြားသော ကုန်ပစ္စည်းဖြန့်ဖြူးရေး ဂိုဒေါင်တွေ ကိုလည်း ဆက်လက်စစ်ဆေးသွားမည်ဖြစ်ကြောင်း သိရသည်။

ဒီအခြေအနေကြောင့် ဘူချွန်းမှာရှိတဲ့ စာသင်ကျောင်း ၂၅၁ ကျောင်းကို ပြန်ဖွင့် ခဲ့ပြီး ရက်ပိုင်းအတွင်းမှာပင် ပြန်ပိတ်ဖို့ ချက်ခြင်းညွှန်ကြားခဲ့ရသလို အခြားသော နေရာများမှ ရာနဲ့ချီတဲ့ ကျောင်းတွေလည်း ပြန်လည်ဖွင့်လှစ်ဖို့အရေး နှောင့်နှေးနေပါတယ်။

ဆိုလ်းမြို့က ကျောင်းသားလေး တစ်ဦးမှာ ဗိုင်းရပ်စ်ရှိနေတာကို စစ်ဆေးတွေ့ရှိခဲ့ပြီး အဆိုပါ ကျောင်းသားရဲ့ မိခင်ဟာ ကူပန်းဂိုဒေါင်မှာ အလုပ်လုပ်ကိုင်သူဖြစ်ပါတယ်။ ကျန်းမာရေးတာဝန်ရှိသူတွေကတော့ ကန့်သတ်ချက်တွေနဲ့ လူခွာနေခြင်း social distancing တွေကို လာမယ့် နှစ်ပတ်မှာ ပိုမိုတင်းကျပ်စွာ လုပ်ဆောင်သွားမယ်လို့ ပြောကြား ခဲ့ပါတယ်။

တောင်ကိုရီးယားနိုင်ငံ တာဝန်ရှိသူများ၏ အရေးပေါ်အစည်းအဝေးဆုံးဖြတ်ချက်အရ အများပြည်သူ တို့သွားလာရာဖြစ်သော ဥယျာဉ်များ၊ ပြတိုက်များ အစရှိသည်တို့ကို နောက်ထပ်ရက်သတ္တ ၂ ပတ် ထပ်မံပိတ်ရန် ဆုံးဖြတ်ခဲ့သည်။ ထို့အတူပင် ဆိုးလ်မြို့နယ်ပယ်အတွင်းရှိ ပုဂ္ဂလိက သင်တန်းကျောင်းများနှင့် ကွန်ပြူတာဂိမ်းဆိုင်များကိုလည်း အဆိုပါ ရက်သတ္တ ၂ ပတ်အတွင်းပိတ်ထားရန်ကိုပါ ညွှန်ကြားခဲ့သည်။

”အခုကစပြီး နောက်ထပ် ၂ပတ်အတွင်းမှာ ဗိုင်းရပ်ထိန်းချုပ်မှုကို ဆောင်ရွက်ရမှာ ဖြစ်ပါတယ်” ဟု ကျန်းမာရေးဝန်ကြီး Park Neung-hoo က ပြောကြားသည်။ မြို့တော်ဧရိယာတွင်းရှိ ကုမ္ဗဏီများကိုလည်း နာမကျန်းဖြစ်သော ဝန်ထမ်းများနှင့်ပတ်သက်၍ သတိပြုရန်နှင့် မလိုလားအပ်ပဲ လူစုလူဝေးပြုလုပ်ခြင်း များကို ရှောင်ကြဉ်ရန် ညွှန်ကြားခဲ့သည်။

ယင်း ရက်သတ္တ ၂ ပတ်မှာ မေလ ၂၉ ရက်နေ့မှ စတင်မည် ဖြစ်ကြောင်းသိရသည်။

(ပိုပိုလေး,PNJ)

Add a Comment

Your email address will not be published. Required fields are marked *

4 × two =