မုံရွာတွင် အရက်ကြောင် နေသူက Quarantine စင်တာ လုံခြုံရေး များကို ဓါးဖြင့် လိုက်ခုတ်
မုံရွာတွင် အရက်ကြောင် နေသူက Quarantine စင်တာ လုံခြုံရေး များကို ဓါးဖြင့် လိုက်ခုတ်
စစ်ကိုင်းတိုင်း မုံရွာမြို့တွင် အရက်ကြောင်နေသူ တစ်ဦးက Quarantine စင်တာအတွင်း လုံခြုံရေးဆောင်ရွက်နေသူများကို ဓားဖြင့် ဝင်ခုတ်မှု ဖြစ်ပွားခဲ့ကြောင်း သိရသည်။
ယနေ့မနက် ၆ နာရီကျော်ခန့်က မုံရွာမြို့ အောင်ချမ်းသာ ရပ်ကွက်ရှိ စာသင်ကျောင်း Quarantine စင်တာတွင် လုံခြုံရေးအဖြစ်ဆောင်ရွက်နေကြသည့် ရပ်ကွက်အုပ်ချုပ်ရေးမှူး၊ ရာအိမ်မှူးများနေထိုင်ရာ အဆောင်အတွင်းသို့ အရက်ကြောင်နေသူတစ်ဦးက ဝင်ရောက်လာကာ ဓားဖြင့်လိုက်ခုတ်ခဲ့ခြင်းဖြစ်သည်ဟု အခင်းဖြစ်နေရာ တွင် ရှိနေခဲ့သည့် ကိုတိုးဝေအောင် က ပြောသည်။
ကျူးလွန်သူမှာ အောင်ချမ်းသာ ရပ်ကွက်နေ အသက်(၃၀)နှစ် အရွယ် ရှိ ကိုအူဝဲ ဆိုသူဖြစ်ကြောင်း သိရသည်။
ကိုအူဝဲသည် ဓားဖြင့်လိုက်ခုတ်ပြီးနောက် အဆောင်အပြင် ဘက်သို့ ထွက်ပြေးသွားပြီး Quarantine စင်တာ အပြင်ဘက်၌် လမ်းလျှောက်နေသည့် အောင်ချမ်းသာရပ်ကွက် နယ်မြေ (၃) နေ ဦးအောင်ခိုင် (စိတ်မနှံ့သူ) ကို ဓါးဖြင့်ခုတ်ခဲ့ကြောင်း၊ ယင်းကြောင့် ဦးအောင်ခိုင်တွင် ဦးခေါင်း၊ ကျော နှင့် ခါးတို့တွင် ဓါး ဒဏ်ရာ များ ရရှိခဲ့ကြောင်း သိရသည်။
ယင်းနောက် ကိုအူဝဲသည် အနီးအနားတွင် ဆိုင်ကယ်စီးလာသည့် အမျိုးသမီး တစ်ဦးကိုတားကာ ဆိုင်ကယ် ကို လုယူထွက်ပြေးသွား ခဲ့ကြောင်း ကိုတိုးဝေအောင်၏ ပြောပြချက် အရ သိရသည်။
“ညကလည်း မနက် လေးနာရီလောက် မှ အိပ်ရတော့ ကျွန်တော်တို့လည်း အိပ်နေတာ။ အဲ့ဒီအချိန်မှာ Quarantine ထဲမှာ ထိန်းသိမ်းထားတဲ့ ဓါးရှည်ကို ယူပြီးတော့ ရာအိမ်မှူးတွေရော ကျွန်တော်တို့ကိုရော လိုက်ခုတ်တာ။ ကျွန်တော်တို့ ဆီမှာလည်း ဘာလက်နက်မှ မရှိတော့ သူ့ကို တားမရဘူး။ သူက ဓါးနဲ့ လိုက်ခုတ်ချိန်မှာ ကျွန်တော်တို့ ကတားကြတော့ အပြင်ကို ထွက်သွားတယ်။ အဲ့ဒီမှာ လမ်းလျှောက်လာတဲ့ စိတ်မနှံ့တဲ့သူကို ဓါးနဲ့ ခုတ်တာ။ ခုတ်ပြီး ထွက်ပြေးပြီးတော့ တစ်ပြလောက်လည်းရောက်ရော အမျိုးသမီးတစ်ဦးဆီက ဆိုင်ကယ်ကို လုပြီး ဓါးတစ်ချောင်း နဲ့ ထွက်ပြေးသွားတယ်” ဟု ကိုတိုးဝေအောင် ကပြောသည်။
ကျူးလွန်သူ ကိုအူဝဲသည် အခင်းမဖြစ်ခင် ညပိုင်းက ရပ်ကွက် အတွင်းရှိ လူနေအိမ်များတွင် ပစ္စည်းခိုးရန် ဆောင်ရွက်နေသဖြင့် ရုံးခန်းသို့ ခေါ်ယူစစ်ဆေးခဲ့သေးကြောင်း သိရသည်။
ယင်းဖြစ်စဉ် နှင့် ပတ်သက်၍ ရဲစခန်းတွင် တိုင်တန်းအမှုဖွင့်ထားပြီး ကျူးလွန်သူ ကို ဖမ်းဆီးရမိမှု မရှိကြောင်း အောင်ချမ်းသာရပ်ကွက် အုပ်ချုပ်ရေးမှူး ဦးကျော်နိုင်က ပြောသည်။
(ငြိမ်းသူမင်း)
