ကမ္ဘာ့ဘဏ် က မြန်မာနိုင်ငံ အတွက် ချေးငွေ အမေရိကန် ဒေါ်လာ သန်း(၄၆၀) အတည်ပြု

ကမ္ဘာ့ဘဏ် က မြန်မာနိုင်ငံ အတွက် ချေးငွေ အမေရိကန် ဒေါ်လာ သန်း(၄၆၀) အတည်ပြု

မြန်မာနိုင်ငံတွင် လျှပ်စစ် ဓာတ်အား ထုတ်လုပ်မှု စက်စွမ်းရည်တိုးမြှင့်နိုင်ရန်နှင့် ကျန်းမာရေးစောင့်ရှောက်မှုလုပ်ငန်းများ မြှင့်တင်ရေးစီမံကိန်းတို့အတွက် အသုံးပြုရန် ချေးငွေ အမေရိကန်ဒေါ်လာ သန်း ၄၆၀ ကိုအတည်ပြုခဲ့ကြောင်း ကမ္ဘာ့ဘဏ်က မေလ ၂၉ ရက်နေ့တွင် ထုတ်ပြန်ခဲ့သည်။ လျှပ်စစ်ဓာတ်အား ထုတ်လုပ်မှု စက်စွမ်းရည် တိုးမြှင့်နိုင်ရန်နှင့် မြန်မာနိုင်ငံ ၏ လျှပ်စစ် ဓာတ်အားပေး စနစ်သည် ရာသီဥတုပြောင်းလဲမှုဒဏ်၊ သဘာဝဘေးအန္တရာယ်များကို ခံနိုင်စွမ်းမြှင့်တင်နိုင်ရန် စီမံကိန်းအတွက် ကမ္ဘာ့ဘဏ်၏ အပြည်ပြည်ဆိုင်ရာ ဖွံ့ဖြိုးရေးရန်ပုံငွေ အသင်း (IDA) မှ ချေးငွေ အမေရိကန်ဒေါ်လာ သန်း ၃၅၀၊ ၂၀၁၅ခုနှစ်မှစတင်ဆောင်ရွက် ခဲ့သည့် ပဏာမကျန်းမာရေး စောင့်ရှောက်မှုလုပ်ငန်းများ မြှင့်တင်ရေးစီမံကိန်းအတွက် ချေးငွေ သန်း ၁၁၀၊ စုစုပေါင်း သန်း ၄၆၀ ကို ကမ္ဘာ့ဘဏ်က အတည်ပြု ခဲ့ခြင်းဖြစ်သည်။

လျှပ်စစ်ဓာတ် အားစနစ် စက်စွမ်းရည် မြှင့်တင်ရေး စီမံကိန်းသည် ရွာမဓာတ်အားပေး စက်ရုံအား အဆင့်မြှင့်တင်သွားမည်ဖြစ်ရာ ရန်ကုန်တိုင်းဒေသကြီးအတွင်းရှိ ပြည်သူများအတွက် လျှပ်စစ်ဓာတ်အားတိုးတက်ရရှိနိုင်ပြီး လျှပ်စစ်ဓာတ်အားပြတ်တောက်မှုများ လျော့နည်းလာစေရန် ရည်ရွယ်ကြောင်း၊ ဓာတ်အားပေး စက်ရုံနှင့် လျှပ်စစ်ဓတ်အားပို့လွှတ်သည့် စနစ်များအား အဆင့်မြှင့်တင်ခြင်းကြောင့် ကျန်တိုင်းဒေသကြီးနှင့် ပြည်နယ်များအတွက်လည်း လျှပ်စစ်ဓာတ်အား ပိုမိုထုတ်လုပ်ပို့လွှတ်နိုင်မည်ဖြစ်ရာ ဒေသအသီးသီးမှ အိမ်ထောင်စုများ ယခုထက်ပိုမို၍ နိုင်ငံတော်ဓာတ်အား စနစ်နှင့် ချိတ်ဆက်ကာ လျှပ်စစ်မီးရရှိစေမည်ဖြစ်ကြောင်း ကမ္ဘာ့ဘဏ်က ဆိုသည်။

မြန်မာနိုင်ငံရှိ အိမ်ထောင်စုများ၏ ၅၀ ရာခိုင်နှုန်း ကသာ နိုင်ငံတော်လျှပ်စစ်ဓာတ်အားစနစ်နှင့် ချိတ်ဆက်နိုင်သေးသည့်အတွက် အရှေ့တောင်အာရှတွင် လျှပ်စစ်ဓတ်အား ရရှိမှုနှုန်း အနည်းဆုံးအနေအထားတွင် ရောက်ရှိနေကြောင်း၊ ယခု စီမံကိန်းသည် လျှပ်စစ်ဓာတ်အားကို သက်သာသည့်နှုန်းထားဖြင့် ထုတ်လုပ်ကာ သဘာဝပတ်ဝန်းကျင် အတွက် အကျိုးရှိစေသည့် နည်းလမ်းများဖြင့် ဖြည့်ဆည်းပေးမည်ဖြစ်သဖြင့် ၂၀၃၀ ပြည့်နှစ်မတိုင်မီ မြန်မာတစ်နိုင်ငံလုံး လျှပ်စစ်မီးရရှိနိုင်ရေး ရည်မှန်းချက်အား အထောက်အကူပြနိုင်မည်ဖြစ်ကြောင်း ကမ္ဘာ့ဘဏ်၏ မြန်မာနိုင်ငံ၊ ကမ္ဘောဒီးယားနိုင်ငံနှင့် လာအိုနိုင်ငံ ဆိုင်ရာ ညွှန်ကြားရေးမှူး မစ်မာရီယာန်ရှာမန်က ပြောကြားခဲ့သည်။

ကျန်းမာရေးနှင့် အားကစားဝန်ကြီးဌာနက ဆောင်ရွက်လျှက် ရှိသည့် အရည်အသွေးပြည့်ဝသည့် မရှိမဖြစ်လိုအပ်သော ကျန်းမာရေးစောင့်ရှောက်မှုစီမံချက်အား ထပ်ဆောင်းရန်ပုံငွေအဖြစ် IDAမှ ချေးငွေ သန်း ၁၀၀နှင့် ကမ္ဘာလုံးဆိုင်ရာ ဘဏ္ဍာရေးအစီအစဉ်(Global Financing Facility)မှ ထောက်ပံ့ငွေ ၁၀ သန်းတို့ဖြင့် ဆက်လက် ဆောင်ရွက်သွားမည်ဟု ကမ္ဘာ့ဘဏ်က ဆိုသည်။ယင်းစီမံချက်သည် ၂၀၁၅ ခုနှစ်မှစတင်ကာ မြို့နယ်ဆေးရုံများ၊ ကျေးလက်ကျန်းမာရေးဌာနများအပါအဝင် တစ်နိုင်ငံလုံးရှိ ပဏာမကျန်းမာရေးဌာနစုစုပေါင်း ၁၂၀၀၀ ကျော်အား ပံ့ပိုးပေးနိုင်ခဲ့ပြီး ရှေ့တန်း ကျန်းမာရေးဌာနများတွင် ကျန်းမာရေးစောင့်ရှောက်မှု လုပ်ငန်းများတိုးချဲ့နိုင်ရန် လစဉ်သုံးစရိတ်များကို ပေးအပ်ခဲ့သည်ဟု ဆိုသည်။

မရှိမဖြစ်လိုအပ်သော အရည်အသွေးမီ ကျန်းမာရေးစောင့်ရှောက်မှု လုပ်ငန်းများ လက်လှမ်းမီရေး စီမံချက်အတွက် ကမ္ဘာ့ဘဏ်၏ ထပ်ဆောင်းရန်ပုံငွေ ချေးငွေနှင့် ကမ္ဘာလုံးဆိုင်ရာ ဘဏ္ဍဘာရေးအစီအစဉ်မှ ရန်ပုံငွေအတည်ပြုနိုင်သည့်အတွက် ကျေးဇူးတင်ဝမ်းမြောက် မိကြောင်း၊ အမျိုးသားကျန်းမာရေး စီမံကိန်း(၂၀၁၇-၂၀၂၁)၏ ရည်မှန်းချက်များသို့ ရောက်ရှိနိုင်ရန် အဓိကကျသည့် ပံ့ပိုးမှုများ ပြုလုပ်သွားနိုင်မည်ဖြစ်ပြီး တစ်နိုင်ငံလုံးရှိပြည်သူများအတွက် မရှိမဖြစ်လိုအပ်သည့် အရည်အသွေးပြည့်ဝသော ပဏာမကျန်းမာရေး စောင့်ရှောက်မှုများ တိုးမြှင့်ပေးအပ်နိုင်မည် ဖြစ်ကြောင်း၊ မြန်မာနိုင်ငံ၏ ရေရှည်တည်တံ့ခိုင်မြဲပြီး ဟန်ချက်ညီသော ဖွံ့ဖြိုးတိုးတက်မှုစီမံကိန်း၏ ရည်မှန်းချက်ဖြစ်သည့် တစ်နိုင်ငံလုံးလွှမ်းသော ကျန်းမာရေးစောင့်ရှောက်မှုလုပ်ငန်းများအား ဆင်းရဲနွမ်းပါးသူများအတွက် အလေးအနက်ထားကာ ဆောင်ရွက်ပေး နိုင်မည်ဟု ယုံကြည်ကြောင်း ကျန်းမာရေးနှင့် အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးက ပြောကြားခဲ့သည်။

ကမ္ဘာ့ဘဏ်သည် နယ်ပယ် သုံးရပ်အပေါ်တွင် အဓိကအာရုံ စိုက်ထားသည့် မြန်မာနိုင်ငံ ဖွံ့ဖြိုးရေး မိတ်ဖက်မဟာဗျူဟာ မူဘောင် အသစ်(၂၀၂၀-၂၀၂၃) မေလ ၁၈ ရက်စွဲဖြင့် ထုတ်ပြန်ထားခဲ့သည်။ ယင်းနယ်ပယ်သုံးရပ်မှာ လူသားအရင်းအမြစ်တည်ဆောက်ရန်နှင့် ငြိမ်းချမ်းသော လူမှု အသိုင်းအဝိုင်း များအား အားပေး ဖော်ဆောင် သွားရန်၊ တာဝန်ယူမှု၊ တာဝန်ခံမှုရှိသည့် ပုဂ္ဂလိက စီးပွားရေး လုပ်ငန်းကဏ္ဍမှ ဦးဆောင်ဦးရွက်ပြုသော တိုးတက်မှုမြှင့်တင်ပေးရေးနှင့် အားလုံးပါဝင်နိုင်သည့် စီးပွားရေးအခွင့်အလမ်းကောင်းများ ပေါ်ပေါက်လာစေရန် အတွက် လှုံ့ဆော်ပေးရန်၊ မြန်မာနိုင်ငံတွင် သဘာဝဘေး အန္တရာယ်များအား ကျော်လွှားနိုင်ရန်နှင့် ကြံ့ကြံ့ ခံနိုင်စွမ်းကို မြှင့်တင်ခြင်းနှင့် အတူ သဘာဝအရင်းအမြစ်များနှင့် သဘာဝပတ်ဝန်းကျင်အား ရေရှည်တည်တံ့နိုင်စေရန် စီမံသွားရန်တို့ ဖြစ်ကြောင်း ဖ်ာပြခဲ့သည်။

မြန်မာနိုင်ငံဆိုင်ရာ ကမ္ဘာ့ဘဏ်ရုံးမှ ဦးကျော်စိုးလင်းက” မဟာဗျူဟာ မှာတော့ ကဏ္ဍတွေကို အရင်ဖော်ထုတ် ထားတာပေါ့နော်။ ဒီအပေါ်မှာ မူတည်ပြီးတော့မှ ကဏ္ဍတစ်ခုချင်းစီအောက်မှာ ဘယ်လို projectလုပ်မယ်ဆိုတာ အသေးစိတ်ဆက်ပြီးတော့ သက်ဆိုင်ရာ ဌာနနဲ့သော်လည်းကောင်း၊ အစိုးရနဲ့သော် လည်းကောင်း ဆွေးနွေး ရမှာပေါ့။ ဆွေးနွေးပြီးတော့မှ အစိုးရဘက် မှာလည်း သူတို့ဘက်က လုပ်ထုံးလုပ်နည်းတွေ ရှိတယ်ပေါ့နော်။ ချေးငွေတစ်ခုယူဖို့ဆိုရင် သူတို့ အစိုးရထဲမှာ သဘောတူညီမှုယူရတယ်။ လွှတ်တော်တင်ရတယ်။ အဲဒီအဆင့်ဆင့်တွေ ဖြတ်ပြီးတော့ မှ ပိုက်ဆံ amountကျတော့ အဲဒီတော့ မှပဲ ထွက်လာမှာကိုး။ ဒါကတော့ ကျွန်တော် တို့ရဲ့ မဟာဗျူဟာကို ချပြတဲ့ သဘောပဲပေါ့”ဟု ပြောကြားထားခဲ့သည်။

Credit News Watch

Add a Comment

Your email address will not be published. Required fields are marked *

five × 1 =