သင်္ချိုင်းမြေ မှာ ကျင်းများ အသင့်တူးထားပြီး သေသူတွေကို စောင့်နေ တဲ့ ဘရာဇီးနိုင်ငံ အခြေအနေ

သင်္ချိုင်းမြေ မှာ ကျင်းများ အသင့်တူးထားပြီး သေသူတွေကို စောင့်နေ တဲ့ ဘရာဇီးနိုင်ငံ အခြေအနေ

ကိုဗစ်-၁၉ သည် မတ်လ ၁၃ ရက်နေ့မှာ အမေဇုန် ရပ်ဝန်းတွင် ရှိသော လူဦးရေ နှစ်သန်းခန့်ရှိ မနာအူး မြို့ မှ တဆင့် ဘရာဇီး သို့ စတင်ကူးစက်လာခဲ့ပါတယ်။ ယခု နှစ်လခွဲကျော်အကြာ မေလ ၃၁ ရက်နေ့အထိ စာရင်းဇယားများအရ ရောဂါကူးစက်ခံရသူ စုစုပေါင်း ၅ သိန်းကျော် နှင့် သေဆုံးသူ ၃၀,၀၀၀ နီးပါး ရှိနေပြီ ဖြစ်ပါတယ်။

ကံအားလျှော်စွာ အမေရိကန် ရှိနေ တဲ့ အတွက် ကူးစက်ခံရသူ အများဆုံး နိုင်ငံစာရင်းမှာ ဒုတိယနေရာ ရရှိသွားခဲ့ပါတယ်။ သေဆုံးသူ တစ်နေ့ကို ၁၀၀၀ နီးပါးလောက်တိုးလာပြီး ကိုရိုနာဗိုင်းရပ်စ်ကြောင့် သေဆုံးသူအများဆုံး ကမ္ဘာ့နိုင်ငံစာရင်းမှာ အဆင့် ၄ ရောက်လာပါတယ်။ ကမ္ဘာ့ ကျန်းမာရေးအဖွဲ့ကြီး (WHO) ကတော့ တောင်အမေရိက၏ ရောဂါကူးစက်မှု ဗဟိုချက်မ အဖြစ် ကြေငြာပြီး အဆိုးဝါးဆုံး ကူးစက်ခံရတဲ့ နိုင်ငံဖြစ်တယ်လို့ ဆိုပါတယ်။

ထိုသို့ နှစ်လခွဲအတွင်း ကူးစက် ခံရသူ (၅) သိန်းကျော် အထိ အဘယ်ကြောင့် ဖြစ်ခဲ့ရသနည်း။

ဘရာဇီးသည် အမေရိကန်လိုပဲ ဖက်ဒရယ် စနစ် ကျင့်သုံးတဲ့ နိုင်ငံ ဖြစ်တာကြောင့် ပြည်နယ် အုပ်ချုပ်ရေးမှူးတွေ နဲ့ မြို့တော်ဝန်တွေမှာ လော့ဒေါင်း အပါအဝင် မိမိတို့ ကိုယ်ပိုင် အစီအစဉ်များ နဲ့ အုပ်ချုပ်ခွင့်ရနေကြပါတယ်။ ဘရာဇီး၏ ကျန်းမာရေး စောင့်ရှောက်ပေးမှုသည် ဗြိတိန်၏ အမျိုးသား ကျန်းမာရေး ဝန်ဆောင်မှုကို အတုယူ ပြုလုပ်ထားတာ ကြောင့် လူဦးရေ ၈၀% ကို ပံ့ပိုးပေးနိုင်ခဲ့ပါတယ်။ ၂၀၀၉ ခုနှစ် H1N1 နဲ့ ၂၀၁၅ ဇီကာ ဗိုင်းရပ်တွေ တုန်းက မြို့တော်ဝန်တွေ၊ ပြည်နယ် အုပ်ချုပ်ရေးမှူး တွေ၊ ကျန်းမာရေး ပိုင်းက တာဝန်ရှိသူတွေ နဲ့ ဗဟိုအစိုးရ တို့ တက်ညီလက်ညီ ပူးပေါင်းဆောင်ရွက်နိုင်ခဲ့တာ တွေ့ရပါတယ်။

ယခုအခါတော့ H1N1 ထက် ပိုပြီး ကူးစက်မြန်တဲ့ ကိုဗစ်-၁၉ သည်က ဘရာဇီး ရဲ့ အားနည်းချက်ကို ကောင်းကောင်း အသုံးချပြီး ထိုးနှက်တိုက်ခိုက်လာနေပြီ ဖြစ်ပါတယ်။ လူချမ်းသာ အသိုက်အဝန်းရှိ ခရီးသွားများမှ တဆင့် ရောဂါပိုး သယ်ဆောင်လာခဲ့တာ ဖြစ်ပေမယ့် ယခုအခါ စုပြုံ နေထိုင်ကြရပြီး အလုပ်အကိုင် အတည်တကျ မရှိတဲ့ ဆင်းရဲသား ရပ်ကွက်များမှာ အဆိုးဝါးဆုံး ကူးစက်ခံနေရပြီ ဖြစ်ပါတယ်။ ဒီလို ရပ်ကွက်တွေမှာ လူချင်းခွာ နေဖို့က မဖြစ်နိုင်သလောက် ရှိနေပါတယ်။ အစိုးရ မှ ၎င်းတို့ရဲ့ စားဝတ်နေရေး အတွက် တလကို ဒေါ်လာ ၁၁၀ ခန့် ထောက်ပံ့ပေး လာခဲ့ပေမယ့် ဒါကို ထုတ်ယူရန် ဘဏ်တွေမှာ လူတန်းရှည်ကြီး ဖြစ်လာခဲ့ရပြန်ပါတယ်။

ဘရာဇီး သမ္မတဖြစ်သူ ဂျာယား ဘော်ဆိုနာယို ကြောင့် လည်း လူချင်းခွာ နေရမယ် ဆိုတဲ့ ကျန်းမာရေး ဌာနရဲ့ သတိပေးချက်တွေကို ပြက်ရယ် ပြုခဲ့ပါတယ်။ ကိုဗစ်-၁၉ စတင်ဖြစ်ခဲ့ချိန်မှ ယခုအထိ ကျန်းမာရေးဝန်ကြီးကို ထုတ်ပြစ်ခဲ့တာ နှစ်ယောက်ရှိသွားပြီ ဖြစ်ပါတယ်။ ဒါ့အပြင် ဒေါ်နယ် ထရန့်လိုပဲ ကလိုရို ကွင်းဆေးသည် အစွမ်းထက်ကြောင်း ပြောခဲ့သူလည်း ဖြစ်ပါတယ်။ အဆိုပါ ဆေးသည် မည်သို့မျှ အသုံးမတည့်သည့်အပြင် အန္တရာယ်ရှိကြောင်းလည်း ဆေးပညာ လောကမှ ဩဇာတက္ကိမ ရှိတဲ့ Lancet ဂျာနယ် မှာ အထူးသုတေသန လုပ်ကာ ထုတ်ပြန်ထားခဲ့ပြီး ဖြစ်ပါတယ်။

ထိုကဲ့သို့သော သူ၏ သဘောထားတွေကြောင့် ဘရာဇီးနိုင်ငံ အဖို့ ပိုပြီး အထိနာခဲ့ရတာလည်း ဖြစ်ပါတယ်။ ကိုဗစ်-၁၉ စတင် ဖြစ်ပွားလာချိန်မှစပြီး ကျန်းမာရေး ဝန်ကြီး လုစ် မင်ဒက်တာ မှ ပြည်နယ်နှင့် မြို့တော် ကျန်းမာရေး တာဝန်ခံတွေနဲ့ နေ့စဉ်လို အစည်းအဝေး ကျင်းပပြီး စမ်းသပ်မှုတွေ၊ လိုအပ်တဲ့ အထောက်အကူပြု ပစ္စည်းတွေ၊ နဲ့ ရံပုံငွေ ရရှိရေး ကိစ္စတွေကို နေ့စဉ်လို ဆွေးနွေးခဲ့ပါတယ်။ သို့သော်လည်း ဧပြီလ ၁၆ ရက်နေ့မှာ သမ္မတက သူ့ကို ရာထူးကနေ ထုတ်ပယ် ပြစ်ခဲ့ပါတယ်။ အဓိက အကြောင်းကတော့ သူရဲ့ လုပ်ဆောင်မှုတွေကြောင့် တိုင်းပြည် စီးပွားရေး ထိခိုက်လာတယ်ဆိုပြီးတော့ ဖြစ်ပါတယ်။

ဘရာဇီးရဲ့ သိသိသာသာ ကောင်းမွန်တဲ့ ကျန်းမာရေး စောင့်ရှောက်မှု စနစ်ကြောင့် ကပ်ရောဂါကို ပိုပြီး နိုင်နိုင်နင်းနင်း ကိုင်တွယ်နိုင်အောင် ပြင်ဆင်ထားနိုင်ခဲ့ပါတယ်။ လူနာတွေ ကုသနိုင်ဖို့ ဆေးရုံကုတင်တွေ တိုးချဲ့ နိုင်ခဲ့တဲ့ အပြင် အားကစားကွင်းများ နဲ့ ကွန်ဗင်းရှင်း စင်တာ တွေ မှာလည်း ထားရှိနိုင်ဖို့ ပြင်ဆင်ထားခဲ့ပါတယ်။ ဒီလို အခြေအနေ မှာတောင်မှ မနိုင်မနင်း ဖြစ်လာနေပါတယ်။

ကျေးလက်ဒေသတွေမှာ အခြေအနေတွေက ပိုဆိုးနေပြီး အချို့ တောရွာတွေကနေ မြို့ကို စက်လှေနဲ့ ခေါ်လာတုန်းမှာပဲ လမ်းတွင် သေဆုံးသွားသူတွေ ရှိလာပါတယ်။ အစုလိုက် အပြုံလိုက် မြုပ်နှံခဲ့ကြရတဲ့ အဆင့် ရောက်လာခဲ့ပါတယ်။

ထိုသို့သော အနေအထားကို ကာကွယ်ရန် လော့ဒေါင်းကို တင်းတင်း ကျပ်ကျပ် လုပ်ဖို့ လိုပေမယ့် ဒီလို လုပ်ဖို့ကို သမ္မတ မှ ကြားကနေ သပ်လျို လာခဲ့ပါတယ်။ မြို့တော် ဘရာစီလီယာ မှာ ကွာရန်တင်း ကို ဆန့်ကျင် တဲ့ ဆန္ဒပြပွဲတွေကိုပင် သမ္မတက လာပြီး အားပေးခဲ့ပါတယ်။ မည်သူကမျှလည်း ကျန်းမာရေး ဝန်ထမ်းတွေကို ချီးကျူး ထောပနာ ပေးရကောင်းမှန်းလည်း မသိခဲ့ကြပါဘူး။ သမ္မတ တခုခု ပြောပြီးတိုင်း ထောက်ခံသူတွေ မှ ကားတွေ ဟွန်းတီးခဲ့ကြသလို ရှုတ်ချသူတွေက အိုးတွေ ခွက်တွေ တီးပြီး ကန့်ကွက်ခဲ့ကြလို့ အမြဲလို ဆူညံ နေပါတယ်။

သမ္မတသည် ပြည်နယ် အုပ်ချုပ်ရေးမှူးတွေနဲ့ မြို့တော်ဝန်တွေ ထုတ်ပြန်ထားတဲ့ ကွာရန်တင်း အမိန့်တွေကို အကျုံးမဝင်ကြောင်း ဗဟိုတရားရုံးချုပ်ကို အယူခံ တင်သွင်းခဲ့ပေမယ့် ဧပြီလ ၁၅ ရက်နေ့မှာ သူရဲ့ အယူခံမှုမှာ ပယ်ချခံခဲ့ရပါတယ်။ နိုင်ငံသားတွေဘက်ကလည်း သမ္မတ၏စကား နားထောင်ရမည်လား၊ ပြည်နယ် အုပ်ချုပ်ရေးမှူး တွေ၏ စကားကို နားထောင်ရမည်လား ဝေခွဲမရ ဖြစ်လာခဲ့ကြပါတယ်။ ဒီအတွက် ဆော ပါလို မြို့ကြီးမှာ လော့ဒေါင်းကို တဝက်လောက်ကပဲ လိုက်နာပါတယ်။ ပညာရှင်တွေကတော့ ရောဂါ မပျံ့ပွားအောင် အနည်းဆုံး ၇၀% လောက် လိုက်နာကြမှ ဖြစ်မယ် လို့ ဆိုပါတယ်။

နှစ်နာရီ ကြာ ကျင်းပခဲ့တဲ့ ကက်ဘိနက် အစည်းအဝေး အစအဆုံးကို ဗဟို တရားရုံးချုပ်က ထုတ်လွှင့်ပေးခဲ့တဲ့ အတွက် သန်းပေါင်းများစွာသော ဘရာဇီး နိုင်ငံသားတွေ ကြည့်ရှုခွင့် ရခဲ့ပါတယ်။ အစည်းအဝေးသည် နှစ်နာရီ နီးပါး ကြာမြင့်ခဲ့သော်လည်း လက်ရှိဖြစ်ပွားနေသော ကော်ရိုနာဗိုင်းရပ်စ် အန္တရာယ်ကြီးမှ နိုင်ငံသားများကို မည်သို့ မည်ပုံ ကာကွယ်ရမည် ဆိုသည့် အရေးအား မိနစ် အနည်းငယ်လောက်သာ ပြောပြီး တချိန်လုံး သူရဲ့ သားတွေကို ရဲအဖွဲ့က စုံစမ်းစစ်ဆေးနေတဲ့ အပေါ် မကျေနပ်ကြောင်း ဆူပူ ဆဲဆိုနေတာတွေနဲ့ ပြည့်နှက်နေတာ ကို နိုင်ငံသားများ တအံ့တဩတွေ့ရှိခဲ့ကြရပါတယ်။

နိုင်ငံအတွင်း ရောဂါကူးစက်မှု ရှိမရှိ ကျယ်ကျယ်ပြန့်ပြန့် စမ်းသပ်နိုင်ရေး၊ လော့ဒေါင်းကို လုံခြုံစိတ်ချရအောင် မည်သို့ မည်ပုံ တဆင့်ခြင်း ဖြေလျော့ရေးဆိုတဲ့ စီမံ ဆောင်ရွက်မှုတွေ ဖြစ်မလာခဲ့ပါဘူး။ ဘရာဇီး လူဦးရေသည် သန်း ၂၁၀ ခန့် ရှိပေမယ့် မေလ ၂၆ ရက်နေ့အထိ စမ်းသပ်မှု ၆ သိန်းခန့်လောက်သာ ပြုလုပ်နိုင် ပါသေးတယ်။ ကျန်းမာရေး ဝန်ကြီးဌာနမှ လုပ်ဖို့ လိုအပ်တယ်လို့ ပြောနေတဲ့ အရည်အတွက်ရဲ့ ဆယ်ပုံတပုံသာ ရှိပါသေးတယ်။ အမေရိကန်နဲ့ ဥရောပနိုင်ငံတွေထက်လည်း အပုံကြီး လျော့နည်းနေဆဲ ဖြစ်ပါတယ်။

မေလ ၁၈ ရက်နေ့တွင် ဘရာဇီး၏ အကြီးဆုံး မြို့ကြီး ဖြစ်သည့် ဆောပါလို မြို့တော်ဝန်သည် ၎င်း၏ မြို့တွင် တနိုင်ငံလုံး ရောဂါ ကူးစက်ခံရသူ အများဆုံး ရှိနေတဲ့ ဒေသ ဖြစ်လာနေတာကြောင့် နိုင်ငံသားများ အပြင်မထွက်အောင် အားပေးတဲ့ အနေနဲ့ ငါးရက်ကြာ ရုံးပိတ်တယ်လို့ ကြေငြာခဲ့ပါတယ်။

ထိုသတင်းကြောင့် ဆောပါလို မြို့တော် တောင်ပိုင်းရှိ လူဦးရေ တသိန်း ကျော် နေထိုင်ရာ ရပ်ကွက်ကြီး အတွင်းတွင် ပွဲတော်ကြီး အလား လမ်းဘေးဈေးဆိုင်လေးတွေ လာဖွင့်ကြပြီး စည်ကားလာနေပါတယ်။ ကိုဗစ်-၁၉ ရောဂါပိုး ကူးစက်ခံရသူ တွေ အဆက်မပြတ် ရောက်လာနေတဲ့ ဆေးခန်း ဆေးရုံတွေ၏ရှေ့မှာ ဈေးဆိုင် လေးတွေနဲ့ ပိုပြီး တောင် စည်ကားနေတယ်လို့ဆိုပါတယ်။ တိုက်ခေါင်မိုး တွေ ပေါ်ရှိ လေသာ ဆောင်များ မှာလည်း ပါတီပွဲတွေ နဲ့ စွန် လွှတ်နေကြတဲ့ ကလေးတွေလည်း အများအပြားတွေ့နေရပါတယ်။

ဒီအတွက်လည်း ဆောပါလို မြို့တော်ရှိ ဆောလူးဝစ် သင်္ချိုင်းမြေတွင် ကျင်းပေါင်း သုံးထောင်ကို အသင့်တူးထားပြီး သေဆုံးသူတွေကို စောင့်နေ ပါတယ်။ အရင်က တနေ့ကို ၁၁ ကျင်း လောက်သာ သုံးခဲ့ရပေမယ့် ယခုအခါ ၄၀ လောက်အထိ ဖြစ်လာနေတယ်လို့ သုဘရာဇာများက ပြောပါတယ်။ ကျင်းတွေ ပေါ်မှာ လောလောဆယ် ပန်းတွေသာ ချထားပေး နိုင်ပြီး ဆိုင်းဘုတ်တွေ လုပ်ဖို့ အလျဉ်မမှီ ဖြစ်နေပါတယ်။

(လွစိုး​ဝေ)