လှိုင်သာယာ ကိုရီးယား အထည်ချုပ် စက်ရုံ ပိတ်သိမ်း၊ ဝန်ထမ်း (၂၀၀၀) ကျော် အလုပ်ပြုတ်

လှိုင်သာယာ ကိုရီးယား အထည်ချုပ် စက်ရုံ ပိတ်သိမ်း၊ ဝန်ထမ်း (၂၀၀၀) ကျော် အလုပ်ပြုတ်

လှိုင်သာယာ ရွှေလင်ပန်းစက်မှုဇုန်က Shin Sung အထည်ချုပ် စက်ရုံ ပိတ်သိမ်း၊ အလုပ်သမား (၂၀၀၀) ကျော်ခန့် အလုပ်လက်မဲ့ဖြစ်…

လှိုင်သာယာမြို့နယ်၊ ရွှေလင်ပန်း စက်မှုဇုန်၊ ဒေါ်ဖွားရှင်လမ်းရှိ SHIN SUNG အထည်ချုပ်စက်ရုံမှာ မေလ ၂၈ ရက်တွင် ယာယီပိတ်သိမ်းခြင်းကြောင့် အလုပ်သမား ၂၀၀၀ ကျော်ခန့်အလုပ်လက်မဲ့ဖြစ်ခဲ့ပြီး လက်ရှိအချိန်တွင် အလုပ်သမားတစ်ထောင်ခန့်မှ စက်ရုံပြန်ဖွင့် ချိန်တွင်မူလရာထူး လစာအတိုင်းပြန်လည်းရရှိစေရန် မြို့နယ်ညှိနှိုန်းဖျန်ဖြေရေးကော်မတီတွင်အလုပ်ရှင်နှင့် ညှိနှိုင်းနေတယ်လို့ အလုပ်သမားများထံမှ သိရပါတယ်။

“အခုလောလောဆယ်တော့ မြို့နယ်ညှိနှိုင်းဖျန်ဖြေရေး မှာ တစ်ကြိမ်ဘဲ ရှင်းရသေးတယ်။ အဲ့ဒီထဲကမှ အလုပ်သမားတစ်ထောင်လောက်က စက်ရုံပြန်ဖွင့်ရင် မူလရာထူး လစာအတိုင်းပြန်ရချင်တယ်။ စက်ရုံကလည်း ယာယီပိတ်တာဆိုတော့ အလုပ်ရှင်ဘက်က ရက်အကန့်အသတ်မရှိပိတ်တာလို့ တင်ပြတယ်။ အလုပ်သမားတွေက ယာယီဆိုလည်း ကြားလစာကို ညှိနှိုင်းမယ်။ အလုပ်ဖွင့်ရင် မူလရာထူးလစာပြန်ရဖို့တောင်းဆိုနေတာ။ မြို့နယ်ညှိနှိုင်းဖျန်ဖြေရေးမှာ ၉ ရက်နေ့တော့ ပြန်ချိန်းထားတယ်။

အလုပ်ရှင်ကတော့ Covid-19 ကြောင့်အော်ဒါ မရလို့ လူလျှော့တယ် ရာယီပိတ်တယ်ပေါ့။ ပြန်လည်ပတ်ဖို့ မလည်ပတ်ဖို့က အခြေအနေကြည့်ရမယ်ပြောတယ်။ ဒီစက်ရုံက ပဲခူးနဲ့တခြားမြို့တစ်ခုမှာလည်းရှိတယ်ပြောတယ်။ အဲ့ဒီစက်ရုံတွေတော့ လူမလျှော့ဘူးပေါ့။ ဒီစက်ရုံကိုတော့ အလုပ်သမားသမဂ္ဂလည်းရှိတော့ ဖြိုခွင်းချင်လို့ပိတ်တာလို့ အလုပ်သမားတွေကတင်ပြထားတယ်” ဟုလှိုင်သာယာမြို့နယ် အလုပ်သမားညှိနှိုင်းဖျန်ဖြေရေးကော်မတီမှ အလုပ်သမားကိုယ်စားလှယ် ဒေါ်ကြည်ကြည်ထွန်းကပြောပါတယ်။

(SHIN SUNG) ရှင်စောင်း အထည်ချုပ် စက်ရုံတွင် အထည်ကုန်ကြမ်းနှင့် လုပ်သားအင်အားအလုံအလောက်ရှိသော်လည်း ကိုဗစ်ကူးစက်မှုအခြေအနေကြောင့် ဥရောပမှ ပစ္စည်းလက်ခံမည့်သူမရှိဘဲ ပစ္စည်းမှာယူမှုခေတ္တရပ်ဆိုင်းထားမှုကြောင့် စက်ရုံယာယီပိတ်သိမ်းရခြင်းဖြစ်ကြောင်း စက်ရုံပိုင်ရှင်ကပြောဆိုကြောင်း သိရပါတယ်။

“လက်ရှိမှာအလုပ်သမားတွေက ကိုဗစ်ကာလမှာ စားစရာ မရှိ အခက်အခဲရှိတော့ လျော်ကြေးတော့ ယူသွားကြပြီ။ ပထမကျွန်တော်တို့က လျော်ကြေးမယူဘူးဆိုပြီး တိုင်စာတင်ထားတာ အခုက စားဝတ်နေရေးအဆင်မပြေတော့ ယူလိုက်ရတော့ အဲ့ဒါတင်ထားတာလည်းပြန်ပိတ်ဖို့ ရည်ရွယ် ထားပါတယ်။ ဒါပေမဲ့အလုပ်သမားတွေကတော့ အလုပ်ပြန်လိုချင်ကြတာပေါ့။

အလုပ်ရှင်ဘက်ကတော့ စက်ရုံကအပြီးပိတ်ထားတာမဟုတ်ဘူး။ ဒါပေမဲ့ပြန်ဖွင့် ဖို့ဘယ်လောက်ကြာမယ်မသိတော့ ညှိနှိုင်းလစာမပေးချင်ဘူး။ လျော်ကြေးကိုဘဲယူပြီး ရသင့်ရထိုက်တဲ့လျော်ကြေးတွေထုတ်ပြီး အကုန်ထုတ်လိုက်တယ်ပေါ့။ အော်ဒါရလို့ စက်ရုံပြန်လည်ပတ်ရင်လည်း သူတို့က လူအသစ်တွေနဲ့ဘဲ လုပ်ချင်တာ။

ရှင်စောင်း စက်ရုံ ၆ ရုံရှိတာမှာ အလုပ်သမားသမဂ္ဂက ကျွန်တော်တို့စက်ရုံ ဘဲရှိပြီး လူလည်းအရမ်းညီလို့ ပိတ်တဲ့ပုံစံဖြစ်နေတယ်။ တခြားစက်ရုံမှာဆို အိုဗာတိုင်တွေခေါ် လူအသစ်တွေလည်းခေါ်နေတယ်။ ကျွန်တော်တို့ဘက်က လျော်ကြေးငွေလည်းယူထားပြီးပီဆိုတော့ အလုပ်ပြန်ဖွင့်ရင် ကျွန်တော်တို့ကို ဦးစားပေးအနေနဲ့ခန့်စေချင်တယ်” ဟု ရှင်စောင်း အထည်ချုပ်စက်ရုံအလုပ်သမား သမဂ္ဂဥက္ကဌ ကိုကျော်မင်းဦးက ပြောပါတယ်။

SHIN SUNG အထည်ချုပ် စက်ရုံသည် ကိုရီးယားနိုင်ငံသားပိုင် စက်ရုံဖြစ်ပြီး အလုပ်သမား ၂၁၀၈ ဦးရှိကာ ဥရောပ (EURO) သို့အထည်တင်ပို့နေခြင်းဖြစ်ကြောင်း သိရပါတယ်။

ဝေယံ

Add a Comment

Your email address will not be published. Required fields are marked *

three × 2 =