နှစ်ပေါင်း (၂၀၀) ကျော် အတွင်း ပြည်သူကို ကြောက်လို့ ကျင်းထဲ ဆင်းပုန်း ရတဲ့ တစ်ဦးတည်းသော သမ္မတ

နှစ်ပေါင်း (၂၀၀) ကျော် အတွင်း ပြည်သူကို ကြောက်လို့ ကျင်းထဲ ဆင်းပုန်း ရတဲ့ တစ်ဦးတည်းသော သမ္မတ

“BUNKER BOY”

အမေရိကန်သမ္မတတွေ အိမ်ဖြူတော်မှာ နေတာ နှစ် ၂၀၀ ကျော်ပါပီ။ အဲဒီသမိုင်း တလျှောက် ကိုယ့်ပြည်သူကို ပြန်ကြောက်လို့ ဗုံးခိုကျင်းထဲ ဆင်းပုန်းနေရတဲ့ သမ္မတက တဦးပဲရှိခဲ့ပါတယ်။ အဲဒီလိုပဲ အိမ်ဖြူတော်ကို သံဇကာ ၂ ထပ် ခတ်ပီး နေနေရတာလဲ တယောက်ထဲပဲ ရှိပါတယ်။ အဲဒီသမ္မတကို အမေရိကန် တွေက Bunker Boy လို့ ခေါ်ကြပါတယ်။ သူ့အရင် ဗုံးခိုကျင်းထဲ ဆင်းရတာက ၂၀၀၁ တုန်းက ဂျော့ဘုရ်ှရဲ့ ဒုသမ္မတ ဒစ်ချေနီပါ။ သူကတော့ ၉/၁၁ တိုက်ခိုက်မှုကြောင့် ခဏဆင်းနေရတာပါ။ ဒီဆောင်းပါးကတော့ သမ္မတဖြစ်ချိန် ထဲက ကမ္ဘာပေါ်မှာ သူ ဘာတွေ လုပ်ခဲ့သလဲဆိုတာ သုံးသပ်ပြမှာပါ။

အေမရိက

၂၀၁၅ မဲဆွယ်စည်းရုံးစဉ်ထဲက သူက မျိုးချစ်တွေ ရဲ့ အားကို ယူပါတယ်။ သူ့ရဲ့ အဖေကိုယ်တိုင်ကလဲ လူဖြူအစွန်းရောက်ဂိုဏ်း KKK ချီတက်ပွဲတွေမှာ ပါလေ့ရှိပီး အဖမ်းခံရသူပါ။ အမေရိကန်မှာတော့ လူဖြူအစွန်းရောက်တွေပေါ့။ အဲဒီအချိန်ထဲက ခေါင်းထောင်ချင် နေတဲ့ လူဖြူလူမဲ ခွဲခြားမှု ကို အသုံးချပီး လူဖြူတွေဆီက မဲရအောင် ကြံပါတယ်။ သူ့အကြောင်းဖော်ပြရင် သတင်းမှားလို့ အော်လေ့ရှိပါတယ်။ နောက် တရုတ်ကို ဘယ်လိုတွယ်မယ်။ အမေရိကန်ကို ဘယ်လိုလုပ်ပြမယ်။ ဆီရီးယားကို ဘယ်လိုနွှာမယ် ဆိုပီး တက်လာ ပါတယ်။

ရုရှားကို မပြောပါဘူး။ ဘာလို့လဲဆိုတော့ ရုရှားက နောက်ကွယ် ကနေ ကူညီ နေတာတွေကြောင့်ပါ။ အဲဒီအတွက် အမှုစစ်ဆေးနေဆဲဖြစ်ပီး ဟိုနေ့ကတောင် လွှတ်တော်မှာ နောက်ဆုံးသက်သေတဦးကို စစ်နေပါတယ်။ သမ္မတဖြစ်လာချိန်မှာ အမေရိကန် ပထမ မူဝါဒဆိုပီး လူဖြူတွေကို ပိုပစားပေး ခဲ့ပါတယ်။ အိုဘားမား လုပ်ခဲ့တာ အကုန်ချေဖျက်ရမယ်ဆိုပီး ဥပဒေအများကြီးကို ဖျက်သိမ်းလိုက်ပီး အသစ်ပြဌာန်းခဲ့ပါတယ်။ ကျန်းမာရေးဥပဒေကို ချေဖျက်ဖို့ လုပ်ရာမှာတော့ အသစ်မရေးနိုင်လို့ Obama Care ကို ၂ နှစ်ကျော်လောက် မချစ်ပဲ နဲ့ အောင့်ကာ နမ်းခဲ့ရပါတယ်။

မဟာမိတ်များနှင့် ဆက်ဆံရေး

သမ္မတ စဖြစ်ထဲက မဟာမိတ်တွေနဲ့ ဆက်ဆံရေး ကောင်းအောင် တည်ဆောက်ရမယ့်အစား ဖျက်ဆီးနေခဲ့ပါတယ်။ ပါရီ ရာသီဥတုပြောင်းလဲမှုထိန်းချုပ်ရေးစာချုပ်က ထွက်ခဲ့တာက စပီး Nato အဖွဲ့နဲ့ ဆက်ဆံရေးမပြေလည်တာက အလယ် နောက်ဆုံး UNESCO နဲ့ WHO ကပါ နှုတ်ထွက် ခဲ့ပါတယ်။ Nato အဖွဲ့ဝင်နိုင်ငံတွေကို ငွေပိုထည့်ရမယ်လို့ ဖိအားပေးပီး အခွန်တွေမြှင့်မယ်လို့ အီးယူကို ပြောခဲ့လို့ ဥရောပနဲ့ အဆင်မပြေဖြစ်ခဲ့ပါတယ်။ NATO အဖွဲ့ထဲမှာ တတိယ စစ်အင်အားအကြီးဆုံးဖြစ်တဲ့ တူရကီနဲ့လဲ အဆင်မပြေပဲ တူရကီက ဒုံးကျည်ကာကွယ်ရေးစနစ်ကို ရုရှားရဲ့ S-400 ကို ဝယ်သွားလို့ ဆက်ဆံရေးအေးစက်သွားခဲ့ပါတယ်။

အိုဘားမားလက်ထက်က မဟာမိတ်တွေနဲ့ ဆက်ဆံရေး အလွန်ကောင်းခဲ့ပီး ယူကရိန်းကို ရုရှားတပ်တွေဝင်လို့ အိုဘားမားက ရုရှားကို ပိတ်ဆို့မှုတွေချမှတ်ပီး အမေရိကန်တပ်တွေကို ပိုလန်နယ်စပ်မှာ ခေါင်းဆိုင်ထားခဲ့ပါတယ်။ ထရန့်ကတော့ ရုရှားကို ပစားပေးနေလို့ ဂျာမနီက မာကယ်က ခေါင်းဆောင်ပီး ဥရောပတပ်မတော်တခု သီးသန့်ထားဖို့ လုပ်ဆောင်နေရပါတယ်။ အဲအကျိုးဆက်ကို မကြာခင် တွေ့ရပါမယ်။

အာရွ

အိုဘားမားလက်ထက်မှာ ကိုရီးယားနဲ့ကော ဂျပန်နဲ့ပါ အလွန်ကောင်းမွန်တဲ့ ဆက်ဆံရေးရှိခဲ့ပါတယ်။ မြောက်ကိုရီးယားနဲ့ တရုတ်ကို Soft Power နဲ့ ထောက်ထားခဲ့လို့ မြောက်ကိုရီးယားလဲ ရန်မစွာခဲ့သလို တရုတ်ကလဲ အငြင်းပွားရေပိုင်နက်က ကျွန်းတွေမှာ စစ်စခန်းတွေ မဆောက်နိုင်ခဲ့ပါဘူး။ အိုဘားမားနဲ့ ဟီလာရီကလင်တန်ဟာ နိုင်ငံရေးဂုရုကြီးတွေလို့ ကမ္ဘာ့နိုင်ငံရေးသမားတွေကို အသိအမှတ်ပြုကြပီး သူတို့ ၂ ယောက်ဟာ Soft Power ကော Hard Power ကောကို အသုံးပြုရာမှာ အလွန်ကျွမ်းကျင်ပါတယ်။

အရှေ့အာရှကို Soft Power နဲ့ ထိန်းထားပီး အနောက်အာရှကို Hard Power နဲ့ ထိန်းထားခဲ့ပါတယ်။ အာရှနွေဦးဆိုတာက အလကားဖြစ်လာတာ မဟုတ်ပါ။ အာရှနွေဦးကြောင့် အရှေ့အလယ်ပိုင်းက အမေရိကန်တပ်တွေ အဆင်ပြေခဲ့ပါတယ်။ ထရန့်လက်ထက်ကျ အဲဒါတွေ မရှိတော့ အမေရိကန်တပ်တွေ အကျအဆုံးတွေ ရှိခဲ့ပါတယ်။

အိုဘားမားဟာ TPP (Trans Pacific Partnership) ကို ချုပ်ဆိုခဲ့ပီး စီးပွားရေးကောင်းအောင် အဓိက လုပ်နိုင်ခဲ့ပါတယ်။ အဲဒီမှာ ဂျပန်က အခရာကျပါတယ်။ ထရန့်တက်လာတော့ ဒီစာချုပ်ကို ချက်ခြင်းဖျက်သိမ်းဖို့ လုပ်လို့ ဂျပန်ဝန်ကြီးချုပ်အာဘေးကိုယ်တိုင် အမေရိကန်အထိ သွားရောက်ပီး ပြောခဲ့ပေမယ့် အတင်းဖျက်သိမ်းခဲ့ပါတယ်။ အဲဒါကြောင့် ဂျပန်ဟာ ရုရှားနဲ့ စီးပွားရေးစာချုပ်ချုပ်ခဲ့သလို တရုတ်သမ္မတ ရှီကိုလဲ ဧပြီလက လာဖို့ ဖိတ်ခေါ်ခဲ့ပါတယ်။ ကိုဗစ်ကြောင့် မလာနိုင်လို့ မကြာခင် လာဖို့ စီစဉ်နေပါတယ်။ ဒါဟာ ထရန့်ရဲ့ ညံ့ဖျင်းမှု အကြီးစားပါ။

ဒါ့အပြင် ဂျပန်ကို စစ်စားရိတ် ပိုတောင်းတာ၊ ကိုရီးယားကိုလဲ လည်ပင်း ညှစ်နေတာက အခြေအနေကို ဆိုးရွားစေပါတယ်။ ဂျပန်က ဒုတိယကမ္ဘာစစ်စာချုပ်အရ ကာကွယ်ရေးတပ်လေးပဲ ရှိပါတယ်။ အခုတော့ ဂျပန်ဟာ ထရန့်ရဲ့ အနေအထားကြောင့် စစ်တပ်ကို ကိုယ်တိုင်မြှင့်တင်ဖို့ အားထုတ် လာခဲ့ပါပီ။ GDP ရဲ့ ၁% ထက်ပိုမသုံးရဘူးဆိုတဲ့ သူတို့ခြေဥကို မလိုက်နာပဲ ဒီနှစ်ဆို ၁.၄% အထိ သုံးစွဲလာခဲ့ပါတယ်။ ဂျပန်စစ်တပ် ပြန်လည်မွေးဖွားလာခြင်းဟာ တရုတ်အတွက်တော့ အိပ်မက်ဆိုးပါ။ တိုကျိုမှာလဲ အမာအဖွဲ့တွေ အားကောင်းလာ နေပါတယ်။ အာရှမှာ ဂျပန်ကပဲ တရုတ်ကို အာခံနိုင်ပါလိမ့်မယ်။ (ထိုအကြောင်းကို ဆောင်းပါးတပုဒ် ရေးပါမယ်။)

အာဆီယံ

အိုဘားမားဟာ အာဆီယံဒေသကို အလွန်ဂရုစိုက်ခဲ့ပါတယ်။ တရုတ်ကို ဝိုင်းပတ်ထားမယ့် အင်ဒိုပစိဖိတ် ဗျူဟာက အတော်ခိုင်မာနေခဲ့ပါတယ်။ အရှေ့ဘက်မှာ ကိုရီးယားနဲ့ ဂျပန်ရှိသလို တရုတ်ဘေးက ဗီယက်နမ်၊ ဖိလစ်ပိုင်နဲ့ ထိုင်းတို့နဲ့လဲ မဟာမိတ်ပါ။ ဒါ့အပြင် ၂၀၁၂ မှာ မြန်မာနိုင်ငံကိုပါ လာခဲ့ပီး မြန်မာနဲ့ပါ အဆင်ပြေအောင်ကြိုးစားပီး တရုတ်ကို ဝိုင်းပတ်နေခဲ့ပါတယ်။ ထရန့်မှာတော့ ဘာပေါ်လစီမှ မရှိခဲ့ပဲ အာဆီယံပေါ်မှာလဲ အာရုံမရှိလို့ မြန်မာအပါအဝင် နိုင်ငံအများစုဟာ တရုတ်ရဲ့ ခါးပတ်လမ်းထဲ ရောက်သွားခဲ့ပါတယ်။ အိုဘားမားက ဦးအောင် လုပ်ခဲ့ပေမယ့် ထရန့် ညံ့ဖျင်းလို့ ပါသွားတဲ့ နောက်တချက်ပါ။

အိုဘားမားဟာ တရုတ်ရဲ့ ဖိအားအောက် ရောက်နေတဲ့ ဗီယက်နမ်ကို ကိုယ်တိုင် သွားရောက်ပီး မဟာမိတ်ဖွဲ့ခဲ့သလို လမ်းဘေးခေါက်ဆွဲဆိုင်မှာ ထိုင်စားပီး ဘီယာသောက်ကာ ဗီယက်နမ်တွေရဲ့ နှလုံးသားကို ယူသွားခဲ့ပါတယ်။ အဲဒီဆိုင်ပိုင်ရှင်က အိုဘားမား စားသွားတဲ့ ခုံနဲ့ စားပွဲကို သေချာသိမ်းဆည်းပီး ပြသ ထားပါတယ်။ သူများကို ပေးမထိုင်တော့ပါဘူး။

အဲဒီနောက် ဗီယက်နမ်မှာ တရုတ်ဆန့်ကျင်မှုတွေ ပေါ်ပေါက်လာပီး တရုတ်ပစ္စည်းတွေ ဖျက်ဆီးကြလို့ တရုတ်လဲ နောက်ပြန်ဆုတ်သွားခဲ့ရပါတယ်။ အဲဒါ Soft Power ပါပဲ။ ဖိလစ်ပိုင်ကိုလဲ တပ်စခန်းချပီး တရုတ်လက်က ကာကွယ်ပေးခဲ့ပေမယ့် ထရန့်လက်ထက်မှာတော့ အဆင်မပြေပဲ ဒူတာတေးက တပ်စခန်းတွေ ဖယ်ခိုင်းပီး အခုတော့ တရုတ်အကြွေးထဲ နစ်နေခဲ့ပါပီ။ ထိုင်းကလဲ တရုတ်ဆီက လက်နက်တွေ ဝယ်နေပါတယ်။ အာဆီယံက တရုတ်ဘက် ယိုင်သွားခဲ့ပါတယ်။

မြန်မာ

မြန်မာဟာ အိုဘားမားကို ကျေးဇူးတင်စရာတွေ ရှိနေခဲ့ပါတယ်။ အထူးသဖြင့် ၂၀၁၂ မှာ ပါ။ ဒီမိုကရေစီကို ကူးပြောင်းကာစ အထီးကျန်နိုင်ငံလေးအနေနဲ့ ရခိုင်မှာ အဓိကရုဏ်းတွေ စတင်ဖြစ်လာတဲ့အခါမှာ ကမ္ဘာတခုလုံးက ဒီနိုင်ငံမှာ စီးပွားရေးလုပ်ရမလား။ မလုပ်ရဘူးလား။ နောက်ကြောင်းပြန်မှာလား အစရှိတဲ့ သံသယတွေ နဲ့ တွန့်ဆုတ်နေခဲ့ပါတယ်။ အဲဒီအချိန်မှာ အိုဘားမား ရောက်လာခဲ့တာပါပဲ။ သူကိုယ်တိုင် လာလိုက်တဲ့အတွက် ကမ္ဘာကို သတင်းပို့လိုက်တာပါ။

သူက ရန်ကုန်တက္ကသိုလ်ထဲကနေ မြန်မာနိုင်ငံဟာ နောက်ကြောင်းမပြန်တော့ဘူးလို့ မိန့်ခွန်းထဲ ထည့်ပြော ခဲ့တဲ့နောက် နိုင်ငံတကာလုပ်ငန်းတွေနဲ့ ကမ္ဘာလှည့်ခရီးသွား ဝင်ရောက်မှုဟာ ထောင်တက်လာခဲ့တော့ပါပဲ။ အဲဒီအချိန်က မြန်မာနိုင်ငံရဲ့ GDP ဟာ အခု လက်ရှိနဲ့ စာရင် အများကြီး နိမ့်ကျပါတယ်။ အခုတော့ မြန်မာနိုင်ငံဟာ ဖွံ့ဖြိုးဆဲနိုင်ငံစာရင်းထဲက လွတ်ဖို့လမ်းပေါ် ရောက်နေပါပီ။ ၂၀၁၅ ရွေးကောက်ပွဲမှာလဲ စောင့်ကြည့်နေခဲ့သလို အမေစုကိုလဲ ချီးကျူးခဲ့ပီး အပြောင်းအလဲကို ရဲရဲလုပ်ကြဖို့ ၂ဖက် ခေါင်းဆောင်တွေကို တိုက်တွန်းခဲ့သူပါ။ သူ့ကြောင့်ပဲ မြန်မာ ဟာ ဒီမိုကရေစီလမ်းကြောင်းပေါ် အခြေခိုင်ခဲ့တာလို့ ဆိုနိုင်ပါတယ်။

ထရန့်က မြန်မာပြည်ကို လုပ်ပေးခဲ့တဲ့ ကြီးမြတ်တဲ့အရာကတော့ မြန်မာနိုင်ငံသား တွေကို မြောက်ကိုရီးယား၊ နိုင်ဂျီးရီးယားနဲ့ ဆူဒန်တို့လို နိုင်ငံတွေနဲ့ တတန်းထဲထားပီး ရွှေ့ပြောင်းဗီဇာပိတ်တဲ့ အမိန့်ကို ဇန်နဝါရီ ၃၁ မှာ ပြဌာန်းပေးလိုက်တာပါပဲ။ ဖေဖော်ဝါရီ ၂၁ က စပီး အမေရိကန်သွားနေမယ် ဆိုရင် မရတော့ပါဘူး။ ကိုရွှေမြန်မာတို့ကို ရိုပြသနာကြောင့် ထရန့်က မလာပါနဲ့တော့တဲ့။ ရွှေ့ပြောင်းဗီဇာ ပိတ်လိုက်ပါတယ်။ အားပေးကြသူများလဲ သတိရစေဖို့ပါ။ ထရန့်ဘက်က ဆန္ဒသွားပြပေးမယ်ဆိုရင်တောင် အမေရိကန်ကို သွားလို့ မရတော့ပါဘူး။

၂၀၂၀

ရွေးကောက်ပွဲနှစ်ဖြစ်တာကြောင့် ထရန့်ဟာ အမေရိကန်သမ္မတတို့ရဲ့ ထုံးစံအတိုင်း စစ်ပွဲနဲ့ မဲဆွယ်ဖို့ ကြံလိုက်ပါတယ်။ အီရန်နဲ့ တင်းမာမှုဖြစ်အောင် လုပ်ပီး စစ်ပွဲဆင်နွှဲဖို့ကြံခါမှ သူ လုပ်ခဲ့တဲ့အကျိုးကို ခံစားရတော့တာပါပဲ။ အဓိက မဟာမိတ်တွေဖြစ်တဲ့ NATO အဖွဲ့တွေနဲ့ ဗြိတိန်က အင်တင်တင်လုပ်နေပီး ဂျာမနီနဲ့ ပြင်သစ်က မပါဘူးလို့ အပြတ်ပြောပါတယ်။

နောက်ဆုံး ဗြိတိန်က အီရတ်က တပ်တွေ မြို့ပြင်ရွှေ့တော့မှ သဘောပေါက်သွားပီး အီရန်ကို မတိုက်တော့ပဲ လျှောချသွားပါတယ်။ နိုင်ငံတကာမှာ အမေရိကန်ရဲ့ ပါဝါ ကျဆင်းနေမှုကို အထင်းသားမြင်ခဲ့ရပါတယ်။ တခါ COVID ကာလမှာလဲ ဟိုလူ ဒီလူကိုသာ အပြစ်တင်နေပေမယ့် WHO နဲ့ ဆရာဝန်တွေ စကားကို နားမထောင်ခဲ့ပါဘူး။ ပြည်ဝင်ခွင့်ပိတ်ပါလို့ ပြောနေချိန်မှာ မပိတ်ခဲ့ပဲ Lock Down ကိုလဲ နောက်ကျမှ လုပ်ခဲ့ပါတယ်။ စီးပွားရေးထိမှာစိုးလို့ ဆက်ဖွင့်ထားတာက အတော်ဆိုးသွားပါတယ်။

WHO က ပြောတဲ့ အချက်တွေကိုလဲ မလိုက်နာပဲ ငှက်ဖျားဆေးသောက်ရင် ပျောက်တယ် ဆိုလို့ လိုက်သောက်ကြသူတွေ သေကုန်မှ အဲဒီကိစ္စတခန်းရပ်ပါတယ်။ မြန်မာပြည်မှာ အမေစုက ဦးဆောင်ပီး Mask ချုပ်နေပေမယ့် သူကတော့ Mask လဲ မတပ်ဘူးလို့ ငြင်းခဲ့ပီး အခုထိ လူကြားထဲ သွားတာမှာ တခါပဲ တပ်ဖူး ပါတယ်။ ဟိုနေ့က မတပ်သလို မနေ့ကလဲ မတပ်ပါဘူး။ ဒါပေမယ့် WHO ကို ပြသနာရှာပီး အဖွဲ့ထဲက နှုတ်ထွက်ပါတယ်။ သူ့အမှားကို သူများအမှားလုပ်ပါတယ်။ ဒီအမှားတွေက သူ့ကြောင့် ဖြစ်ခဲ့တာတွေပါ။

အနှစ်ချုပ်

တကယ်တော့ လက်ရှိဖြစ်စဉ်တွေဟာ နှစ်ကာလရှည်ကြာစွာ ဖိနှိပ်ခံထားရတာတွေ ပေါက်ထွက်လာတဲ့ ပြသနာပါ။ ဒီက မျက်ကန်းထရန့်ထောက်ခံသူတွေပြောသလို တရုတ်ကြောင့် မဟုတ်သလို ဘာကြောင့်မှ မဟုတ်ပါဘူး။ ၈၈ မှာ မြန်မာပြည်သူတွေ ဆန္ဒပြကြပါတယ်။ မလိုသူတွေက ဗကပကြောင့် ဘာကြောင့်ပြောပေမယ့် ဒုက္ခရောက်လွန်းလို့ လမ်းပေါ်ထွက်ခဲ့ကြတယ်ဆိုတာ အဲဒီခေတ်က မြန်မာပြည်သူတွေ သိပါတယ်။ အခုလဲ အမေရိကန်မှာ ဒီလိုပါပဲ။ အဲဒီအချိန်က သူတို့ ကျနော်တို့ကို ထောက်ခံသလို အခု ကျနော်တို့က သူတို့ကို ထောက်ခံရမှာပါ။ အခုအချိန် ထရန့်ကို မျက်စိမှိတ်ကာကွယ်နေတာက အဲဒီအချိန်က ဦးနေဝင်းကို ကာကွယ်နေသလိုပါပဲ။

ကမ္ဘာတခုလုံးက အမေရိကန်ပြည်သူတွေနဲ့ အတူ ဆန္ဒပြပေးနေကြတာက သူတို့ ခံစားချက်ကို စာနာလို့ပါ။ အဲဒါကို အမေရိကန်ပြည်သူတွေကို မစာမနာ ပြောနေတာက အတော်ရယ်ချင်စရာ ကောင်းပါတယ်။ ဒီမိုကရေစီကို အားပေးတယ်ဆို လူ့အခွင့်အရေးကို တန်ဖိုးထားရမှာပါ။ အခုတော့ အာဏာရှင် ဆန်နေတဲ့ အမေရိကန် မျိုးချစ်ကို အားပေးနေပုံက တလွဲကြီးပါ။

ဒီလိုနဲ့ ထရန့်တယောက် ကျင်းထဲ ပုန်းနေချိန်မှာ ဘိုင်ဒန်နဲ့ အိုဘားမားက မိန့်ခွန်း ပြောပါတယ်။ အိုဘားမားရဲ့ Town Hall ပြောကြားချက်က အလွန်ထိရောက်ပါတယ်။ “ I want you to know that you matter, I want you to know that Your lives matter, Your dreams matter “ ပါတဲ့။ အဲဒီမိန့်ခွန်းပီး တဲ့နောက် ဆန္ဒပြပွဲတွေ နည်းသွားသလို ငြိမ်းချမ်းစွာပဲ ဆန္ဒပြကြပါတယ်။

အမေရိကန်မီဒီယာတွေက တိုင်းပြည်အတွက် ခေါင်းဆောင် အလိုအပ်ဆုံးအချိန်မှာ အိမ်ဖြူတော်က လက်ရှိ သမ္မတက မီးပိတ်ပီး ပုန်းနေပီး အိုဘားမားနဲ့ ဘိုင်ဒန်က ရှေ့ထွက်လာခဲ့တယ်လို့ ရေးသားခဲ့ကြပါတယ်။ ဒီလောက်ဆို အမှား အမှန်နဲ့ အောင်မြင်မှု ကျရှုံးမှုတွေကို သိလောက်ကြမှာပါ။ အမေရိကန် ပြန်လာဖို့ စုစည်းမှုအကြီးအကျယ် လိုအပ်နေပါတယ်။ ဆောင်းပါးကို မန်ဒဲလားရဲ့ သမိုင်းဝင်စကားလေးနဲ့ပဲ ပိတ်လိုက်ပါမယ်။

“လူသားတိုင်းဟာ တဦးကို တဦးမုန်းဖို့ မွေးဖွားလာကြတာမဟုတ်ပါဘူး။ မုန်းတတ်ရင် ချစ်လဲ ချစ်တတ်ရမယ်။ ချစ်တတ်အောင် သင်ကြားပေးကြပါစို့။”

ရေးသားသူ – Nay Thway

Add a Comment

Your email address will not be published. Required fields are marked *

eleven + 12 =