မြန်မာသည် ဝင်ငွေ အနိမ့်ဆုံးအဆင့် မဟုတ်တော့ပဲ အလယ်အလတ် နိုင်ငံအဆင့် သို့ ရောက်ရှိ

မြန်မာသည် ဝင်ငွေ အနိမ့်ဆုံးအဆင့် မဟုတ်တော့ပဲ အလယ်အလတ် နိုင်ငံအဆင့် သို့ ရောက်ရှိ

မြန်မာနိုင်ငံသည် ယခင်ကကဲ့သို့ ဝင်ငွေအနိမ့်ဆုံးအဆင့် မဟုတ်တော့ဘဲ အလယ်အလတ် အဆင့် ဝင်ငွေနည်းနိုင်ငံများ စာရင်းထဲသို့ (Low-Middle Income Countries) ပါဝင်သွားပြီဖြစ်ကြောင်း ကျင်းပပြီးစီးသွားပြီဖြစ်သည့် ပြည်ထောင်စုလွှတ်တော်အတွင်း အစိုးရတာဝန်ရှိသူ၏ တင်ပြပြောကြားချက်များ အရ သိရှိရသည်။

ကမ္ဘာ့ဘဏ်က နိုင်ငံတစ်နိုင်ငံ ၏ စီးပွားရေးကို ဝင်ငွေမြင့်မားမှု၊ အလယ်အလတ်ဝင်ငွေနှင့် အလယ်အလတ်အဆင့် ဝင်ငွေနည်းနိုင်ငံ၊ ဝင်ငွေနည်းနိုင်ငံ စသည်ဖြင့် အဆင့်များသတ်မှတ်ခွဲခြားထားကာ ယခင်က မြန်မာကို ဝင်ငွေအနိမ့်ဆုံး အဆင့်စာရင်းထဲသို့ ထည့်သွင်းထားသည်။

မြန်မာအနေဖြင့် ယခုအဆိုပါစာရင်းမှ ရုန်းထွက် သွားနိုင်ကာ အလယ်အလတ်အဆင့် ဝင်ငွေနည်းနိုင်ငံများ စာရင်းထဲသို့ (Low-Middle Income Countries) တက်လှမ်းသွား၍ တစ်ဖက်တွင်လည်း ယခင်ကရရှိခဲ့သည့် ချေးငွေအတိုးနှုန်းလျှော့ပေးသည့် အခွင့်အရေးအပါအဝင် အခွင့်အရေးအချို့ကို လက်လွှတ် ဆုံးရှုံးပေးရတော့မည်ဖြစ်ကြောင်းပါ သိရှိရသည်။

ကမ္ဘာ့ဘဏ်က မြန်မာကို ယခင်က ချေးငွေချေးပေး ရာတွင် အတိုးနှုန်းအား ဝ.၇၅ ဖြင့်ချေးပေးသော်လည်း ယခုမူ အတိုးနှုန်းမှာ ၂ ရာခိုင်နှုန်းဖြစ်နေပြီဟု စီမံ၊စီးပွား၊စက်မှုဝန်ကြီးဌာန ဒုတိယဝန်ကြီးဦးမောင်မောင်ဝင်းက ပြည်ထောင်စုလွှတ်တော်ကို အစီရင်ခံတင်ပြထားသည်ကိုတွေ့ရသည်။

ကုန်သည်စက်မှုလုပ်ငန်းအသင်းချုပ် ဒုတိယဥက္ကဌ ဒေါက်တာမောင်မောင်လေးက “အများနားလည်အောင်ပြောရရင် နိုင်ငံက အဆင့်တက်လာတယ်ပေါ့။ အရင်က ဝင်ငွေနည်းနိုင်ငံ၊ အခု အလယ်အလတ်အဆင့်ဝင်ငွေနည်းနိုင်ငံဖြစ်သွားတယ်ပေါ့။

ဒါ့ကြောင့် အရင်က ပေးတဲ့အတိုးနဲ့ မရတော့ဘဲ အတိုးမြင့် သွားတယ်ပေါ့။ ဘာပဲဖြစ်ဖြစ် နိုင်ငံဟာ အရင်လိုမဟုတ်တော့ဘဲ အဆင့်တက်လာတဲ့အတွက် ချေးငွေတွေပိုရမယ်။ ယုံကြည်တဲ့သူ ပိုတိုးလာမယ် စတဲ့ အကျိုးရလဒ်ကောင်းတွေ အများကြီး ရလာလိမ့်မယ်” ဟု မှတ်ချက်ပြုသည်။

မြန်မာအစိုးရက ရုန်းထွက်ရန် ကြိုးစားနေသည့် Least Developed Countries ဖွံ့ဖြိုးမှု အနည်းဆုံးနိုင်ငံများစာရင်းမှ ထွက်နိုင်ရေးတွင်လည်း များစွာအထောက်အကူပြုလိမ့်မည်ဟုပါ ဒေါက်တာမောင်မောင်လေးက သူ့အမြင် ကိုပြောသည်။

crd : blacker

Add a Comment

Your email address will not be published. Required fields are marked *

1 × 5 =