ပုဂံက ဘုရား (၅) ဆူ ရဲ့ ဌာပနာ များ ဖေါက်ထွင်းခံရ…

ပုဂံက ဘုရား (၅) ဆူ ရဲ့ ဌာပနာ များ ဖေါက်ထွင်းခံရ…

ကိုဗစ်ကာလမှာ စီးပွားရေး လုပ်ငန်း တွေ အားလုံး ရပ်ဆိုင်းပြီး သူဌေးကအစ အခြေခံ ဝန်ထမ်း အဆုံး စီးပွားရေး ထိခိုက်မှုတွေ ဖြစ်ကုန်ကြပါတယ်။ လစာ ပုံမှန် ရနေတဲ့ ဝန်ထမ်းတွေကတော့ သိပ်မသိသာလှဘူး ဆိုပေမယ့် နဂိုကတည်းက လစာ နည်းပါးတဲ့သူတွေကတော့ ကုန်ဈေးနှုန်း တက်လာတဲ့ ဒဏ်ကို ခံစားနေကြ ရပါတယ်။

အဲဒီလို စီးပွားရေး ကျဆင်းပြီး လူတွေ အလုပ်အကိုင် မဲ့လာချိန် မှာ ခိုးဆိုး လုယက်မှုတွေ လုပ်လာကြတာတွေ့ရပါတယ်။ ဒါပေမယ့် ရဲနဲ့ ရပ်ရွာက ပြည်သူတွေ စုပေါင်းအားနဲ့ လုံခြုံရေး လုပ်လိုက်တော့ ခိုးဆိုးလုနှိုက်တွေ အတော်ကြီး ငြိမ်သွားပါတယ်။ ဒါပေမယ့် အချောင်သမားတို့ရဲ့ ထုံးစံအတိုင်း ဘယ်နေရာက ငွေဝင်ချောင်မလဲ လို့ စဉ်းစားနေတဲ့သူတွေကတော့ လူတွေ သိပ်ဂရု မထားမိတဲ့ ဘုရားစေတီတွေ ဖက်ကို လှည့်လာကြပါပြီ။

ကိုဗစ်ကာလမှာ ဘုရားစေတီတွေ အားလုံးကို ခေတ္တပိတ် ထားတော့ အလစ်သမားတို့ အကြိုက် ပိုတွေ့သွားကြ ပါတယ်။ လုံခြုံရေး သိပ်မကောင်းတဲ့ ဘုရားစေတီတွေ ဆီက တန်ဖိုးကြီး ပစ္စည်းတွေကို ခိုးယူနေကြပါတယ်။ အခုလည်း ပုဂံဘုရား (၅) ဆူက ဌာပနာတွေကို ဖောက်သွားကြပြန်ပါပြီ။ သတင်း အပြည့်အစုံကို အောက်မှာ ဖော်ပြ ထားပါတယ်-

ယနေ့ (၈/၆/၂၀၂၀) တွင် ပုဂံညောင်ဦးဧည့်လမ်းညွှန်များအသင်း မှ ပုဂံ ဘုရားများကို ကင်းပတ် လှည့်လည် ကြည့်ရှုစဉ် ရွာဟောင်းကြီးဘုရားမြောက်ဖက် ဘုရားစုများထဲမှ ဘုရားငါးဆူ၏ ပြန်လည်ပြုပြင်ထားသော ကွမ်းတောင်များတွင် ဖောက်ထွင်းခံထားရသည်ကိုတွေ့ရှိရပါသည်။

ထို့ကြောင့် ရှေးဟောင်းသုတေသနဦးစီးဌာန နှင့် သက်ဆိုင်ရာလုံခြုရေးအဖွဲ့အစည်းများသို့ သတင်းပေးပို့၍ မှတ်တမ်းရယူ ပူးပေါင်းဆောင်ရွက်နေပါကြောင်း အသိပေးအပ်ပါသည်။

ဓါတ်ပုံမှတ်တမ်းများ နှင့်တကွ ဖော်ပြအပ်ပါသည်။

အလုပ်အမှုဆောင်ကော်မတီ – ပုဂံညောင်ဦး ဧည့်လမ်းညွှန်များအသင်း