“လူကြမ်း တော့ နတ်ကြမ်း မခံနိုင် (သို့မဟုတ်) နတ်ကြောက် တဲ့ ကျောင်းဆရာ တစ်ဦး”

“လူကြမ်း တော့ နတ်ကြမ်း မခံနိုင် (သို့မဟုတ်) နတ်ကြောက် တဲ့ ကျောင်းဆရာ တစ်ဦး”

ရွာမှာ ကျောင်းဆောက်ဖို့ နေရာရွေး ဆိုတော့ တောင်ဘက်က ညောင်ပင်အောက် ကွက်လပ်ပဲ အကောင်းဆုံးလို့ မြင်ကြတယ်။ ဒါပေမဲ့ အဲဒီနေရာ ညောင်ပင်ကြီးက ခံနေတယ်။ တကယ်လို့ လေတိုက်ပြီး ညောင်ကိုင်းကျိုး ကျရင် ဆိုတာ ထည့်တွက် ရတယ်။ ကျွန်တော်ကိုယ်တိုင်ကလည်း အဲဒီနေရာ ကို ကြိုက်တယ်။ ကျောင်းဆောက်ရင် တစ်ခုပဲရှိတယ်။ ညောင်ပင်ကို ခုတ်ရမယ်။ ခက်တာက ညောင်ပင်ဆိုရင် နတ်စင်တင်လိုက်တော့ ပိုပြီး ပြဿနာ ရှုပ်တယ်။ ညောင်ပင် ခုတ်ရင် သူတို့ရွာက လာပြီး ကိုးကွယ်နေတဲ့ ညောင်စောင့်နတ်နဲ့ ကျွန်တော် ပြဿနာ တက်ရမှာ။

ညောင်ပင်ဆိုလို့ သေးသေးလေးလို့ မထင်လိုက် နဲ့။ လူငါးယောက်ဖက်စာလောက် အောက်ခြေကရှိတယ်။ ရွာတည်စ လောက်ကတည်းက သက်တမ်းရင့် ညောင်ပင်ကြီး။ ဒုတိယကမ္ဘာစစ်ကလည်း ဒီညောင်ပင် အောက်မှာ ဂျပန်တွေက ဘက်နက်နဲ့ထိုးပြီး လူသတ်ခဲ့တဲ့နေရာ။ ဒီနေရာကို ကြောက်နေကြတာ လည်းအလွန်ပဲ။ ည ဆိုရင် သွားဖို့နေနေသာသာ နေ့ခင်းတောင် အဲဒီအောက်သွားပြီး သေးမပေါက်ရဲဘူး။ ကျောင်းလွှတ်ချိန် ဆိုရင်လည်း အရိပ်ကောင်းပေမယ့် ကျောင်းသားတွေ သွားပြီးမကစားကြဘူး။ မြေကိုင်မှာ ကြောက်တယ်တဲ့။

နောက်ဆုံး အားလုံးကြောက်နေတဲ့ ညောင်ပင်ကို ကိုယ်က ဦးဆောင် ခုတ်ဖို့ ဆုံးဖြတ်လိုက်ရတယ်။ ရွာလူကြီး တွေက သူတို့လည်း မလုပ်ရဲဘူး၊ အဖြေကလည်း မရှိဘူး၊ ကျွန်တော် လုပ်မယ်ဆိုတော့လည်း မတားတော့ဘူး။ ညောင်ပင် ဘယ်သူခုတ်မလဲ ဆိုတာ ကြောင်ကို ခြူ ဘယ်သူဆွဲပေးမလဲ ဆိုတာထက်ဆိုးနေပြီ။ ကျွန်တော်က ခုတ်မယ် လို့သာ ပြောတာ သစ်ပင်တောင် တက်တတ်တာမဟုတ်ဘူး။ ဒါနဲ့ သစ်ပင်ခုတ်မယ့်သူရှာတော့ ချင်းလား၊ ကချင်လားမသိ သူ့ကိုရွာက လူးဝါးလို့ခေါ်သူတစ်ယောက် ရောက်လာတယ်။ သူက ပင်စည်ကြီးကို တော့ မခုတ်နိုင်ဘူး။ အကိုင်းတွေ အားလုံး ခုတ်ပေးမယ်။ ၂၀၀၀ တောင်းတယ်။ ကျွန်တော်ကလည်း ပေးမယ် ဆိုပြီး သဘောတူတော့ နောက်တစ်နေ့ လာခုတ်တယ်။

သူက “ဆရာကြီး … အမိန့်ပြန်ပေးပါ” တဲ့။ ကျွန်တော်က ဘာမှန်းနားမလည်လိုက်ဘူး။ ဒီတော့ သူက “အပင်မှာ စောင့်နေတဲ့ အစောင့်တွေ၊ မှီခိုနေတာတွေကို ဆရာတို့ အစိုးရအမိန့်နဲ့ နှင်မှရတယ်။ အမိန့်ပြန်တမ်း ရေး၊ ဖတ်ပြပြီး နှင်ပေးပါ” တဲ့။ ကိုယ့်ထက်ဆရာကျတဲ့သူနဲ့ တွေ့လိုက်ရလို့ ကျေးဇူးတင်ပြီး လုပ်ပေးမယ်လို့ ပြော လိုက်ရတယ်။ သူက ကြိုးတွေ ပုဆိန်တွေ၊ ဓားတွေအားလုံးကို ညောင်ပင်မှာ ထောင်လိုက်တယ်။ ပြီးတော့ “ဆရာကြီး အမိန့် ပြန်တမ်း ဖတ်တော့” တဲ့။ ကျွန်တော်ကလည်း

“အစိုးရအမိန့် … ဤနေရာသည်ကျောင်းပိုင် မြေနေရာဖြစ်သည်။ ကျောင်းသားများအတွက် ကျောင်းဆောင် ဆောက်ရမည် ဖြစ်သောကြောင့် ဤညောင်ပင်ကို ခုတ်မည်ဖြစ်သဖြင့် သင်တို့ ဤအချိန်မှစပြီး သွားလိုရာ သွားနိုင်ပြီ။ ပုံ ကျောင်းအုပ် ဆရာကြီး” ဆိုပြီး အသံပြင်းပြင်းဖတ်ပေးလိုက်ရတယ်။ လူးဝါးက အမိန့်စာကို တောင်းပြီး ညောင်ပင်မှာ သံနဲ့ ကပ်ရိုက် လိုက်တယ်။

လူးဝါး သစ်ကိုင်းကြီးတစ်ခုကို ခုတ်နေချိန်မှာ ညောင်ပင်ခေါင်း ထဲက ထွက်လာတဲ့ ပုရွက်နီကြီးတွေက နည်းနည်း နောနော မဟုတ်ဘူး။ လူးဝါးလည်း ဆင်းပြေးရတယ်။ ဘယ်လိုမှ မတတ်နိုင်ဘူး။ နောက်တစ်နေ့ လူးဝါး မလာတော့ဘူး။ သူ့တဲကို လိုက်ခေါ်တော့ လူးဝါး ဖျားနေပြီ။

ရွာလူကြီးတွေကလည်း ကြောက်ပြီး ကျွန်တော့်ကို ဆက်မခုတ် ပါနဲ့တော့လို့ ပြောတယ်။ ကျွန်တော်ကလည်း ဘာဖြစ်ဖြစ် ဆက်ခုတ်မယ်။ ရအောင်ခုတ်မယ်လို့ ပြောလိုက်တယ်။ ညကျတော့ ကျောင်းထဲက ကျွန်တော်တို့နေတဲ့ ဆရာတန်းလျားကို တစ်စုံတစ်ခုက လာပြီး ဝင်တိုက်သလို သိမ့်ခနဲ …သိမ့်ခနဲ ဖြစ်သွားတယ်။ ဆရာမလေး တွေလည်း အော်ပြီးဆင်းပြေးကြတယ်။ ဒီတန်းလျားကြီးတစ်ခု လုံးကို လှုပ်သွား အောင် ဆိုတာ ကျွဲလို၊ ဆင်လိုအကောင်တွေ လာပြီးတွန်းမှ လှုပ်မှာပါ။ ကျွန်တော် ဓာတ်မီး တွေနဲ့ လိုက်ရှာတော့လည်း ဘာမှမတွေ့ဘူး။ ဆရာမလေးတွေ သူတို့အခန်း သူတို့ပြန်နေပြီး မကြာပါဘူး “ဆရာကြီး လာပါဦး ဒီမှာ သီတာ ဘာဖြစ်မှန်း မသိဘူး” ဆိုတဲ့ အော်သံ ကြားရပြန်တယ်။

ကျွန်တော် ဆရာမတွေနေတဲ့ အခန်းဘက်သွားလိုက်တော့ မူလတန်းပြ ဆရာမလေးသီတာ တက်သလိုဖြစ်ပြီး ပါးစပ်က ပေါက်ကရတွေ ပြောနေတယ်။ သူက နောက်ဖေးမီးဖိုချောင်ဘက်ကို လက်ညှိုးတွေထိုးပြနေတယ်။ ပါးစပ်ကလည်း အံကြိတ်ထားတယ်။ ဆရာမလေးတွေကြောက်နေကြပြီ။ ကျွန်တော်ကလည်း ဒေါသထွက် သွားပြီး တပည့်လေး တစ်ယောက်ကို သွားစမ်း အခန်းထဲက ကြိမ်လုံးသွားယူစမ်း .. ငါ့ကို ဘာမှတ်သလဲလို့ အော်လိုက်ရတယ်။

“ငါ အစိုးရအမိန့်ပြန်ထားတယ်။ ငါ့ကို ဘာမှတ်သလဲ။ ဒီမှာလာပြီး ပြဿနာမရှာနဲ့။ သေသွားမယ်” ဆိုပြီး အော်လိုက်ရ တယ်။ တကယ်တော့ ဆရာမလေးတွေ မကြောက်အောင် ဟန်ကိုယ့်ဖို့ လုပ်လိုက်ရတာ။ ကိုယ်လည်း ဘာမှန်းသိတာတော့ မဟုတ်ဘူး။ တိုက်တိုက်ဆိုင်ဆိုင် သီတာလည်း သတိပြန်ရလာတယ်။

နောက်တစ်နေ့စောစော ကရင်တွေသစ်ခုတ်တဲ့ ဆင်ဝိုင်းကို သွားရတယ်။ သူတို့ကို သွားပြီး အကူအညီတောင်း တော့ ဆင်ခေါင်းကြီးက “မပူနဲ့ဆရာကြီး ကျောင်းပိတ်တဲ့နေ့ ငါတို့ လာလုပ်ပေးမယ်” လို့ ကတိပေးလိုက်တယ်။ ကျောင်းပိတ်ရက် မနက်စောစော ကရင်တစ်အုပ်စု ဆင်သုံးကောင်နဲ့ ရောက်လာတယ်။ သူတို့ကို ကျွန်တော်က ဘာလုပ်ပေးရမလဲ မေးတော့ ဘာမှ မလုပ်ပေးနဲ့ဆိုပြီး ညောင်ကိုင်းကြီးတွေကို သံကြိုးကြီးတွေ ပစ်တင်ပြီးပတ်၊ ဆင်တွေနဲ့ အားကုန်ဆွဲတော့တာပဲ။ ညောင်ကိုင်းတွေ တဖြောင်းဖြောင်းနဲ့ ကျိုးကုန်တော့တာပေါ့။ ပြီးတော့ သူတို့ ဆင်တွေ နဲ့ပဲ ကျောင်းနောက်က ဘောလုံး ကွင်း ထဲကို သစ်ကိုင်းတွေ အားလုံး ယူသွားပြီး စုပုံပေးထားတယ်။ တမနက်တည်း လုပ်သွားတာပါဗျာ။ သူတို့ကို ကျေးဇူး တင်လိုက်တာ။

ကျွန်တော်ကလည်း ညောင်ပင်ကို အမြစ်ကစပြီး ရှင်းမှ ရတော့မယ်ဆိုတာ သိနေတယ်။ ဒါနဲ့ ညောင်ပင် အောက်ခြေမှာ လှိုဏ်ပေါက် တစ်ခုရအောင် ကိုယ်တိုင်တူးရတယ်။ ခွေးတဝပ်စာလောက်ရတော့ အဲဒီ လှိုဏ်ခေါင်းထဲကို ကောက်ရိုးတွေ ထည့်ပြီး မီးရှို့ပါတော့တယ်။ ညောင်ပင်က အဆီတွေထွက်တော့ သူ့အဆီနဲ့သူ လောင်ချက်ကောင်း ပေါ့။ ဒါပေမဲ့ မီးတောက်နဲ့ မီးခိုးမထွက်ဘူး။ ညဆိုရင် တစ်ပင်လုံး ရဲပြီး အတွင်းက လှိုက်လောင်နေတာ ကြည့်လို့တောင် ကောင်းသေး။

ကျွန်တော့်ကိုတော့ ရွာက ဘွဲ့ပေးပါတယ်။ လူကြမ်းတော့ နတ်လည်း သူ့ကို လိုက်မကြမ်းနိုင်တော့ဘူး ဆိုပြီး “နတ်ပြေးဆရာ” တဲ့။

မောင်ခေတ်

Add a Comment

Your email address will not be published. Required fields are marked *

11 − nine =